Igiterane ‘One God, One Day, One Africa’ cyatanze umusaruro urenze uwo twitegaga- Pasiteri Baho

Yanditswe na IGIHE
Kuya 17 Ugushyingo 2020 saa 07:38
Yasuwe :
0 0

Igiterane mpuzamahanga cy’ivugabutumwa ‘One God, One day, One Africa’ cyabereye mu bihugu byose bya Afurika mu minsi itatu cyasojwe hishimirwa umusaruro cyatanze haba mu guhembura abantu no kubasangiza ubutumwa bwiza.

Umuyobozi wa Baho Global Mission, wari no mu bateguye iki giterane, Rev. Pasiteri Uwihirwe Isaïe Baho, yabwiye IGIHE ko ‘One God, One Day, One Africa’ yatanze umusaruro urenze uwari witezwe.

Iki giterane cyabaye hifashishijwe ikoranabuhanga, kinyuzwa ku mbuga nkoranyambaga no ku maradio mu bihugu nk’u Rwanda bitarakomorera ababituye guhurira hamwe ari benshi mu kwirinda ikwirakwira rya Coronavirus.

Mu bindi bihugu ho iki giterane cyabereye mu ruhame, abahanzi baratarama, abavugabutumwa bagabura ijambo ry’Imana.

‘One God, One day, One Africa’ yari ifite ubutumwa bumwe bwo ‘kwishimira Afurika’ ndetse n’intego imwe yo kwamamaza Kirisitu no guhindura abantu bakabohoka.

Rev. Pasiteri Uwihirwe Isaïe Baho avuga ko n’ubwo iki giterane cyabaye mu bihe bigoye bya Coronavirus, bishimiye ko cyatanze umusaruro.

Yagize ati “Turashima Imana kuko igiterane twari dufite cyagenze neza, kuko cyatanze umusaruro twari twiteze ndetse no kurenzaho.”

Ubusanzwe iki giterane cyagombaga kuba abantu bagahurira ahantu hamwe imbonankubone ariko COVID-19 yabikomye mu nkokora.

Rev. Pasiteri Uwihirwe Isaïe avuga ko iyo ariyo mpamvu abantu babikurikiraniye ku mbuga nkoranyambaga na Radio.

Ati “Cyari cyarateguwe ko kizaba imbonankubone (live) turi kuri stade abantu basabana ariko ntibyakunze kubera kwirinda COVID-19. Cyari igiterane kireba Afurika yose. Buri gihugu cyari gifite igiterane. Ubutumwa bwari bumwe hose bwo kwishimira Afurika.”

Mu Rwanda iki giterane cyatangiye ku wa Gatanu tariki 13 gisozwa ku wa 15 Ugushyingo 2020. Cyateguwe mu ruhererekane rw’ibisanzwe bikorwa na Ev. Jennifer Wilde uyobora Wilde for Jesus Ministries ari nawe wagize iyerekwa ryabyo kuri Afurika. Uyu muvugabutumwa ubarizwa muri Amerika ni we wigishije ijambo ry’Imana mu bihugu byose bya Afurika.

Iki giterane cyatumiwemo kandi abavugabutumwa batandukanye bafite amazina akomeye barimo Brian Fleming wo muri 100 Souls Movement, Evangeliste Emmanuel Kwizera usengera muri Restoration Church.

Abahanzi basusurukije abagikurikiranye barimo Umuramyi Kanuma Damascène, Aimé Uwimana, Aline Gahongayire na Sawuti Worship.

Si ubwa mbere Ev. Jennifer Wilde akoreye igiterane mu Rwanda kuko mu myaka yatambutse yakoreye ibiterane mu bice bitandukanye nka Nyagatare, Kigali, Kirehe no mu Burengerazuba mu duce twa Gisenyi na Rusizi.

Umuyobozi wa Baho Global Mission, wari no mu bateguye iki giterane, Rev. Pasiteri Uwihirwe Isaïe Baho, yavuze ko ‘One God, One Day, One Africa’ yatanze umusaruro urenze uwari witezwe
Ev. Jennifer Wilde uyobora Wilde for Jesus Ministries ni we wigishije muri iki gitaramo
Aimé Uwimana ari mu bahanzi baririmbye muri iki giterane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .