Charles Kagame yasohoye indirimbo nshya ’Amakuru’ nyuma y’iminsi asimbutse urupfu

Yanditswe na IGIHE
Kuya 20 Gashyantare 2021 saa 02:10
Yasuwe :
0 0

Umuhanzi w’umunyempano Kagame Charles yashyize hanze indirimbo nshya yise ’Amakuru’ nyuma y’iminsi asimbutse urupfu aho yakoze impanuka ikomeye ariko akayirokoka.

Kagame Charles akora umuziki wo kuramya no guhimbaza Imana; asengera mu Itorero rya Lifehouse Church mu Mujyi wa Coffsharbour muri Australia ndetse ni naho akorera ivugabutumwa rinyuze mu ndirimbo.

Uyu muhanzi mu minsi ishize yakoze impanuka ndetse abakunzi b’umuziki we barahangayika ariko Imana yakinze akaboko arayirokoka.

Avuga ko “Impanuka nakoze ni iy’imodoka nkaba naragize ikibazo cy’igufwa ry’akaboko k’iburyo, gusa ku bw’urukundo rw’Imana nkaba ndi amahoro ndetse ndi gukira.”

Nyuma yo gutora agatege, Kagame Charles yasohoye indirimbo nshya ’Amakuru’ izaba iri kuri album ye ya mbere yitwa ’Ntuzibagirwe’ izaba igizwe n’indirimbo 10.

Mu kiganiro cyihariye, uyu muramyi yabwiye IGIHE ko indirimbo ye nshya y’amashusho yayinyujijemo ubutumwa busaba abantu bose kwicisha bugufi mu byo bakora.

Yagize ati “Indirimbo ivuga ku bantu bishyize hejuru kubera icyubahiro n’ijambo bafite ku Isi kandi nyamara cyaraturutse ku Mana; nashakaga kumvikanisha ko urugero rwiza ku bakirisitu ari Yesu waranzwe n’urukundo ndetse no guca bugufi. Gukomerwa amashyi, kwitwa abakomeye ntibigatume twishyira hejuru ngo tureke kumva abandagaye.’’

Kagame Charles yavuze ko ibikorwa byinshi yateganyaga gukora mu muziki byakomwe mu nkokora n’icyorezo cya COVID-19 cyugarije Isi.

Ati “Ku ruhande rwa muzika naho nkomeje gukora cyane n’ubwo ibikorwa twari dufite byagiye bikomwa mu nkokora na Coronavirus bigatuma bitazira igihe bisanzwe bizira, muri ibyo bikorwa harimo nk’indirimbo y’amashusho yagombaga gusohoka vuba mbere y’uko ‘Guma mu rugo’ ya Kigali igaruka kuko hari ibice byakorerwaga mu Rwanda. Ikindi hari indirimbo ziri muri studio ndetse harimo n’iyo twifuza gukora mu gihe cyose COVID-19 yaba irangiye.”

Kagame Charles ni umwe mu babarizwa muri Moriah Entertainment Group ibarizwamo abandi bahanzi b’amazina akomeye mu muziki uhimbaza Imana barimo Gahongayire Aline, Patient Bizimana, Gaby Kamanzi, Richard Ngendahayo, Kanuma Damascène, Umurundi Fortran Bigirimana n’abandi.

Uyu muhanzi amaze gushyira hanze indirimbo enye zirimo “Ahindura ibihe”, “Tubagarure”, “Ntuzibagirwe” na “Naragukunze”.

Umuhanzi Charles Kagame yasohoye indirimbo nshya yise 'Amakuru' nyuma y'iminsi asimbutse urupfu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .