Umufaransa Gianadda na Christus Regnat bishimiwe mu gitaramo bahuriyemo i Kigali (Amafoto)

Yanditswe na Uwiduhaye Theos
Kuya 6 Ukwakira 2019 saa 12:17
Yasuwe :
0 0

Korali Christus Regnat ikorera ivugabutumwa muri Kiliziya Gatolika, Paruwasi ya Regina Pacis, iherereye i Remera mu Mujyi wa Kigali, yakoze igitaramo yahuriyemo n’Umufaransa w’ikirangirire mu njyana y’umuziki w’umwimerere (Classique), Jean Claude Gianadda, cyanyuze benshi.

Iki gitaramo cyabereye muri Kigali Conference and Exhibition Village [Camp Kigali]mu ijoro ryo ku wa Gatandatu, tariki ya 5 Ukwkaira 2019.

Cyitabiriwe ku rwego rwo hejuru n’ab’ingeri zitandukanye barimo abana, urubyiruko, abakuru, abakecuru n’abasaza, abanyamahanga bose bashimishijwe no kwihera ijisho umuziki wa kera wanyuraga amatwi n’imitima ya benshi.

Ngoboka Cyriaque wari uyoboye iki gitaramo, niwe wabanje kujya ku rubyiniro ashyira abantu mu mwuka w’umuziki w’umwimerere.

Uyu mugabo ntabwo yamaze igihe kinini ku rubyiniro wenyine kuko yahise ahamagara abacuranzi ndetse n’abandi baririmbyi ba Korali Christus Regnat batambuka gake gake baza mu byicaro byabo imbere.

Iyi korali imaze kuririmba indirimbo imwe yahamagaye umukobwa we witwa Samantha, amufasha kubwira abantu ibigwi bya Christus Regnat n’ibindi byerekeye igitaramo.

Abaririmbyi bahise bakomeza baririmba indirimbo eshanu, bahereye ku yitwa ‘Kumbaya’ y’itsinda rya Peter, Paul na Mary; yitwa ‘Christus Regnat’ ivuga ibyiza byayo n’izindi zivanzemo iz’Ikinyarwanda.

Christus Regnat yaserutse yambaye mu buryo bubereye ijisho

Jean Claude Gianadda ni we wakurikiyeho yishimirwa mu ndirimbo ze zitandukanye zirimo ‘Trouver dans ma vie ta présence’, ‘Qu’il est formidable d’aimer’, ‘Marie tendresse dans nos vies’, ‘Magnificat’ n’izindi nyinshi.

Uyu muhanzi wari uri gufashwa na Korali ya Christus Regnat, uko yasozaga kuririmba indirimbo yakomerwaga amashyi y’urufaya ubona abitabiriye iki gitaramo banyuzwe n’umuziki we.

Yageze aho afata gitari ye yari yanditseho amazina ye, maze ayongera mu birungo by’umuziki wa Christus Regnat wari uryoheye amatwi mu buryo buhambaye.

Iki gitaramo cya Christus Regnat cyari kigamije gukusanya inkunga yo gufasha ikigo cyita ku bana bafite ubumuga babarizwa muri ‘Centre Inshuti zacu i Gahanga’ mu Murenge wa Gahanga mu Karere ka Kicukiro.

Mu bitanze harimo na Jean Claude Gianadda watanze sheki y’amayero 1500 yo gufasha Centre Inshuti Zacu ngo kuko ukwemera gukwiye guherekezwa n’ibikorwa.

Igitaramo gihumuje Musenyeri Antoine Kambanda, yahawe ijambo ashimira Jean Claude Gianadda ndetse anibutsa abantu iby’ukwezi kudasanzwe kw’iyogezabutumwa.

Ati “Wakoze Jean Claude Gianadda kuba waje muri iki gitaramo n’abandi ndabashimira cyane kuba mwaje. Ni umugisha n’ibyishimo bikomeye, sinzi niba mubizi ko turi mu kwezi kudasanzwe kw’iyogezabutumwa ku Isi yose […] ni uburyo bwo kwizihiza imyaka 100 y’ibaruwa ikomeye yanditswe na Papa Benedigito wa 15 atangaza kandi atuma intumwa kujya ku Isi.”

Yanavuze ku gikorwa cyiza cyo gufasha cyari mu byatumye iki gitaramo gitekerezwa cyane, kuko iyo umuntu abana n’ubumuga aba akwiriye gushyigikirwa.

Ati “Muzi ko iki gitaramo kigamije igikorwa cy’urukundo cya bariya bana bafite ubumuga. Iyo umuntu adafite amaguru abayafite tuba dufite inshingano zo kumugeza aho ashaka kujya, iyo adafite amaboko abayafite tuba dufite inshingano zo kuyamubera. Na bariya bana badafite amahirwe yo kubona ibyangombwa by’ubuzima ni twebwe bireba.”

Jean Claude Gianadda yaririmbaga afashwa na Korali ya Christus Regnat

Jean Claude Gianadda nk’umushyitsi mukuru muri iki gitaramo niwe wihariye igihe kinini ari kuririmba.

Uyu musaza wanyuze benshi yavutse mu 1944 mu Bufaransa [ubu afite imyaka 75]. Yabaye umwarimu wa Siyansi n’Umuyobozi w’Ishuri rya Koleji Saint Bruno i Marseille mu Bufaransa kuva 1970 kugeza 1994.

Uyu muhanzi w’umunyabigwi yashyize hanze album ya mbere mu 1974 aho yafatanyaga kuririmba no kwigisha.

Ku myaka 50 y’amavuko yasezeye umwuga w’ubwarimu afata inzira yo kuririmba nk’ubutumwa bwe bw’ibanze muri Kiliziya Gatolika. Jean Claude Gianadda nk’umuririmbyi, yakoze indirimbo nyinshi cyane zikubiye muri za album zirenga 100. Ni abahanzi bake ku Isi bafite aka gahigo.

Yaririmbye indirimbo zirimo ‘Tiens Ma Lampe Allumée’, Jésus me voici devant toi’, ‘Trouver dans ma vie Ta présence’ n’izindi. Yashyize hanze album nka ‘Qu’il est formidable d’aimer’, ‘Près de Toi Marie’ n’izindi.

Yashinze umuryango witwa ‘Association Jeunesse et Culture Saint-Bruno’. Intego nyamukuru zawo zigabanyije mu bice bibiri birimo icyo kwibanda ku guteza imbere indirimbo zisingiza Imana. Mu buzima busanzwe afasha abababaye haba mu gihugu cye kavukire n’ahandi ku Isi yose.

Korali Christus Regnat yamutumiye yashinzwe mu 2006, ivukira kuri Centre Christus i Remera mu Mujyi wa Kigali. Kuva mu 2008, ibarizwa kuri Paruwasi yitiriwe Umwamikazi w’Amahoro Regina Pacis i Remera.

Ubu ifite imizingo itandatu y’indirimbo zabo mu buryo bw’amajwi, mu gihe imaze gukora ibitaramo bikomeye bine.

Abantu bari bizihiwe no gutarama mu buryo bukomeye
Igitaramo cyahuje Umufaransa Gianadda na Christus Regnat cyabereye muri Camp Kigali
Baririmbaga bifashishije amanota yanditse
Christus Regnat yaserutse yambaye mu buryo bubereye ijisho
Claude Gianadda yageze aho afata gitari atangira no kwicurangira
Byabaye ibihe bidasanzwe byo kuramya
Jean Claude Gianadda yabanje gukurikirana igitaramo yicaye mu bitabiriye
Jean Claude Gianadda yaririmbaga afashwa na Korali ya Christus Regnat
Jean Claude Gianadda yatanze inkunga y'amayero 1500 azafasha abana bafite ubumuga
Jean Claude Gianadda yishimiwe mu ndirimbo zirimo ‘Trouver dans ma vie ta présence’, ‘Qu’il est formidable d’aimer’, ‘Marie tendresse dans nos vies’, ‘Magnificat’ n’izindi
Umuziki wacurangiwe muri iki gitaramo wari uryoheye amatwi
Korali Christus Regnat iri mu zikomeye muri Kiliziya Gatolika
Ngoboka Cyriaque (ibumoso) ni we wayoboye iki gitaramo
Musenyeri Antoine Kambanda ari mu bitabiriye igitaramo
Ibyishimo byari byabasaze babigaragaza mu mbyino bashima Imana
Abana bato bahawe umwanya wo kuririmba no kugaragaza impano bifitemo
Jean Claude yashyize hanze album ya mbere mu 1974
Umufaransa Gianadda yeretswe urukundo n'abitabiriye igitaramo yaririmbyemo i Kigali

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza