00:00:00 IGIHE NETWORK KN KINYARWANDA EN ENGLISH FR FRANCAIS

Yagize umwe mu bahanzi b’imena bigizwemo uruhare na Kayibanda, amafaranga ya Habyarimana yateje umunabi: Ibyo utamenye kuri Chorale de Kigali

Yanditswe na Uwiduhaye Theos
Kuya 20 Nyakanga 2021 saa 07:23
Yasuwe :
0 0

Uwakumva amajwi yungikanya bamwe batera muri Soprano abandi bakabakira hirya aho muri Tenor na Bass, ashobora kwibwira ko Chorale de Kigali dukunda, idususurutsa bigatinda mu bitaramo bya Noheli, yatangiriye mu nzira iharuye iyigeza ku bwamamare.

Abazi umuziki uzwi nka Classique, bazakubwira ko ari igipimo cy’umuhanga mu majwi, bikaba akarusho noneho iyo umuntu ari kuririmba indirimbo za kera z’intiti.

Peppino Turco kugeza ubu afatwa nk’umwe mu bahanga mu myandikire y’indirimbo. Uyu mugabo w’i Naples mu Butaliyani mu 1880 yanditse indirimbo iri mu zikomeye kuririmbwa, inakundwa na benshi ayita ‘Funiculì, Funiculà’.

Kari akaririmbo k’urukundo yari yandikiye umukobwa witwa Anna. Yabaye indirimbo yakunzwe cyane mu kinyejana cya 19 ndetse ni na yo yagurishijwe cyane mu 1881.

Abahanga nka Luciano Pavarotti na Andrea Bocelli ni bamwe mu batumye yamamara. Ariko mu 2018 mu Rwanda yakunzwe byisumbuyeho kubera Chorale de Kigali. Kumva indirimbo nk’iyi mu majwi y’Abanyarwanda, byerekana ubuhanga bw’abagize iyi korali.

Ni korali ifite amateka muri Kiliziya Gatolika no mu Rwanda rwose muri rusange, yarogeye guhera ku ngoma ya Perezida Grégoire Kayibanda ari nawe wahamagaye Saulve Iyamuremye nk’umunyamuziki ukomeye aza i Kigali gufatanya n’abari bamaze kuyishinga. Kuva icyo gihe yatangiye gukomera ityo kugeza n’uyu munsi aho itegura igitaramo abantu bakabura aho bakwirwa.

Ni mukuru w’izindi muri Kiliziya Gatolika ndetse yakoze amateka muri muzika ikoranye ubuhanga kuva mu 1966 yiharira gukundwa kugeza aho yatumirwaga mu birori bikomeye ikaririmba mu byateguwe na Perezidansi byose.

Yatangijwe n’abahanga muri muzika bari barabyize mu Iseminari barimo nka Mbarushimana Léon, Karangwa Claver, Gatarayiha Jean Nepomuscène, Nkurikiyumukiza Fidèle, Karega Callixte, Paulin Muswahili na Saulve Iyamuremye wahageze ikimara gushingwa.

Ngirumpatse ni umwe mu bantu bazwi cyane binjiye muri Chorale de Kigali mu ba mbere, yari umuhanga mu kuririmba n’ubwo inganzo nyobokamana yari yarimakaje yaje gucubira mu 1994 akijandika muri Jenoside yakorewe Abatutsi ari na byo byatumye mu 2011 akatirwa gufungwa burundu nyuma yo guhamywa ibyaha bya Jenoside.

Uyu mugabo wabaye Perezida wa MRND yahimbye indirimbo zizwi muri Kiliziya Gatolika n’izindi zitari izo mu kiliziya nka “Ruhanga rwihunze uburanga” na “Mushumba Ushagawe”.

Umva "Mushumba ushagawe" yahimbwe na Ngirumpatse. Aha yaririmbwaga na Chorale de Kigali

Chorale de Kigali imaze kuba intagereranywa mu muziki w’abahanga wanditse mu buryo bw’amanota, ndetse ibi bishimangirwa n’ubwitabire bwagiye bwiganza mu bitaramo yagiye ikora bikitabirwa ku rwego ruhambaye.

Perezida Kayibanda yagize uruhare mu gukomera kwa Chorale de Kigali

Iyi korali yatangiriye kuri Sainte Famille. Umwe mu bayigiyemo kera ni Fidèle
Nkurikiyumukiza. Aherutse gutangaza ko Perezida Kayibanda ari we wahamagaje Saulve Iyamuremye nk’umuntu wari uzi umuziki bityo bigatuma Chorale de Kigali itangirana ibihangano byiza byakunzwe n’abatari bake.

Ati “Kayibanda yarahiriye kuyobora igihugu mu 1962. Yahamagaye Saulve Iyamuremye kubera ko bari bariganye mu iseminari, ashaka ko aza akigisha umuziki muri Kigali. Bari baziranye cyane aramutinyura amuzana mu murwa.”

Iyi korali bivugwa ko ubwo yatangiraga itari igamije guhangana na Orchestre Abanyuramatwi yari ikunzwe cyane mu gihugu kuko yo yari yarimakaje politiki gusa.

Abazi iby’ishingwa ryayo bavuga ko Ngirumpatse yiyunze ku bandi nyuma nubwo ari mu nkingi za mwamba zayo. Impamvu ni uko yo yatangiriye i Kigali kandi icyo gihe ngo yabaga i Huye aho yari afite indi korali.

Abagore babanje guhezwa

Itangira abari bayigize baririmbaga mu Kilatini ndetse by’umwihariko ikaba yari igizwe n’abagabo gusa.

Uwimana Jean Marie Vianney uri mu bayibayemo kera, yavuze ko impamvu abagore bari barahejwe ari uko aho bigaga nta byuma bya muzika byahabaga ku buryo baba bazi umuziki.

Ati “Abagore ntabwo bashoboraga kuzamo kuko mu mashuri yabo ntabwo bigaga gucuranga.”

Mu 1987 ni bwo abari n’abategarugori ba mbere binjiyemo nyuma y’imyaka myinshi yari ishize iririmbwamo n’abagabo gusa.

Habyarimana yayishyize ku ibere, icikamo ibice kubera amafaranga ye

Amafaranga korali yahawe yaririmbye muri Misa y’Isabukuru y’imyaka 50 y’amavuko ya Habyarimana na 15 yari amaze ku butegetsi ari mu byatumye bacikamo kabiri.

Uwimana Jean Marie Vianney avuga ko Chorale de Kigali yagiye ihimba ibihangano bitandukanye ku ngoma ya Habyarimana ndetse yanamuririmbiye amaze gutorerwa kuyobora u Rwanda.

Ati “Hari indirimbo nibuka y’Inteko Ishinga Amategeko yaririmbwe ku gihe cya Kayibanda mu 1971. Habyarimana afata ubutegetsi indirimbo ya mbere yasohotse imusingiza yaririmbwe na Chorale de Kigali, Matayo Ngirumpatse ni we wayihimbye. Habyarimana akimara gufata ubutegetsi yazengurutse igihugu cyose, rero indirimbo twari twamuhimbiye yitwa ‘Rutikanga Impuruza’. Twayiririmbye mu 1973 i Nyamirambo kuri stade, yavugishije benshi.”

Abari bagize Chorale de Kigali baririmbye mu misa irimo Perezida Habyarimana n’abandi bayobozi bakuru mu gihugu ariko nyuma yayo hakurikiraho kutumvikana hagati yabo.

Uwimana ati “Habyarimana yaduhaye amafaranga miliyoni imwe y’amanyarwanda nk’ishimwe ry’uko twari twamuririmbiye Misa ku isabukuru ye, tugura ibyuma andi arasaguka. Perezida yari yadutumiye mu Misa nyuma aza no kuduhamagara ngo tujye gusangira na we, Ngirumpatse Matayo arabyanga atatubwiye impamvu, ntiyanatugurira. Ni uko byatangiye ngiye kumva numva ngo bacitsemo kabiri. Bamwe bakurikiye Matayo abandi bajya mu Ndahemuka.”

Ati “Ayo mafaranga ni yo bavuga ko yazanye umwuka mubi ariko hari utundi tuntu twari tubiri inyuma. Chorale de Kigali imaze gucikamo kabiri bamwe bakajya gushinga Indahemuka, hinjiyemo abandi bashya bavuye mu iseminari, muri Kaminuza y’u Rwanda n’ahandi. Hari mu 1987. Abagize Indahemuka bashatse gutwara izina rya Chorale de Kigali ariko ntibyabakundira.”

Iyo misa yari iy’isabukuru y’imyaka 50 Habyarimana yari amaze avutse ndetse n’imyaka 15 yari amaze ku butegetsi, yabereye St Michel, yitabirwa n’abasenyeri, abapadiri, ababikira n’abadipolomate bari bakikije Habyarimana n’umuryango we.

Uretse iyo Misa, hari izindi baririmbyemo zirimo iy’isabukuru y’imyaka 75 y’amavuko ya Musenyeri Bigirumwami Aloys, imyaka 50 y’ubusaseridoti na 25 y’ubwepiskopi yabereye ku Nyundo mu 1979, bakaba barahakuye ibihumbi 160 Frw. Iyo Misa ni na yo baririmbyemo indirimbo ‘‘Mushumba Ushagawe’’ yakunzwe cyane.

Baririmbye kandi mu Misa yo gutaha inzu ya Protais Zigiranyirazo yabereye i Rambura ndetse n’iyo gutaha ikiraro cya Rusumo icyo gihe hari Perezida Kayibanda na Nyerere.

Izi misa zose akenshi abagize Chorale de Kigali ntabwo bamenyaga ingano y’amafaranga bahawe kuko Matayo Ngirumpatse waziteguraga yabigiraga ibanga bigatuma bamwe batangira kumwishisha bavuga ko yayigize akarima ke.

Uretse amafaranga, Chorale de Kigali yabayemo gupingana cyane aho abantu b’i Nyamirambo berekanaga ko ari bo bazi umuziki, abo ku Muhima bikabarakaza kuko babifataga nk’agasuzuguro.

Gasasira Stanislas we avuga ko byakomeje kugenda bidogera kugeza aho uwabikaga amafaranga yatangiye kujya ayasangira mu tubari na bagenzi be i Nyamirambo ibintu na byo byakomeje gukuza urwicyekwe rwaganishije ku gucikamo kabiri kwa korali.

Ati “ Uwabikaga amafaranga witwaga Nzajyibwami. Hari imyaka yari igenewe komite, noneho imyaka irinda iba irindwi atarongera kurekura ubuyobozi abantu bati ‘ariko uriya muntu duha amafaranga agashyira mu mufuka, ab’i Nyamirambo bakajya kuyanywera twebwe ku Muhima ntitumenye aho yarengeye n’umusanzu dutanga?’”

Aba basaza bemeza ko uretse indirimbo baririmbaga ziri mu murongo wa Leta nta kindi kidasanzwe bari bahuriyeho na Kayibanda cyangwa Habyarimana.

Nyuma ya Jenoside, Chorale de Kigali yavuzwemo amakimbirane yanatumye yongera gucikamo ibice bibiri.

Chorale de Kigali yaririmbye Misa ubwo Papa yazaga mu Rwanda

Muri Nzeri 1990 ubwo Papa Yohani Pawulo II yazaga mu Rwanda iyi korali yari iri mu zikunzwe ni imwe mu zaririmbye. Uwimana Jean Marie Vianney avuga ko kugira ngo batoranywe byaturutse ku nama yahuje Abepisikopi.

Ati “Gutoranywa ngo turirimbe mu 1990, ubwo Papa yazaga mu Rwanda byaturutse ku nama y’Abepisikopi ubwo yateguraga urugendo rwa Papa mu Rwanda noneho baza kuvuga ko n’andi makorali azaririmba ariko iyoboye ari Chorale de Kigali.”

Ubu Chorale de Kigali yatangiye gushyira hanze filime mbarankuru ivuga ku mateka yayo. Ni mu mushinga mugari wari umaze imyaka irenga ibiri ariko kuwushyira mu bikorwa bikagenda bigorana kubera ubushobozi bwasabwaga kugira ngo ikorwe.

Iyi filime mbarankuru ifite uruhererekane rw’ibice bine ariko bishobora kwiyongera bitewe n’uko izaba ibona niba ibyo yifuzaga byose kubwira abantu yarabimazeyo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .