Ba maso utamburwa ihirwe ryo kuba Umwana w’Imana

Yanditswe na Padiri Marcellin Dusabumuremyi
Kuya 19 Nyakanga 2020 saa 08:17
Yasuwe :
0 0

Imana yaturemeye gukundwa no gukunda, igihe ituremye mu ishusho yayo y’urukundo.

Mu mugani w’urumamfu mu ngano (reba Matayo 13, 24-30; 36-43), nyir’umurima yabibye ingano aribo bana b’Ingoma y’ijuru (abana b’ Imana), bisobanura ko Imana yaturemeye kuba abana bayo, kuko yaturemye mu ishusho yayo, ituremera kuyikunda kuruta byose no gukunda abandi nk’uko twikunda.

Dukwiye kuzirikana iteka ineza y’Imana kugira ngo natwe turangwe n’ineza. Ariko tugomba kuba maso kuko Sekibi atubibamo urumamfu iyo turangaye.

-  Umwanzi abiba urumamfu abantu basinziriye

Twibukiranye ko urumamfu ari ibyatsi bisa n’ingano ariko bitari ingano, abahanga mu binyabuzima babyita "zizania" biva mu ndimi z’Ikigereki n’Ikilatini, ibyo byatsi bikaba bigabanyije mu moko agera kuri ane.

“Igihe abantu basinziriye, umwanzi we araza, abiba urumamfu hagati y’ingano, nuko arigendera. Ingano ziramera, zimaze kugengarara, ubwo urumamfu na rwo ruragaragara"(Matayo 13, 25-26).

Umwanzi ubiba urumamfu ni Sekibi, ubiba ubwumvikane buke, inzangano, ishyari, umururumba, inzika, irari n’ ibindi bibi bitandukanya abantu hagati yabo, n’ibibatandukanya n’Imana; aha ni ho havuye imvugo iboneka mu mico imwe n’imwe yo "kubiba urumamfu"("semer la zizanie "/ "to make mischief ") bivuga kubiba amacakubiri, amatiku, ubwumvikane buke.
Abatagatifu Augustini na Fransisiko w’ i Sales basobanuye inzego enye zikurikirana igishuko cyo gukora ikibi kiza mu muntu kikaba cyamugeza ahabi igihe yemeye ku bwende kwitandukanya n’Imana.

Turebe izo nzego enye kugira ngo tube maso, Sekibi atatubibamo urumamfu.

-  Ba maso Sekibi atakubiba urumamfu mu bitekerezo

Ku rwego rwa mbere aheraho, Sekibi abanza kugushyiramo igitekerezo kibi. Kuba Umwanzi Shitani abiba urumamfu abantu basinziriye, si ukubera ibitotsi bisanzwe umuntu akenera ngo aruhuke; ahubwo ni ibitotsi bya roho; bizikamisha umuntu iyo yateshutswe mu mibereho ibereye Imana, atakigirira urukundo Imana na bagenzi be.

Hari abari abakirisitu beza nyuma bagateshuka ku isengesho n’ ibikorwa byiza bitwaje ko hari igihe guhurira hamwe n’ abandi bitashobokaga kubera icyorezo cya Coronavirus cyangwa bakitwaza izindi mpamvu, bakanatinyuka gukora ibibujijwe ku munsi w’ Imana.

Nyamara hari abandi bakomeza kuba maso badahwema gusenga nubwo baba bari bonyine cyangwa bari mu rugo kandi bagakomeza kwigomwa bitangira ibikorwa by’urukundo n’ibifite akamaro rusange ku kiremwamuntu.

Mbere yo gucumura Sekibi abanza kugushyiramo igitekerezo kibi, ni uko byagendekeye abantu ba mbere ibabwira, iti ‘‘Koko Imana yaravuze ngo ntimukagire igiti cyo muri ubu busitani muryaho?’’ (Intangiriro 3,1); mu kiganiro bagiranye yabashyizemo igitekerezo cyo kurya imbuto babujijwe n’Imana.

Igitekerezo kibi kiba icyaha iyo wacyakiriye kigagucengeramo ukemera kugishyira mu bikorwa ku bwende n’ubwo cyaba kitaragagarira abandi; mbere yaho igitekerezo kibi nticyakwanduza kuko wanakigaya, ukacyamagana bitaragera aho ucyemera.

Ni byiza kwirinda ko igitekerezo kibi kigutwara, ugahita witekerereza ikindi kintu cyiza, nk’uko Mutagatifu Faransisiko wa Sales abitangaho inama, ukerekeza umutima wawe ku Mana, ugasenga, nk’ uko umwana ubonye igisimba kiryana ahita yirukira mu maboko y’umubyeyi; umukirisitu biba byiza iyo yerekeje umutima ku bimwibutsa Yezu wamupfiriye ku musaraba.

Kwirengagiza igitekerezo kibi, ukerekeza umutima ku Mana ni cyo abantu ba mbere babuze Shitani iboshya ikabashyiramo igitekerezo cyo gucumura.

Uko utinda ku kintu wumva cyakugusha mu cyaha, ni ko ibyago byo gucumura byiyongera.

-  Ba maso Sekibi atagushuka ko kugira nabi byagushimisha kurushaho

Urwego rwa kabiri Sekibi ashobora gukurikizaho iyo agushyizemo igitekerezo kibi ukacyakira, ni ukumva ko ikibi kigushimisha. Sekibi muri bwa bwenge buyobya akora ku buryo wibeshya ko nucumura bigushimisha.

Niko yashutse abantu ba mbere ko bazashimishwa cyangwa bakaryoherwa no kurya ibyo babujijwe n’Imana (reba Intangiriro 3, 6); nyamara nyuma bakozwe n’isoni bajya kwihisha, bari bibeshye cyane, bemera inama mbi ivuguruza Imana, bibaviramo kubura umunezero wo muri Paradizo.
Twirinde kugwa muri uwo mutego natwe. Ushyugumbwa ashaka kugomera Imana yibuke hakiri kare ko biganisha ahabi; kuko uko atinda yibaza ko hari inyungu mu gucumura ni ko ibyago byo kugwa mu cyaha byiyongera.

-  Ba maso Sekibi atagukura aheza (mu bana b’ Ingoma y’ Imana) ari wowe wigemuye

Ku rwego rwa gatatu Shitani ishobora kukugezaho, iragushuka ugacumura, ariko ntigukoresha icyaha utemeye kugikora wowe ubwawe. Abantu ba mbere bageze aho bo ubwabo basoroma imbuto babujijwe n’Imana barazirya (reba Intangiriro 3, 6 ), Umwanzi wabashutse atari we uzibasoromeye ngo azibatamike ku ngufu, kuko iyo biba batabyemeye ntibari bubigayirwe cyangwa ngo bibatere ipfunwe.

Hari abayobozi ba roho b’abatagatifu bagereranya Shitani n’ imbwa iryana ishumitse, ikarya umuntu uyisanze aho iziritse! Nta mpamvu yo kwishora mu kintu kigutera gucumura. Kandi koko icyaha kikugeza kuri Shitani iyo wemeye kugikora wowe ubwawe, ukagwirirwa n’ingaruka zo kwitandukanya n’Imana wakeshaga ibyiza byose by’ukuri.

-  Ba maso udaca imanza Imana itarazica cyangwa ukiheba

Iyo icumuye, bishobora kudogera ukagera ku rwego rwa kane, aho Shitani yifuza ko wiheba ukaguma mu cyaha wiyumvisha ko kubireka bitagukundira.

Mu mugani w’urumamfu mu ngano uwabibye yabujije abakozi gutema urumamfu rwari mu ngano igihe cy’isarura kitaragera.

Biragaragaza ko Imana itubuza kwigerezaho ngo ducire iteka ku bantu tubona mu byaha rimwe na rimwe tutazi icyabibateye, kuko tutamenya imbuto buri wese azaba yareze igihe isarura rizaba rigeze, ku munsi wo guhinguka imbere y’Imana, bashobora kwisubiraho, tubasabire, tubagorore kandi twihatire kubabera urugero tubifashijwemo n’ Imana.

Nawe ubwawe wikwicira urubanza ngo wumve ko niba wacumuye, uzahora wijandika mu cyaha nk’uko Umwanzi ashaka ko wiheba ukumva ko kureka icyaha bitakigushobokeye.

Twese dufite amahirwe yo kwisubiraho, tuyakoreshe neza; Imana Nyir’Impuhwe idutegerezanyije urukundo n’impuhwe ngo itwakire tuvuye mu byaha biva kuri Sekibi, ntirambirwa kutwihanganira, ariko hagowe unangira burundu kuko urumamfu ruzahambirwa rugatwikwa.

"Umwana w’umuntu azohereza abamalayika be, bavangure mu Ngoma ye abateye abandi kugwa mu cyaha bose, n’inkozi z’ibibi zose, maze babarohe mu nyenga y’umuriro, aho bazaririra kandi bagahekenya amenyo. Ubwo intungane zizabengerana nk’izuba mu Ngoma ya Se. Ufite amatwi, niyumve!"(Matayo 13, 41-43). Hahirwa rero abaharanira ubutungane!

-  Umwanzuro wafatwa

Dukwiye kuba maso dusenga, tunazirikana ugushaka kw’Imana kugira ngo Umwanzi atatubibamo ikibi, tukumva ko igihe cyose kuzibukira icyaha bishobora, kuko ingaruka zacyo ari mbi, kuko kidutandukanya n’ Imana itanga ibyiza byose.

Ubu hongeye kuboneka amahirwe yo gusengana n’abandi hakurikijwe amabwiriza yo kwirinda ikwirakwizwa ry’icyorezo cya Coronavirus, bidufashe kurushaho guhumuka duhange amaso Imana iturinde ibikorwa by’Umwanzi Shitani, itubwirize imyitwarire irinda kwandura muri iki gihe, turusheho guhamya ko twemere Imana.

"Ubwo turi abafasha b’Imana, turabashishikariza kudapfusha ubusa ubuntu bwayo. Kuko ubwayo yivugira iti “Mu gihe gikwiye, numvise isengesho ryawe; no ku munsi w’uburokorwe, naragutabaye .” Ngiki rero koko igihe gikwiye; nguyu koko umunsi w’uburokorwe" (Ibaruwa ya kabiri Pawulo yandikiye Abanyakorinti 6, 1-2 )

Twegere rero Imana tubashe kuba maso dukoresheje gusenga, gusaba imbabazi no kwicuza kare igihe twacumuye, kwigomwa, gusiiba, kwiramira no guhora dutegura kandi dukora ibyiza, kuko "kubura imikoro ni byo bibyara ingeso mbi zose" ( "Idleness is the mother of all vices" / "l’ oisiveté est la mère de tous les vices").

Ikindi gihashya Shitani ni ukutihererana ibishuko bijyana n’urumamfu ibiba, watekereza gukosa, ukagisha inama undi utari muri icyo gishuko cyangwa iryo kosa, nk’Umubyeyi, inshuti musengana, umufasha wawe, umuntu wese uguhuza n’Imana, cyangwa ugahabwa Penetensiya ku Bagatolika babatijwe igihe cyose byashobokera. Irinde amayeri ya Shitani yo gushaka guhishira ikibi no kukwihererana. Kwiyoroshya ukemera igishuko wagize, bihashya Umushukanyi.

Niba ugushwa n’ikigeragezo runaka, inzira izagufasha kukivamo, ni ukwimenya ukabona aho uhurira na cyo, ukahiririnda, ukemera gufashwa. Ikimara impungenge ku mayeri ya Shitani nuko igushuka mu buryo bumwe kubera intege nke zawe, iyo wazimenye, ushobora gufashwa, Imana ikakubohora.

-  Dusenge

Nyagasani Mana, wowe udukunda byahebuje, turagushimira ko watubibyemo urukundo igihe uturema mu ishusho yawe, ukarushaho kudukunda uducunguza Umwana wawe Yezu Kirisitu; uduhe kwerera abandi imbuto nziza z’impuhwe n’urukundo tubwirijwe na Roho wawe, duhore turi maso tuzirikana ugushaka kwawe, kugira ngo Umwanzi atatubibamo ibyo wanga. Amen!

Padiri Marcellin Dusabumuremyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .