Alarm Ministries bakoze igitaramo gikomeye cyo kwizihiza isabukuru y’imyaka 20 bamaze mu murimo

Yanditswe na Uwiduhaye Theos
Kuya 2 Nzeri 2019 saa 10:58
Yasuwe :
0 0

Itsinda rikora ivugabutumwa rinyuze mu ndirimbo zo kuramya Imana rya Alarm Ministries riri no mu yashinzwe bwa mbere mu Rwanda, ryishimiwe cyane mu gitaramo ryateguye cyo guhimbaza Imana ryizihirizamo isabukuru y’imyaka 20 rimaze rishinzwe.

Ni igitaramo cyabaye kuri uyu wa 1 Nzeri 2019. Ibi birori byitabiriwe mu buryo bukomeye n’abakunzi b’iri tsinda bazwi barimo Hon Edouard Bamporiki, Prof Bizoza, Gen. Mupenzi, Pastor Angelique Nyinawingeri umugore wa Apostle Dr Paul Gitwaza, Rev Aaron Ruhimbya, Bishop Dr Masengo Fidèle n’umufasha we, Bishop Dr Gahungu Bunini n’abandi.

Iki gitaramo cyiswe “20 Years Anniversary Celebration Live Concert”, cyabereye mu ihema rya Kigali Cultural and Exhibition Village [KCEV] hahoze hitwa Camp Kigali.

Iri tsinda ryabonye izuba muri Mutarama 1999, rigenda ryaguka gake gake ku buryo riri mu matsinda aririmbira Imana amaze gushinga imizi mu mitima ya benshi mu Rwanda.

Iri tsinda ryari ryateguye igitaramo cyo kwishimira imyaka 20 bamaze bakora umurimo ukomeye wo kuramya no guhimbaza Imana no gukora ibihangano bihembura benshi mu mwuka.

Alarm Ministries y’abaririmbyi 61, yatangijwe na bamwe bahoze baririmba muri Rehoboth Ministries yahoze muri Restoration church ikaza kutumvikana n’iri torero ari nabwo yasohokagamo.

Mu gutangira yari igizwe n’abantu batarenga batandatu bagize umuhamagaro wo kwagura ivugabutumwa; banyuze mu bihe bikomeye birimo kwangwa mu matorero ariko bagenda batera imbere.

Kuri ubu umuryango wa Alarm Ministries ubarizwamo abantu basaga 100 barimo abaririmba n’abakora ibindi bikorwa bitandukanye mu iterambere ryawo.

Mu myaka 20 ishize, Alarm Ministries yakoze ibikorwa by’ivugabutumwa bitandukanye mu Rwanda no mu mahanga. Yahawe ibihembo bitandukanye birimo Salax Awards 2013 n’ibya Groove Awards mu 2013 na 2015.

Mu bindi bikorwa bifatika Alarm Ministries yatanze umusanzu wo gufatanya na Leta muri gahunda zayo aho mu 2013 yatanze mituweli mu Karere ka Gisagara, igurira matola Abanyarwanda bari birukanwe muri Tanzania yitabira n’ibindi bikorwa birimo n’umuganda rusange.

Mu gitaramo yakoze kuri iki Cyumweru Mike Karangwa ni we wari umushyushyarugamba

Iri tsinda ryaririmbye indirimbo 37 zirimo "Hashimwe", "Yasatuye" , "Hariho impamvu", "Mutima wanjye Himbaza Imana", "Turakomeye" n’izindi nyinshi zatumye benshi bajya mu mwuka.

Hatanzwe imidari ku babaye hafi iri tsinda

Igitaramo kirimbanyije, abagize Alarm Ministries basa nk’abafashe akaruhuko, hajyaho umwanya wo gutanga ibihembo n’imidari ku bantu b’indashyikirwa batumye iri tsinda rigera kure.

Mu bashimwe harimo Mbanza Chance witanze mu buryo bwose bushoboka kuko na mbere y’uko ajya kwibaruka yari yabanje kubafasha mu gusubiramo bamushimira ku bw’umuhate we .

Alarm Ministries yashimye kandi umubyeyi wabahaye icyumba cy’amasengesho ari we Mama Cereri.

Maniraguha Fidèle bavuze ko ari we ugera ahabereye igitaramo mbere akabaha ari na we uhava nyuma, batanze urugero rw’igitaramo gishobora kubera mu ntara bagatangazwa n’uburyo akoramo umurimo w’Imana atitangiriye itama.

Bambitse imidali abayifashishije mu rugendo rwayo rw’Imyaka 20 barimo Mazeze Charles, Rutagengwa, Mbanzanyuma Alex, Pasiteri Mbanza Ivan, Nyirashikira Béatrice, Pasiteri Nkiriho[Umudali wahawe umuhagarariye], Pasiteri Mwungura [Hambitswe umudali umuhagarariye], Nyirankamirwa Alice[Yaratabarutse], Pasiteri Rugabo John [wahawe umuhagarariye], Rumanzi Jonathan, Gikundiro Jules, Bitanga Chantal, Pasiteri Ruganza James [Atuye muri Canada], Mama Christian, Papa Alarm, ndetse n’umudali w’umuntu utazwi wahawe uhagarariye iri tsinda ngo azawugeze ku bandi bose bazakora iby’ubutwari.

Pastor Ruhimbya Aaron wagabuye ijambo ry’Imana yigishije ku mugore w’Umusamariyakazi uvugwa muri Bibiliya, avuga ko ari umugore waranzwe n’umuruho mu buzima bwe hafi ya bwose.

Yavuze ko imyaka 20 ishize Alarm Ministries imaze ivutse yanyuze mu bikomeye ariko yazanye impinduramatwara no kurushaho kureba imbere mu murimo wo kuramya Imana.

Iki gitaramo cyatangiye saa cyenda z’amanywa kirangira saa tatu zirengaho iminota.

Alarm Minisitries baririmbye bashima Imana ibyo yabakoreye
Alarm Ministries bamaze imyaka 20 bakora umurimo w'Imana
Bamporiki Edouard n'umufasha we bitabiriye iki gitaramo
Gaby Kamanzi yari yagiye gushyigikira Alarm Ministries
Ibikombe byari byateguriwe abafashije Alarm Ministries mu myaka imaze
Alarm Minisitries yashimiye abayibaye hafi mu myaka 20 imaze
Inkoramutima za Alarm Minisitries zahawe ibikombe
Igitaramo cyo kwizihiza isabukuru ya Alarm Ministries cyitabiriwe n'abantu benshi
Mike Karangwa yari mu gitaramo cya Alarm Ministiries
Umuramyi Patient Bizimana yagiye mu mwuka

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza