Cardinal Kambanda yasomye misa ye ya mbere, ahishura ijambo yabwiwe na Papa Benedigito (Video)

Yanditswe na Rabbi Malo Umucunguzi
Kuya 29 Ugushyingo 2020 saa 05:45
Yasuwe :
0 0

Arkiyepiskopi wa Kigali Cardinal Antoine Kambanda, yasomye Misa ya mbere yabaye mu Kinyarwanda kuri iki Cyumweru, nyuma yo guhabwa inshingano zikomeye muri Kiliziya Gatolika.

Kuri uyu wa Gatandatu nibwo Kambanda yagizwe Cardinal, mu muhango wayobowe na Papa Francis, i Roma.

Kuri iki Cyumweru yasomye Misa ya mbere, yabereye muri Basilica di Santa Maria i Trastevere, yitabirwa n’abarimo abanyarwanda batuye mu Butaliyani. Yabaye hubahirizwa amabwiriza yo kwirinda icyorezo cya COVID-19, aho abayitabiriye bose bari bambaye udupfukamunwa.

Yabwiye abakirisitu ko ari ibyishimo bikomeye, kuba abashije gutura igitambo cy’ukarisitiya ari kumwe nabo, muri ibi bihe by’icyorezo.

Yagize ati "Ni ibyishimo kandi ndagira ngo nshimire Imana aka kanya n’aha hantu twabonye, kuko ni bake cyane muri mwebwe kubera ibi bihe turimo mwashoboye kuza muri iriya mihango ejo na misa y’uyu munsi. Kubona rero tubonye aka kanya ngo twifatanye gushimira Imana, ndashimira Imana cyane gutura iki gitambo cy’Ukarisitiya."

"Ni igitambo cya mbere ntuye cy’Abanyarwanda, mu Kinyarwanda, nyuma yo guhabwa izi nshingano. Kera iyo twatahaga abasaza baratubazaga bati ‘u Rwanda rw’iyo baraho?’ Uyu munsi rero ni u Rwanda rw’ino, ndagira ngo mbashimire, kandi mucyo twerekeze imitima yacu kuri Nyagasani, tumushimire iyi ngabire ikomeye yahaye Kiliziya y’u Rwanda."

Yahishuye ijambo yabwiwe na Papa Benedigito XVI

Musenyeri Kambanda yavuze ko nyuma yo guhabwa ubu Cardinal, abari bamaze guhabwa izo nshingano bahuye na Papa Benedigito XVI, bajyanye na Papa Francis mu nyubako ye yo hejuru.

Yakomeje ati "Twicarana na we, buri umwe akaza akamumubwira, ariko natunguwe n’uko, arakuze cyane, kuvuga biramugora, ariko aracyafite mu mutwe, afite ukwibuka guteye ubwoba. Kuko byarantunguye bamubwiye ko ndi cardinal wo mu Rwanda, arambwira ati ‘u Rwanda ni igihugu cyababaye cyane, ndetse ari nko kubwira Papa Francisco, amushimira ko yibutse igihugu cy’u Rwanda kuko ijwi rya Kiliziya y’u Rwanda rishobora kujya ryumvikana noneho no muri Kiliziya ku Isi."

Yavuze ko mu gihe bishimira iyi ntambwe nshya yatewe, Abanyarwanda bakwiye no gushimira Imana ndetse bagashima na Papa Francis wibutse Kiliziya yo mu Rwanda, ubu ikaba ishinze imizi.

Mu gitambo cya Misa, Musenyeri Kambanda yashishikarije Abanyarwanda kurushaho kwiyegereza Imana, kugira ngo umunsi izaza gutwara abana bayo izasange bose biteguye. Yatanze urugero ku buryo Abanyarwanda bigeze gutera Imana umugongo, bakibagirwa ko bose ari abavandimwe, bagahemukira abavandimwe babo muri Jenoside yakorewe Abatutsi mu 1994.

Yagaragaje ko muri ibi bihe abantu bakwiriye kurushaho kwegera Imana, bagahera mu ngo, cyane ko kubera ko COVID-19, abantu benshi batemerewe guhurira hamwe.

Ni misa yitabiriwe na Musenyeri Vincent Harolimana wa Diyosezi ya Ruhengeri wanahawe ubupadiri na Papa Yohani Pawulo II, ku munsi umwe na Musenyeri Kambanda. Abandi barimo Musenyeri Anaclet Mwumvaneza, umushumba wa wa Diyosezi ya Nyundo.

Igitambo cya Misa cyakurikiwe n'abanyarwanda batandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .