Korali Elayono y’i Remera yasohoye indirimbo nshya ivuga ku ‘ishimwe ry’uwavuye kure’

Yanditswe na Niyonzima Moïse
Kuya 3 Ugushyingo 2019 saa 10:57
Yasuwe :
0 0

Korali Elayono ikorera umurimo w’ivugabutumwa rinyuze mu ndirimbo muri ADEPR Remera yasohoye indirimbo nshya ikubiyemo ubutumwa buvuga ku gukomera kw’Imana mu buzima bw’abayiringira mu mibereho yabo.

Iyi ndirimbo nshya ya Korali Elayono yitwa ‘Imirimo y’Imana’, ifite iminota itandatu n’amasegonda 15.

Mu magambo ayigize abaririmbyi ba Korali Elayono bumvikana bahamagarira abantu bose ‘guhimbaza Imana ikomeye no kumvikanisha ishimwe ryayo.’

Umuyobozi w’abaririmbyi muri Korali Elayono, Shyaka Callixte, yabwiye IGIHE ko iyi ndirimbo itanga ubutumwa bushimangira imirimo y’Imana ku buzima bw’abayikunda.

Yagize ati “Igitekerezo cy’indirimbo gishingiye ku ishimwe ry’Imana. Ni kwa kundi ubona hari ibidashoboka ariko igihe cyazagera Imana ikagira uko ibigenza neza. Yubakiye ku nkuru y’ibyo Imana igukorera nawe ukabona bitangaje, utabikekaga.’’

Yakomeje avuga ko ni muri Korali Elayono hari ibyo babonaga bigoranye ariko Imana igaca inzira.

Ati “Kera warebaga ahazaza ha korali ukabona ntaho ariko Imana yahinduye amateka ku buryo tuvuga bakadutega amatwi, bakatwumva. Imana yatwubatse no mu buzima busanzwe kuko abari imfubyi bafite imibereho, abandi babonye imikorere, hari ibintu byinshi Imana yahinduye.’’

Korali Elayono yasohoye indirimbo ya kane mu zigera ku icumi z’amajwi iteganya guha abakunzi b’ibihangano by’umusaraba bitarenze umwaka wa 2019. Yatunganyijwe na Producer Simeon ukorera muri Studio ya New Melody kuri Solace Ministries ku Kacyiru.

Iyi korali iranitegura gukora urugendo rw’ivugabutumwa i Musambira mu Karere ka Kamonyi, aho izataramira ku wa 17 Ugushyingo 2019. Iranateganya gukora igitaramo cyagutse cyo gushima Imana mu Ukuboza 2019.

Ni ivugabutumwa rizakurikira ibindi biterane yakoreye mu bice bitandukanye by’igihugu mu Turere twa Rwamagana, Rubavu byitabiriwe bishimishije, bisiga benshi bayobotse inzira y’agakiza.

Korali Elayono iri mu zikomeye muri ADEPR, ifite agahigo ko kuba ariyo yegukanye igihembo cya Korali ya mbere mu Rwanda ikoresha neza ikoranabuhanga mu gusakaza ivugabutumwa mu 2014 mu bitangwa na Sifa Rewards.

Korali Elayono yatangiye mu 1996, ku gitekerezo cy’urubyiruko rw’abasore n’inkumi 12, bumvaga bafite ishyaka ryo gukora ivugabutumwa mu ndirimbo.

Mu 2006, Korali yujuje imyaka icumi ivutse, yemerewe gukora ku mugaragaro, iza no guhabwa izina yitwa “Elayono.” Imaze gukora indirimbo zirenga 300.

Kuri ubu Korali Elayono igizwe n’abaririmbyi basaga 160 bari mu byiciro bitandukanye birimo urubyiruko n’abubatse.

-  Umva hano indirimbo nshya “Imirimo y’Imana” ya Korali Elayono

Korali Elayono yo muri ADEPR Remera yasohoye indirimbo nshya yise "Imirimo y'Imana''
Korali Elayono yasohoye indirimbo ivuga ku ishimwe ifite ku Mana rishingiye ku iterambere imaze kugeraho mu ivugabutumwa ry'indirimbo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza