Agahinda kashibutsemo inganzo! Ihishurirwa rikomeye rya Janvier Muhoza wamamaye mu ndirimbo ‘Izabikora’

Yanditswe na Uwiduhaye Theos
Kuya 2 Nyakanga 2019 saa 11:13
Yasuwe :
0 0

Umuhanzi Janvier Muhoza wamamaye mu ndirimbo yise ‘Izabikora’ yakunzwe n’abatari bake yahishuye iby’ukuntu Imana yamuhaye ihishurirwa ryaturutsemo iyi ndirimbo yatumye amenyekana.

Uyu musore mu kiganiro yahaye IGIHE yavuze ko abakunzi bari baramubuze badakwiriye kugira impungenge kuko yagarukanye imbaraga nyuma yo gusoza ishuri.

Yagize ati “Impamvu yatumye mpagarika gukomeza gusohora indirimbo ni uko nari mpugiye mu masomo. Habayeho ibibazo bituma mva mu ishuri nigagamo i Huye, nkajya kwiga muri Ines Ruhengeri. Byari ibintu bigoye ku buryo ntari kubona umwanya wo gusohora ibihangano.”

Yunzemo ati “Mpindura mva i Huye njya mu Ruhengeri byari ibintu bigoye kuko twigaga amasomo mu buryo bugoye mbona ari ibintu ntahuza n’amasomo bituma mara imyaka ibiri ntakora umuziki.”

Yavuze ku ihishurirwa yagize kubera indirimbo ye ‘Izabikora’ yamamaye cyane, ahishura uburyo yayihimbye biturutse ku ihishurirwa ry’ibyamubayeho bigatuma Imana iyimuha.

Ati “Izabikora nayihimbye ndi mu bihe byiza byo gusenga mu 2011 ubwo nari ntegereje kujya kwiga muri kaminuza. Umunsi nyihimba nari mbyutse mu gitondo Imana inganiriza ku mirimo yagiye inkorera. Nari mfite ikintu kimeze nk’igikomere cyari cyarambabaje kuko ndangiza amashuri yisumbuye sinigeze mbona buruse ngo njye kwiga muri kaminuza ya leta nk’abandi kandi nari umuhanga.”

Yongeyeho ati “Byaramambabaje cyane. Nigaga mu kigo cyiza cyitwaga ‘Ecole de Science Byimana’ nari nagiye mfite amanota meza ndi uwa gatatu mu karere. Mu by’ukuri haba njye cyangwa ababyeyi bose bumvaga ko nzagira amanota ariko ngeze mu cyiciro cya kabiri mu mashuri yisumbuye ntangira kurwara bituma ntatsinda nka mbere.”

Yavuze ko Imana yabimwibukije akumva atinzwe bigatuma yiringira ko nyuma y’ukuntu Imana yamwitayeho, yumva ko n’ibindi izabikora.

Niko byagenze kuko ababyeyi n’abavandimwe be baje kubona akazi, akabona uburyo bwo gukomeza amashuri.

Muhoza wize ibijyanye n’Imibare, Ubutabire n’Ibinyabuzima(MCB) mu mashuri yisumbuye, afite indirimbo nshya yise ‘Iratwibutse’.

Yatwaye Groove Awards mu 2015 nk’umuhanzi mushya w’umwaka.

Iyi ndirimbo ye nshya avuga ko nayo ari ihishurirwa yagize biturutse ku butumwa Imana yamuhaye ubwo yari ari mu gihirahiro ishuri yigagamo muri kaminuza i Butare ryarafunzwe Imana ikamuganiriza imubwira ko ikuyeho imisozi yari iri imbere ye, nyuma akaba aribwo yahise ajya kwiga muri Ines Ruhengeri.

Ari kwitegura gushyira hanze indirimbo ze muri Nzeri ku buryo abakunzi be, umwaka utaha akazashyira hanze album.

Muhoza wize Biotechnology muri INES, afite indirimbo nshya yise ‘Iratwibutse’
Umuhanzi Janvier Muhoza yasoje amasomo y’Icyiciro cya Kabiri cya Kaminuza nyuma yo guhura n’ingorane zatumaga amasomo adindira
Muhoza Janvier yambitse umubyeyi we Niyibizi Béatrice ikanzu amushimira ko yamubaye hafi ari ku ntebe y’ishuri
Muhoza yatwaye Groove Awards Rwanda mu 2015 nk’umuhanzi mushya w’umwaka
Muhoza Janvier ari mu banyempano bihariye mu muziki uhimbaza Imana

Reba indirimbo ya Janvier Muhoza nshya yise ‘Iratwibutse’

Muhoza yamamaye cyane mu ndirimbo yise ‘Izabikora’

Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza