Patient Bizimana yatumiwe mu gitaramo gikomeye mu Buholandi

Yanditswe na Ishimwe Israel
Kuya 16 Gashyantare 2020 saa 12:13
Yasuwe :
0 0

Umuhanzi umaze gushinga imizi mu ndirimbo zo kuramya no guhimbaza Imana, Patient Bizimana, yatumiwe mu gitaramo azahuriramo na Fortran Bigirimana mu Buholandi.

Iki gitaramo cyiswe “Thanksgiving Celebration Live Concert” giteganyijwe kubera Kerkplein1 mu Buholandi ku wa 4-5 Mata 2020. Cyateguwe na Family Fellowship Ministries.

Patient Bizimana azagihuriramo n’umuramyi Fortran Bigirimana ukomoka mu Burundi, akaba afite ibingano binyura benshi mu bakunda umuziki uhimbaza Imana.

Bigirimana yakunzwe mu Rwanda binyuze mu ndirimbo zirimo “Ntaco Nzoba”, ‘‘Ni amahoro” n’izindi.

Amakuru agera kuri IGIHE ni uko Patient Bizimana azahaguruka mu Rwanda mu mpera za Werurwe yerekeza mu Buholandi.

Agiye gusubira gutaramira i Burayi nyuma y’amezi asaga abiri ahavuye. Ubwo aherukayo mu mwaka ushize, urugendo rwe yarusoje mu gitaramo yahuriyemo na Gentil Misigaro cyabereye mu Mujyi wa Bruxelles mu Bubiligi ku wa 31 Ukuboza 2019.

Uyu muramyi yabwiye IGIHE ko yiteguye neza kuzataramana n’abakunzi b’ibihangano bye ku Mugabane w’u Burayi.

Yagize ati “Ni ubwa mbere nzaba ndirimbye muri iki gihugu; ikindi kandi guhurirayo na Fortrand uzaba uvuye mu Bufaransa nabyo bizatuma igitaramo kirushaho kuba cyiza.”

Bizimana Patient yizeye ko igitaramo kizaba cyiza cyane ko amaze kumenyera ikirere cyaho n’uburyo abatuye muri ibi bihugu baba bafite inyota yo kuramya Imana.

Uyu muhanzi usengera muri Evangelical Restoration Church yakoreye ibitaramo mu bihugu hafi ya byose bya Afurika y’Uburasirazuba, yaririmbiye mu Burayi n’ahandi henshi. Ni we muhanzi rukumbi mu bakora umuziki uhimbaza Imana mu Rwanda umaze gukora ibitaramo bikomeye ndetse bikagaragaramo abahanzi bubatse izina.

Ategura ibitaramo ngarukamwaka bya ‘East Celebration’ byitabirwa n’ibihumbi by’abakunda umuziki we. Mu 2016 yatumiye Solly Mahlangu, umunyempano ukomeye wo muri Afurika y’Epfo, Umunya-Nigeria Osinachi Joseph [Sinach] (2018) na Alka Mbumba wiyita ’Umusazi wa Yesu’ (2019) n’abandi.

Umuziki yawutangiye akiri muto, agitangira kwiyumvamo impano yatangiye kwihatira kwiga gucuranga piano mu rusengero hanyuma bigeze mu 2007 asohora indirimbo ye bwite yitwa ‘Andyohera’ ari nabwo benshi batangiye kumubwira ko afite ijwi ryiza. Yakunzwe bihambaye mu ndirimbo nka ‘Iyo neza’, ‘Amagambo yanjye’, ‘Menye neza’, ‘Andyohera’ n’izindi.

-  Reba indirimbo “Ijambo rya nyuma” ya Patient Bizimana

Bizimana Patient ari mu bahanzi bafite igikundiro mu muziki uhimbaza Imana
Ubwo aheruka i Burayi, Patient Bizimana yahuriye na Gentil Misigaro mu gitaramo cyahuriye mu Mujyi wa Bruxelles mu Bubiligi
Patient Bizimana agiye gutaramira i Burayi nyuma y'amezi asaga abiri ahavuye
Patient Bizimana agiye guhurira na Fortran Bigirimana mu gitaramo gikomeye mu Buholandi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .