Korali Iriba y’i Huye igiye kwizihiza isabukuru y’imyaka 25 imaze mu ivugabutumwa

Yanditswe na Ishimwe Israel
Kuya 8 Gashyantare 2020 saa 12:05
Yasuwe :
0 0

Korali Iriba ikorera umurimo w’ivugabutumwa ry’indirimbo muri ADEPR Paruwasi ya Taba mu Karere ka Huye mu Ntara y’Amajyepfo, yinjiye mu bikorwa by’urukundo bigamije gufasha abatishoboye mu myiteguro yo kwizihiza isabukuru y’imyaka 25 imaze.

Iyi korali yashinzwe ku wa 15 Gashyantare 1995, yatangijwe n’abantu 18. Izina ryayo ryamenyekanye cyane mu ndirimbo zirimo ‘‘Nta kibasha’’, ‘‘Witinya’’, ‘‘Turiho ku bw’ubuntu’’, ‘‘Urakomeye’’ na ‘‘Icyampa’’.

Mu kwizihiza isabukuru y’imyaka 25 imaze ishinzwe, Korali Iriba yatangije ibikorwa byagutse byiswe “IribaWeek” bibanziriza ibyo birori biteganyijwe ku wa 16 Gashyantare 2020.

Korali Iriba yinjiye mu cyumweru cy’ibikorwa bibimburira isabukuru y’imyaka 25 biteganyijwe ku 3-9 Gashyantare 2020. Ni icyumweru cyateguwemo ibikorwa byo kubakira ubwiherero imiryango itanu itishoboye n’ibindi bikorwa by’urukundo.

Abajijwe impamvu bahisemo kubakira abatishoboye, Umuyobozi wa Korali Iriba, Mukasine Jeanne D’arc, yavuze ko bifuje kuvuga ubutumwa mu bikorwa.

Yagize ati “Twahisemo noneho kuvuga ubutumwa mu bikorwa kuko binazamura imibereho y’abantu, iki gikorwa kizakomeza n’ibindi twateguye.’’

Biteganyijwe ko ku wa 15 Gashyantare, Korali Iriba izagira umwiherero wo gushima Imana, naho ku wa 16 Gashyantare 2020 kuva saa Munani, ikore igitaramo cy’amashimwe akubiye muri Zaburi ya 107, kizabera ku rusengero rwa ADEPR Taba mu Karere ka Huye.

Abazacyitabira bazataramirwa na Korali Iriba ifatanyije na Korali Itabaza. Umuvugabutumwa uzakibwirizamo ni Umuvugizi wa ADEPR, Karuranga Ephrem.

Mu myaka 25, Korali Iriba ishima buri wese wagize uruhare mu kugira ngo umurimo ukomeze gutera imbere.

Korali Iriba igizwe n’abarenga 130 bari mu byiciro bitandukanye biganjemo abatuye mu duce two mu Mujyi wa Huye turimo Matyazo no ku Itaba n’abakorera mu bindi bice by’igihugu.

Mu myaka 25 imaze mu ivugabutumwa, Korali Iriba yashyize hanze album enye z’amajwi n’eshatu z’amashusho.

Korali Iriba yo muri ADEPR Taba iri muri Korali zakunzwe cyane kuva mu myaka yo hambere
Abaririmbyi ba Korali Iriba mu bikorwa byo kubakira abatishoboye
"Iriba Week" ni icyumweru kigamije gukora ibikorwa by'urukundo
Korali Iriba y’i Huye igiye kwizihiza isabukuru y’imyaka 25 imaze ikora ivugabutumwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .