00:00:00 IGIHE NETWORK KN KINYARWANDA EN ENGLISH FR FRANCAIS

Abaramyi b’amazina akomeye bahurijwe mu gitaramo cy’amashimwe y’umuryango

Yanditswe na Ishimwe Israel
Kuya 22 Ukuboza 2020 saa 10:36
Yasuwe :
0 0

Umuvugabutumwa akaba n’umwanditsi w’ibitabo, Jackie M Nirere n’umugabo we Nirere James bateguye igitaramo cy’amashimwe y’umuryango, cyatumiwemo abahanzi barimo Arsene Tuyi, Aimé Uwimana, Ben na Chance.

Iki gitaramo cyiswe ‘Family Thanksgiving Celebration’, cyateguwe na Irere Network ya Jackie M Nirere.

Biteganyijwe ko kizaba kuri Noheli ku wa 25 Ukuboza 2020, aho kizatambuka kuri Televiziyo KC2, Authentic TV no kuri Shene ya YouTube ya Irere TV, guhera saa Mbili n’igice z’umugoroba.

‘Family Thanksgiving Celebration’ ni igikorwa cyateguwe by’umwihariko hagamijwe gutanga amashimwe y’umuryango.

Cyatumiwemo abahanzi bafite igikundiro mu muziki uhimbaza Imana barimo Aimé Uwimana, Ben na Chance, Arsene Tuyi na J360 Band. Umuvugabutumwa uzakibwirizamo ni Pasiteri Rutayisire Antoine usanzwe amenyerewe mu nyigisho z’umuryango.

Jackie Mukabaramba Nirere yabwiye IGIHE ko iki gitaramo kigamije gushima Imana ku burinzi bwayo mu bihe byahise.

Yakomeje ati “Ni igitaramo kigamije gushima Imana. Kubera uburyo twatunguwe na COVID-19 ndetse n’ibindi bitari byiza bijya bidutungura mu buzima bw’umuryango twifuje ko turebera hamwe ese umuntu yabona icyo ashima mu bihe nk’ibyo. Kirahari rero kandi ayo mashimwe ni yo dushaka gusangira n’abandi.’’

Jackie Mukabaramba Nirere n’umugabo we bashinze Irere Network inafite ‘Irere TV’ ifatwa nk’umuyoboro unyuzwaho ibiganiro byubaka umuryango Nyarwanda ndetse n’ivugabutumwa.

Nirere Mukabaramba Jackie ni we wanditse igitabo cyakunzwe yise ‘Izahabu ihishe mu muryango’. Asanzwe ari Umuyobozi w’Umuryango wa Gikirisitu utanga Ubujyanama n’ubundi bufasha mu ngo zibanye mu makimbirane n’abana bagizweho ingaruka n’ubwo buzima wa The River Ministries.

Nirere w’abana bane afite intego yo gukora ibiganiro bigamije kubaka no gukomeza umuryango n’ivugabutumwa. Mu biganiro bye atumira abantu batandukanye bagasangiza abandi ubutumwa n’ubuhamya bwubaka buganisha ku iterambere ry’umwuka, ubugingo n’umubiri.

Jackie M Nirere ni Umuvugabutumwa akaba n’umwanditsi w’ibitabo, yanditse ibirimo ico yise ‘Izahabu ihishe mu muryango’
James Nirere n'umugore we Jackie M Nirere bafatanya umurimo wo gutanga ubujyanama bwo kubaka ingo
Abaramyi b’amazina akomeye bahurijwe mu gitaramo cy’amashimwe y’umuryango giteganyijwe kuri Noheli

James Nirere n’umugore we Jackie M Nirere basanzwe bategura ibikorwa bigamije kubaka umuryango Nyarwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .