Ben na Chance, Gahongayire mu batumiwe mu itangizwa ry’Umuryango Heart of Worship in Action

Yanditswe na Uwiduhaye Theos
Kuya 24 Ukuboza 2019 saa 05:07
Yasuwe :
0 0

Gakunzi Makuza Willy usanzwe akorera umuziki uhimbaza Imana muri Canada akaba ari mu bashinze Umuryango Heart of Worship in Action ugamije guhindura imibereho y’abaturage, yatumiye abaramyi bakomeye mu gikorwa cyo gutangiza ishami ryawo mu Rwanda.

Igikorwa cyo gutangiza Heart of Worship in Action Foundation kizabera mu Ubumwe Grande Hotel ku wa 27 Ukuboza 2019 kuva saa Kumi n’ebyiri z’umugoroba.

Gakunzi yatumiye abaramyi bakomeye mu Rwanda barimo Aline Gahongayire, Simon Kabera na Ben & Chance bamaze iminsi bakunzwe mu ndirimbo bise ‘Amarira ya Yohana’ n’abandi.

Umuryango wa Heart of Worship in Action Foundation ufite intego yo gushyigikira ibikorwa bitandukanye bigamije guhindura ubuzima bwa benshi binyuze mu kubaka no kongerera ubushobozi bw’abari muri sosiyete runaka.

Washinzwe na Willy Gakunzi n’umugore we Estelle. Aba bombi bahuriye mu Buholandi mu 2004, barakundana ndetse bahuza inzozi zo gusakaza ibikorwa by’urukundo.

Nyuma y’imyaka itanu bashyingiwe bakomeje umuhamagaro wo kuramya Imana no kwitangira ibikorwa byo gukunda abantu.

Mu buzima bwabo bashyize imbaraga mu bikorwa bigamije kongerera ubushobozi urubyiruko, impunzi, abahohotewe n’abagore batishoboye.

Mu bihugu byose babayemo birimo u Buholandi, u Bubiligi na Canada, ibyo bakora byarashyigikiwe bituma na bo bakomeza inzira biyemeje.

Ku wa 8 Ugushyingo 2018 nibwo Estelle yitabye Imana, Gakunzi asigarana n’abana be babiri Kayla na Shayna. Kuva uwo munsi, Imana yahaye Gakunzi iyerekwa ryo gutangiza Umuryango Heart of Worship in Action nk’uburyo bwo kumuzirikana.

Gakunzi yavuze ko mu kumuha icyubahiro azakomeza ibikorwa bye by’ubugiraneza.

Yagize ati “Nta buryo bwiza bwo kwishimira no guha icyubahiro Estelle nko gukomeza gushyira mu bikorwa umutima we wo kuramya. Duhamya tudashidikanya ko binyuze muri uyu muryango ubuzima bwa benshi buzakorwaho kandi buhinduke bwiza.’’

Willy M. Gakunzi amaze igihe kirekire yitangira gukorana n’urubyiruko n’abantu bamukikije mu bikorwa bigamije guhindura imibereho yabo.

Gakunzi afite Impamyabumenyi y’Icyiciro cya Gatatu cya Kaminuza mu bijyanye n’Ubukungu, International Economics and Business, yakuye muri Kaminuza ya Utrecht mu Buholandi. Anafite icyemezo nk’umuhanga mu gutegura igenamigambi (Functional Business Architect) yakuye mu Ishuri rya CEVORA na Kaminuza ya Antwerp mu Bubiligi.

Gakunzi afite ubunararibonye mu gukorana n’ibigo by’imari mu bice bitandukanye ku Isi. Mu nshingano ze abifasha gushaka no gushyiraho uburyo bwo guhangana n’ibyago byatuma bigwa mu gihombo.

Uyu mugabo afatanya izi nshingano no kwandika indirimbo akaba n’umuramyi. Yashinze amatsinda yo kuramya no guhimbaza Imana ku Isi.

Gakunzi avuga ko ashishikazwa no kubaka ubushobozi bw’abantu by’umwihariko urubyiruko n’abadafite ubushobozi bagahindurirwa imibereho.

Ati “Nizera ko hatitawe ku ho umuntu aba n’ubuzima arimo, iyo ufite uburyo bwo kubona igishoro n’ubumenyi bukwiye, ushobora gukora umushinga wahindura ubuzima bwawe.’’

Heart of Worship in Action Foundation ni umuryango udaharanira inyungu watangirijwe muri Canada mu 2019.

Umuhanzi Aline Gahongayire ari mu batumiwe muri iki gitaramo
Serugo Ben n'umugore we Mbanza Chance [Ben na Chance] basanzwe baririmbana muri Alarm Ministries na Source Of Melody Band ibarizwamo abaramyi bafite amazina akomeye batumiwe muri iki gitaramo
Gakunzi Makuza yatumiye Simon Kabera, Ben na Chance ndetse na Gahongayire mu gitaramo gitangirizwamo Umuryango Heart of Worship in Action washibutse mu rupfu rw'umugore we witabye Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .