Video: Yaririmbiye umugore we yifashishije indirimbo ya Westlife! Ibyaranze ubukwe bwa Papi Clever

Yanditswe na Ishimwe Israel
Kuya 9 Ukuboza 2019 saa 10:46
Yasuwe :
0 0

Umuramyi Tuyizere Papi Clever yarushinze na Ingabire Dorcas bamaze igihe bakundana mu birori byasusurukijwe n’abahanzi bahimbaza Imana bakunzwe mu Rwanda.

Papi Clever na Ingabire bahamije isezerano ryo kubana akaramata imbere y’Imana ku wa 7 Ukuboza 2019 muri Dove Hotel ku Gisozi.

Uyu muhanzi akimara kwambika umugore we impeta igaragaza ikimenyetso cyo kunga ubumwe mu buzima asigaje ku Isi, yahise amuririmbira agace gato k’indirimbo ya Whitney Houston “I Will Always Love You”.

Yamwongoreye amagambo y’urukundo ati “Ndagukunda, nezezwa nuko wakwishima kandi nzahora mparanira ko wishima. Bakeka ko ngukunda ariko ntibabizi kukurusha. Guhera uyu munsi nzahora mparanira ibyiza kuri wowe. Yesu azabimfashemo.’’

Abatumiwe muri ubu bukwe bakiriwe muri Gigi’s Garden ku Gisozi, ahahuriye inshuti, abavandimwe n’abo mu miryango yombi.

Nyuma yo kwakirwa, Papi Clever afashijwe na band ye, yateye umugore we umutoma yifashishije indirimbo “Beautiful In White” ya Westlife. Ubwo yaririmbaga yahabwaga amashyi y’urufaya ndetse yayisoje ahita agwa mu byano by’umukunzi we barishimana.

Usibye uyu muhanzi wakoze mu nganzo, ibirori bye byasusurukijwe n’abarimo Worship Team ya Ntora ayobora [yaririmbye izirimo ‘Jehovah has the final say’, ‘Tambira Jehovah’, ‘My God is good’ n’izindi].

Iri tsinda ryiyongereyeho Korali Goshen y’i Musanze, Ingabire yaririmbyemo mbere yo kwimukira mu Mujyi wa Kigali, abayigize bifashishije indirimbo ya Niyomugabo Philemon yitwa “Ubukwe bwiza” mu kwifuriza ihirwe umuryango mushya.

Abahanzi bazwi batashye ubukwe bwa Papi Clever barimo Nkomezi Prosper waririmbye indirimbo ze zirimo “Ibasha gukora” na “Nzayivuga.’’

Yamubwiye ati “Turashima Imana ku ntambwe nziza wateye. Turagukunda cyane.’’

Abatashye ubukwe banataramiwe n’itsinda ry’abahanzi b’abahanga barimo Kenneth na René Patrick, bifashishije indirimbo zitandukanye zirimo “Mwami icyo wavuze” ya Healing Worship Team n’izindi zabyinwe n’abageni ndetse n’abasore n’inkumi babaherekeje.

Umubyeyi wa Papi Clever yakiriye umukazana we amubwira ko mu rugo habamo ibibazo byinshi ariko ibisubizo byabyo bizava mu masengesho no kwegera Imana.

Ubukwe bwa Papi Clever bwayobowe na Nsengeyukuri Jean Damascène [Mc Philos] uri mu bamaze kwandika izina mu kuyobora imisango y’ubukwe, akoresheje ikeshamvugo n’ubuvanganzo binyura amatwi.

Yayoboye ubukwe bw’abanyamakuru Karangwa Mike, Eric Shaba n’ubw’abahanzi barimo Albert Niyonsaba, Gikundiro Rehema [waririmbaga muri Korali Shalom y’i Nyarugenge mbere yo kwerekeza muri Amerika] na Elsa Cruz wo muri Korali Yesu Araje y’Abadiventisiti.

Papi Clever yabengutse Ingabire bahuje umuhamagaro we na we ari umuramyi. Uyu mukobwa ufite ijwi ryiza yanyuze muri Korali Goshen ikorera ivugabutumwa muri ADEPR Musanze.

-  Inkuru wasoma: Umuramyi Papi Clever yarushinze na Ingabire Dorcas (Amafoto)

Ibyaranze ubukwe bwa Papi Clever mu mashusho

Papi Clever yaherekejwe na Pasiteri Nsenga Emmanuel wo muri Eglise Vivante wamubereye Parrain mu gihe umukunzi we yagaragiwe (Marraine) na Ingabire Carine usanzwe ari umugore w’umuhanzi Alexis Dusabe
Papi Clever na Ingabire Dorcas bahamije isezerano ryo kubana nk'umugabo n'umugore mu Itorero rya ADEPR
Abasore bambariye Papi Clever mu ifoto na Ingabire Dorcas wari ufite akanyamuneza ku maso
Papi Clever ukunzwe cyane mu ndirimbo zo mu gitabo yari agaragiwe n’abasore biganjemo abo bafatanya (band) mu kuramya no guhimbaza Imana
Ingabire Dorcas n'abakobwa bamugaragiye bari bafite ibyishimo ku munsi we udasanzwe
Umunsi w'ubukwe uba ariwo gufata amafoto y'urwibutso
Abasore baserukanye na Papi Clever bari babyambariye...
Ingabire ufite ijwi ryiza yanyuze muri Korali Goshen ikorera ivugabutumwa muri ADEPR Musanze
Ingabire yamwenyuye...Amasezerano yo kubaka urugo rwe yasohoye
Ingabire ubu ni umugore wa Papi Clever imbere y'Imana n'abantu
Umuramyi Papi Clever yarushinze na Ingabire Dorcas bamaze igihe bakundana
Wari umunsi w'akanyamuneza...
Papi Clever asanganira umugore we
Akanyamuneza kari kose ku bageni nyuma yo kwambikana impeta y'urudashira
Papi Clever yijeje umukunzi we ko azamukunda iteka ryose kugeza Yesu agarutse
Akana ko mu jisho...
Abasore n'inkumi bambariye Papi Clever na Ingabire na bo bamwenyuye
Aba bombi bahuje umuhamagaro kuko ari abaramyi bo mu rusengero
Bakoze ubukwe bubereye ijisho
Papi Clever yasomye umukunzi we ku ijosi nk'ikimenyetso cy'urukundo cya Papi Clever amufitiye
Papi Clever n'umukunzi we Ingabire bari bagaragiwe na Pasiteri Nsenga Emmanuel n'umugore wa Dusabe Alexis. Aha bayobowe na Pasiteri Ndayizeye Isaïe wabasezeranyije
Abasore n'inkumi bambariye Papi Clever na Ingabire bajyanishije
Akanyamuneza ni kose kuri Papi Clever na Ingabire Dorcas
Abasore bambariye Papi Clever ni uwo mwambaro baserukanye

Amafoto: Niyonzima Moïse

Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .