Umwaka w’ivugabutumwa ryo kuri internet! Youtube yamamaje abapasiteri, yigarurira iyobokamana rya 2019

Yanditswe na Ishimwe Israel
Kuya 3 Mutarama 2020 saa 04:32
Yasuwe :
0 0

Buriya nta kintu mubonamo mwebwe? Niba utarumvise intambara y’amagambo hagati ya Pasiteri Zigirinshuti Michael wo muri ADEPR n’umuhanzi Nsengiyumva François [Igisupusupu], waba warataye mu gutwi indamukanyo y’umuvugabutumwa Riziki Chantal igira iti “Muraho, muraho yemwee!’’

Aba basangiza b’ijambo ry’Uhoraho ni babiri ku rutonde rurerure rw’abo amazina yabo yagarutsweho cyane mu 2019 binyuze mu kwifashisha umuyoboro wa Youtube, mu kwamamaza ubutumwa bwiza.

Uko iminsi yicuma ni ko umubare w’imbuga nkoranyambaga ugenda wiyongera, ibi bituma abantu benshi bitabira kuzikoresha. Mu zikoreshwa cyane harimo Facebook, Instagram, WhatsApp, Twitter na Youtube isa n’iyoboye izikunzwe bitewe n’uko ininjiriza ba nyirayo agatubutse.

Youtube yazamuye igikundiro cya bamwe mu bavugabutumwa, ibyo bigisha byambutse imipaka y’u Rwanda bigera hakurya y’amazi magari.

Ntibishingiye kuri za ngendo zakorwaga abavugabutumwa, abafataga rutemikirere berekeza hanze ubu ikoranabuhanga ryoroheje iyamamazabutumwa binyuze mu gufata amashusho y’ubutumwa agasakazwa Isi yose binyuze kuri internet.

Mu Rwanda abenshi basigaye bamara umwanya munini kuri Youtube bareba amashusho; uru rubuga ku Isi yose rukoreshwa n’abasaga miliyari 1.9.

Usibye ibikorwa byo gufasha abatishoboye binyuze mu bukangurambaga bwo gukusanya inkunga, kwerekana abanyempano bashya, Youtube yanatumbagije ubwamamare bw’ababwirizabutumwa bwiza.

IGIHE yanyujije amaso mu mezi 12 ashize ikusanya urutonde rw’abavugabutumwa bagarutsweho cyane muri uyu mwaka, binyuze mu magambo yabo adasanzwe bavuze ndetse n’ibyo bigishije bigakurura benshi mu bakoresha imbuga nkoranyambaga, bakagenda babihererekanya.

-  Habuze gato ngo Pasiteri Zigirinshuti afatane n’Igisupusupu

Kanama ya 2019, yabyaye amahari hagati ya Pasiteri Zigirinshuti Michel na IGISUPUSUPU wendaga kumuhagama nyuma yo kuvuga ko uyu muhanzi afite ubwamamare bushyigikiwe na Satani.

Yabitangarije mu cyigisho yatangiye muri ADEPR Nyarugenge mu masengesho ya saa sita, ubwo yigishaga ku ‘buhanuzi n’amasezerano byo mu isezerano rishya byuzuriye mu byasezeranijwe bishya’.

Hari aho yageze avuga uburyo hari abantu b’imburamukoro bahururira ibyo babonyeho byose ari naho yavuzemo Nsengiyumva wamamaye kubera indirimbo ye “Igisupusupu”.

Ati “Ntimugakunde kuba imburamumaro, muri imburamukoro. Iyo ubaho wandagaye Satani arakubona. Nta mpamvu yo kugira ngo ugushaka wese akubone, uguhamagariye igitoki, brochette, Nyabugogo, uguhamagariye kubyina, uguhamagariye kumva Igisupusupu, byose mukaboneka.”

Pasiteri Zigirinshuti yatinze kuri Nsengiyumva abwira abakirisitu ko ukwamamara k’uyu musaza wa Rwagitima kurimo imbaraga za Satani, nyamara abakorera Imana bo bahera hasi.

Ati “Igisupusupu kiragatsindwa! Syii! Ubonye ukuntu cyamamaye mu mezi angahe? Murakibonye ukuntu cyamamaye mu mezi atatu? Ariko buriya nta kintu mubonamo mwebwe? Ikintu nka kiriya kikava Rwagitima cy’Igisupusupu uwo mwanya kikaba kigeze…”

Yunzemo ati “Ubuse nkoze ibiterane bingahe cyangwa waririmbye izingana iki? Ko ntaho zagiye se? None rundamo, rundamo aho ngaho aho ngaho mu mihanda yose, mu Burayi, yagiye. Mujye mumenya imbaraga zamamaza ibintu nka biriya izo ari zo, ugasanga Isi yose yashitse. Ariko ubahamagaye mu giterane ntiwababona, mwajya kumenya imbaraga ziri hariya hantu izo ari zo. Kuki ibintu bya Satani byihuta ariko ibyacu bikagenda gahoro?”

Uretse Nsengiyumva, abantu batandukanye ku mbuga nkoranyambaga banenze Pasiteri Zigirinshuti bamushinja kugirira ishyari uyu musaza ndetse ko amagambo yakoresheje adakwiriye kuvugirwa mu rusengero.

Amagambo ya Zigirinshuti n’ibyo Nsengiyumva yamusubije byose anenga ko uwitwa umukozi w’Imana yamwutse inabi byatijwe umurindi na Youtube kuko ni ho byanyujijwe.

Pasiteri Zigirinshuti Michel yamamaye cyane mu kubwiriza akoresheje imvugo zidasanzwe bituma ubutumwa bwe busakara ahantu henshi
Pasiteri Zigirinshuti Michel yigeze guhabwa inshingano nk’ukuriye Ivugabutumwa n'Amahugurwa muri ADEPR

-  Ni gute umusore arara yifumbase n’ama-baby yuzuye i Kigali?

Mukeshimana Emerthe ni izina ryagarutsweho muri uyu mwaka. Uyu mubyeyi yamamaye cyane ku izina rya Mama Charlène, asengera mu Itorero rya ADEPR Nyakabanda. Yatangiye ivugabutumwa mu 2005 ariko atangira gukoreshwa cyane mu ntangiriro z’uyu mwaka.

Muri Kamena 2019 nibwo yatangaje amagambo yiganjemo ay’imvugo zitamenyerewe gukoreshwa mu nsengero. Abakoresha imbuga nkoranyambaga bararikase bararihanahana.

Muri iyo nyigisho yakomoje ku mbaraga zishobora gufasha umuntu gukora ibidasanzwe.

Yagize ati “Mbere ni nk’uwaza akakubaza ikigutera kudasambana uri umukobwa kandi abakobwa barashize. Ni mbaraga ki? Wa musore we, ni iki kigutera kurara wifumbase, wizinze nk’ipine ry’imodoka, n’abana bahiye bari i Kigali, abana bacyeye n’ibyuki n’ibyuma bihari kandi harimo n’ab’ubuntu, ni iki kigutera kubaho gutya udasambana? Ni mbaraga ki?’’

Usesenguye neza ubutumwa bukubiye muri iyi nyigisho, uyu muvugabutumwa yashakaga kuvuga ko hari izindi mbaraga zishobora gufasha umukobwa n’umusore kudasambana nyamara hari ibigusha byinshi.

Kimwe n’abandi bavugabutumwa Mama Charlène yahisemo gukoresha amagambo arimo aba-baby, ama-nigger, aba-type, abakoboyi n’abajama kuko na bo baza mu rusengero kandi bakeneye kumva ubutumwa bwiza binyuze mu mvugo iboroheye, ikurura amarangamutima yabo.

Umuvugabutumwa wo muri ADEPR, Mama Charlène, ari mu bagarutsweho cyane bitewe n'imvugo yakoresheje abwiriza

-  Muraho yemwee! Imwe mu ndamukanyo zamamaye cyane

Umuvugabutumwa Riziki Chantal, na we arazwi. Biroroshye kumwibuka niba uzi umukobwa wigisha anyuzamo asuhuza abamuteze amatwi.

Imwe mu nyigisho yabwirijemo muri Kanama yagize ati “Muraho, muraho yemwe. Kangahe mwa bakobwa mwe, mubonanye abamasera ijipo n’amakanzu biriho pasura, bareba mu ntege no mu bibuno. Aribo ari natwe abakagombye kwiyubaha ni bande? Harya muri kwanga za rukubita ihuku, rukubita imbwa!’’

“Abasore bari kwambara ubusa, ugasanga yambaye icupa, uri umukirisitu urya igaburo ryera ujya mu icupa, ubwose uzajya mu ijuru gute warageze mu icupa? Muraho, muraho yemwee! Nujya mu icupa, byeri, urwagwa bizajya he? Niba ubona umubu ukihisha, uri wa nta kigenda (fake), hunga icyaha, hunga urupfu rwa kabiri.’’

Riziki Chantal yamamaye cyane ubwo yatangaga ubuhamya avuga ko ariwe watwitse akabyiniro ka Cadillac

-  Mafia mu madini! Ubuhamya bw’ibikomere bya Pasiteri Ntawiniga

Pasiteri Ntawiniga Jean-Désiré Hullet ari mu bagarutsweho mu ruhando rw’iyobokamana.

Izina rye ryatumbagiriye mu gikorwa cyo ku wa 19 Mata 2019 cyiswe ‘Because There Is Hope’ cyateguwe na Pearls Corner Organisation iyoborwa na Mireille Igihozo witabiriye irushanwa rya Miss Rwanda 2018. Cyari cyanatumiwemo umuhanzikazi Aline Gahongayire watanze ubutumwa avuga ko itangazamakuru ry’u Rwanda riciriritse.

Mu nyigisho ye yagize ati “Njye nari ikirara. Mu rugo bagiye muri Amerika ndi mu kabari. Nari umurara, nagiye i Kanombe nsanga ba masenge baryana inzara bati ‘ngicyo kiraje’. Nahageze bagiye kare. Nakuze mu rugo ntahaba, meze nk’aho ndi externe. Nageze muri Amerika nsanga ababyeyi ntabazi, abavandimwe tutaziranye.’’

Uyu mupasiteri w’imyaka 43 yavuze ko igituma ahorana itoto ari uko adakunda kurakara.

Ati “Hari abantu barakara bakamarana umujinya ibyumweru bitatu, hari urakara akanuka, akamera nk’urutoryi rutose.’’

Yabwiye IGIHE ko mu murimo w’Imana habamo ibibazo byinshi cyane , yagereranyije na mafia zikorerwamo.

Ati “Singiye kukubeshya buriya abakozi b’Imana biriya bibazo byo gucikamo ibice mu matorero harimo ibinyoma byinshi, harimo intambara zirenze n’iza politiki harimo mafia. Njye rero ukuntu navutse mvuga ibintu uko biri.

Pasiteri Jean-Désiré wo muri Zion Temple mu mwaka wa 2019 yavuze ku bikomere yatewe na bagenzi be mu murimo w'Imana

-  Kabanda Julienne, umuvugabutumwa wari icyamamare mu tubyiniro dukaze!

Pasiteri Julienne K. Kabanda ayobora Umuryango w’ivugabutumwa wa Grace Room Ministries. Yumvikanye abwiriza inyigisho ziganjemo izikebura abana b’abakobwa ku myitwarire ikwiye kubaranga.

Yigisha muri ‘Because There Is Hope’, hari aho yagize ati “Narakuze, sinigeze nsambana, ndashaka. Hari utumalayika. Hari abavuye mu ijuru bagera ku Isi; hari n’abavuye ikuzimu bagana mu ijuru, biterwa n’aho ukonkobotse.’’

“Twavuye ikuzimu ariko turagana mu ijuru. Iyo Yesu atwogeje baratwifuza. Hari ibintu ntinya kuvuga. Wararaga mu kabyiniro? Njye nari nararenze urwo rwego. Nageze aho nari mfite imbyino izwi. Sinitwaga Julienne ryari izina ry’abaturage. Nakoze amarushanwa yo gusubiramo Michael Jackson. Naranyereye ibigabo bikajya bigwa hasi.’’

Kabanda yakanyujijeho mu tubyiniro dukomeye, yari umuhanzi uzwi ku banyabirori b’i Kigali ndetse yigeze ategura igitaramo cy’ubuntu cyahuruje imbaga irimo na nyina agatungurwa no kubona umwana we yitwara atyo!

Pasiteri Kabanda Julienne ari mu bavugabutumwa bafite amavuta, akunda kwigisha ananyuzamo agatanga ubuhamya bw'ibihe bikomeye yanyuzemo atarakizwa
Pasiteri Kabanda Julienne ni we washinze Umuryango w'Ivugabutumwa wa Grace Room Ministries nyuma y'iyerekwa yagize ryo kwagura umurimo w'Imana

-  Imvugo zo ku muhanda zarifashishijwe mu ivugabutumwa rishya!

Pasiteri Niyonshuti Théogène wakuriye mu buzima bwo ku muhanda, ubu ni Pasiteri uyoboye umwe mu midugudu igize Itorero rya ADEPR. Umwaka wa 2019 wasize yamamaye mu kubwiriza byihariye akoresheje imvugo zisanisha n’ubuzima bwabo.

Ati “Ntiwaba umaze gucoma ngo ugende nka babiloni, uhita uhindura ingendo (bounce).’’

Hari n’aho agira ati "Abacuruzi b’urumogi babita abapushayi, akakubwira ngo genda aguhe urumogi. Mfite uko nagenda murapira. Vipi, mambo, ku miti se? Ndamubaza imiti se hari farumasi iri aho ngaho? Agahita avuga ati ’uyu we ni uwacu tu’.’’

Mu 2019, Pasiteri Niyonshuti yatumiwe mu biterane n’ibitaramo byagutse bigamije guhashya ibiyobyabwenge biri mu byugarije urubyiruko rw’u Rwanda.

Mu nyigisho atanga yumvikana akoresha amagambo [“gucoma” cyangwa “gukora ijisho’’ bisobanura kunywa urumogi n’ayandi] yo kwisanisha n’ubuzima bwabo kugira ngo bamwiyumvemo abagezeho ubutumwa yifuza.

Pasiteri Niyonshuti Théogène akoresha amagambo ndetse akitwara bijyanye n'abantu ashaka guha ubutumwa. Aha yabwirizaga mu gitaramo yari yatumiwemo i Nyamirambo

-  Ivugabutumwa ry’ubujyanama mu kubaka ingo

Umwaka wa 2019 wabaye udasanzwe kuko ubujyanama bunyuzwa kuri Youtube bwariyongereye cyane. Binyuze mu biterane by’umuryango abakozi b’Imana bahanuye imiryango ku buryo ikwiye kubana neza kandi mu mahoro.

Ku isonga harimo Rutayisire Antoine uyobora Itorero Anglican Paruwasi ya Remera; Pasiteri Habyarimana Désiré ubarizwa mu Itorero rya ADEPR na mugenzi we Senga Emmanuel wo muri Eglise Vivante.

Mu mpanuro, Pasiteri Rutayisire yatanze mu mpera z’umwaka yifashishije indirimbo ya Rugamba Sipiriyani avuga ku miryango itandukana yararuhanye.

Ati ‘‘Umugabo asiga umugore baruhanye, bakiteza imbere. Agatangira ati ‘nashatse umugore narutaga. None arashaje nkibyiruka. Nzashaka umuto mumuharike, numve iryo raha.’ Icyo ni igihombo! Umuntu ufite V8 akagira n’inshoreke irya amafaranga wakoreye n’umugore, yaravunitse urangije ukamuta, arimo aratungwa n’agakayi, araririmba ngo mumpe agakayi nandikemo ibyo nariye n’ibyo nanywereye kandi wowe uri gusangira n’uwo mutafatanyije kubishaka. Ni igihombo. Abantu benshi bakorera mu bwoba, ntibagira icyerekezo!’’

Urutonde rw’abavugabutumwa bagaburiye ijambo kuri Youtube ni rurerure! Kuri ubu insengero nyinshi zatangije imiyoboro zinyuzaho ubutumwa kuri Youtube mu kubusunika ngo bugere kure. Na we ushobora kwiyongereraho abawe!

Pasiteri Habyarimana Désiré ubarizwa mu Itorero rya ADEPR mu nyigisho ze yakunze kugaruka ku gaciro ko kugira umuryango mwiza kandi utekanye
Pasiteri Senga Emmanuel yamamaye cyane mu nyigisho zitanga ubutumwa bw'uburyo imiryango ikwiye kubana yubakiye ku bukirisitu bwa nyabwo
Umushumba w'Itorero Anglican muri Paruwasi ya Remera, Pasiteri Antoine Rutayisire, ni umwe mu bagaragaye cyane mu nsengero zitandukanye atanga ubutumwa buganisha abantu ku kwakira agakiza ariko anayobora imiryango uko ikwiye kubana mu mudendezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza