New Melody na Papi Clever basigiye ibyishimo abitabiriye igitaramo bakoreye i Huye

Yanditswe na IGIHE
Kuya 15 Gicurasi 2019 saa 09:57
Yasuwe :
0 0

Itsinda rihuriyemo abaririmbyi baturuka mu madini n’amatorero atandukanye rya New Melody n’umuhanzi Tuyizere Clever [Papi Clever] bashimishije abitabiriye igitaramo baririmbyemo cyabereye muri Kaminuza y’u Rwanda, Ishami rya Huye.

Igitaramo New Melody na Papi Clever bitabiriye cyabereye muri muri auditorium ya Kaminuza i Huye. Cyitabiriwe n’abiganjemo abanyeshuri, abakirisitu ba ADEPR.

Cyahuriranye n’umuhango wo kwita izina Itsinda riramya, rikanahimbaza Imana rikorera muri CEP (Communauté des Etudiants Pentecotistes) i Huye kuva mu myaka 13 ishize.

Igitaramo ryaherewemo izina rya ’El-Elyon’ cyabaye ku wa 12 Gicurasi 2019 mu birori byarimo kuramya kuzuye.

Si henshi mu itorero rya ADEPR usanga bene aya matsinda ahabwa umwanya munini ahubwo akenshi yifashishwa mu gutangiza amateraniro n’iminota mike mu gihe cyo gushima Imana.

Intambwe yatewe n’iri tsinda rikorera muri CEP ya UR i Huye, abenshi bayifashe nko gushinga imizi kw’amatsinda aramya.

Kinanira Pascal wabaye umuyobozi wa mbere w’iryo tsinda yasangije abitabiriye igitaramo amateka yaryo n’uburyo ryagutse.

Yavuze ko ryatangiye rigizwe n’abantu babarirwa ku ntoki na bo bifashishwaga mu gihe cy’ibiterane bikomeye gusa.

Yagize ati “Navuga ko ari njye wabaye umuyobozi wa mbere wa Worship Team, nayinjiyemo mu 2006 nkiza muri kaminuza, icyo gihe twari bake cyane. Ndibuka ko twatangiriye mu giterane cyari kigamije komora ibikomere byatewe na Jenoside yakorewe Abatutsi.”

Mu gutangira bakoreshaga indirimbo z’abandi bahanzi ndetse icyo gihe ngo bifashishije iya Uwimana Aimé yitwa “Muririmbire Uwiteka’’.

Mu giterane cyasaga n’ibirori, New Melody yaririmbye indirimbo umunani zirimo izayo zikunzwe nka Ndakwiringiye, Ibyo wakoze, Izi n’Amazina yacu na Yesu Utanga Ubuzima.

Iri tsinda ryanifashishije indirimbo yo mu gitabo yitwa ‘Murinzi we’ n’iz’andi makorali nka Ntidufite gutinya, Nzakomeza Nkwizere n’Intimba ya Rehoboth Ministries ryasoje abantu bakinyotewe no gutarama.

Bakorewe mu ngata n’umuhanzi uri mu bakunzwe cyane muri ADEPR, Papi Clever, wanyuze benshi mu ndirimbo ziganjemo n’izo mu gitabo yasubiyemo.

Nubwo ari ubwa mbere yari ataramiye muri kaminuza i Huye, yishimiwe n’abitabiriye iki giterane banyuzagamo bakagaragaza amarangamutima.

Umuhanzi Sinzabyibagirwa Jean de Dieu uzwi nka Jado Sinza akanaba umuririmbyi muri New Melody yavuze ko banejejwe no gutaramana n’urubyiruko rwo muri kaminuza.

Yagize ati “Turashimira Imana yabanye natwe twe turi bamwe mu biyemeje gutaga ubutumwa bwiza ahantu hose. Ubutumwa Imana yari yaduhaye twarabutanze, ubutumwa nyamukuru ni ukugaragaza ishusho ya Kirisitu no kumubera inshuti tukabibwira abantu binyuze mu ndirimbo.”

Iri tsinda ryahawe izina rya El-Elyon rikorera mu muryango w’abanyeshuri b’Abapantekote biga muri Kaminuza y’u Rwanda, Ishami rya Huye.

Uyu muryango wavutse mu 1998 wari uhuje abarokore bavuye mu duce dutandukanye tw’igihugu bari baje kwiga mu yari Kaminuza Nkuru y’u Rwanda.

Itsinda riramya, rikanahimbaza Imana rikorera muri CEP (Communauté des Etudiants Pentecotistes) muri Kaminuza y'u Rwanda, i Huye ryahawe izina rya 'El-Elyon' kuva mu myaka 13 rishinzwe
Iri tsinda ryanaririmbye indirimbo zo mu gitabo zishimiwe cyane
Umuhanzi Bosco Nshuti yayoboye bagenzi be baririmbana ubwo yateraga indirimbo
Bosco Nshuti yamamaye mu muziki uhimbaza Imana binyuze mu ndirimbo ze zirimo 'Ibyo ntunze'
Papi Clever uri mu banyempano mu muziki w’indirimbo zo kuramya no guhimbaza Imana yeretswe urukundo muri iki gitaramo
Umuvugabutumwa Nzaramba Jean Paul ni we wabwirije ijambo ry'Imana
Neema Marie Jeanne uyobora New Melody yari yaherekejwe n'umugabo we Ndayambaje Aimé

Amafoto: Kimana Liana


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza