Umudugudu wa ADEPR Mayange ugeze aharindimuka! Mutangana uwuyobora yashyizwe mu majwi

Yanditswe na IGIHE
Kuya 30 Nzeri 2019 saa 03:49
Yasuwe :
0 0

Tariki ya 14 Nzeri 2019, ku mbuga nkoranyambaga hacicikanye amafoto n’amajwi aca amarenga y’ikibazo cy’ingutu gishingiye ku bwumvikane buke hagati y’umuyobozi n’abakirisitu basengera ku Mudugudu wa ADEPR Mayange mu Bugesera.

Muri ayo mashusho bamwe bagaragara bari hanze y’urusengero bategereje ko Pasiteri asohoka ngo bamubaze impamvu yashingiweho mu guhagarika bamwe mu badiyakoni [aba bakora imirimo itandukanye mu rusengero].

Umushumba wa Paruwasi ADEPR Mayange, Banganineza Emile ni we watangaje icyemezo cyo guhagarika abo badiyakoni, bari baranditse bagaragaza ko bafitanye ikibazo na Mwarimu w’Umudugudu Mutangana Emmanuel.

Nyuma y’ayo makuru, umunyamakuru wa IGIHE yacukumbuye imvano y’ikibazo nyirizina kiri hagati ya Mutangana Emmanuel n’abayoboke bo muri ADEPR abereye umuyobozi.

-  Imvano y’intungunda ku Mudugudu wa ADEPR muri Paruwasi Mayange

Mutangana yahawe inshingano zo kuyobora Umudugudu wa ADEPR Mayange muri Mata 2017.

Uyu mukozi w’Imana akigera ku buyobozi ngo yashatse gukora impinduka mu nzego zose ashyiraho ize bwite kuva ku bashinzwe inyubako, abadiyakoni, abayobozi ba korali, ab’urubyiruko, abahagarariye abagore n’abagabo n’abandi.

Muri izo mpinduramatwara nibwo yatangiye gushyamirana n’abanyetorero batanejejwe n’iyo myanzuro n’uburyo yafashwemo.

Muri Kamena 2019, abajyanama b’Inama Nyobozi y’Umudugudu banditse ibaruwa bamenyesha Paruwasi ya Mayange n’Itorero ry’Akarere ka Bugesera ibibazo bafite, banasaba ko Mutangana yimurwa.

Ibaruwa bayishyikirije Pasiteri Bangananeza Emile uyobora Paruwasi ya Mayange. Nyuma y’amezi atatu yanditswe, Mutangana yatumije inama y’Umudugudu, yatangarijwemo ko abadiyakoni batandatu banditse ibaruwa imurega bahagaritswe ku murimo.

Ibibazo bya Mutangana n’ab’i Mayange byarashibutse bigera no kuri Korali yitwa Alliance ikorera ivugabutumwa kuri uwo mudugudu ngo yabwiye ko itazagira amahoro akihabarizwa.

Kuva mu myaka isaga ibiri, hari ibibazo byinshi byavutse ndetse bamwe mu bakirisitu bamushinje no kwitambika mu mibanire ya bamwe mu baririmbyi ashaka kubateranya.

Muri bo hari n’abo ibihano byarangiye ariko ntibagarurwa mu murimo kugeza ubwo bandikiye ubuyobozi wa Paruwasi ya ADEPR Mayange ariko ntibigire icyo bitanga.

Ubusanzwe Inama y'abakirisitu iterana iyo abakirisitu bayitabiriye ku bwiganze

Mu ibaruwa IGIHE ifitiye kopi hari aho uwari Umushumba w’Itorero ry’Akarere ka Bugesera, Rwigema Donatien asaba Umushumba wa Paruwasi ya Mayange gukemura ikibazo cy’umudiyakoni wahagaritswe, ibihano bye bigasozwa ntagarurwe mu nshingano.

Hari amabaruwa menshi yagejejwe mu nzego za ADEPR ndetse abayanditse bahabwa icyemeza ko yakiriwe (copie de réception) ariko ntibasubizwa.

Mu majwi yafatiwe mu nama y’abakirisitu ku wa 14 Nzeri 2019, hari abumvikana bavuga ko kuva Mutangana yagera i Mayange babuze amahwemo.

Amakuru IGIHE ifite ni uko ubwo Mutangana yatangizaga inama, Umushumba wa Paruwasi Banganineza Emile yinjiye mu rusengero atanga itangazo ry’abahagaritswe.

Umwe muri bo agira ati ‘‘Twinjiye mu itorero dusize hanze intambara n’ibibazo byari bihari, tuza tuzi ko duhungiye mu rusengero kuko tuhasanga amahoro ariko turugezemo dusanga nta mahoro ahari ahubwo hari intambara ziruta izo twasize hanze.’’

Mu ijambo rye, humvikanamo amajwi y’abakirisitu bamuvugiramo, akabasaba gutuza.

Ati ‘‘Muduhaye amatangazo ariko adafite isura, adafite abantu muhagaritse imbere ngo abantu bababone. Narakubwiye nti ‘hejuru y’ibi mudukorera hari Imana izaca urubanza.’ Icya mbere uyu mudugudu ukimara kuwugeramo nta mahoro twagize. Ninjye wa mbere waciye, nasanze ntafite umwanya wo guhangana na we.’’

‘‘Waje usanga ndi Perezida w’inyubako, narazamuye urusengero rugera hafi ya ‘Lenton’, unca umbwira ko ntari umudiyakoni ngo ndi umulayiki. Icya kabiri umusaza wampaye raporo na we waramuhagaritse nyamara raporo ihabwa perezida w’inyubako akayigushyikiriza. Icyo ni cyo mwapfuye, nta kindi.’’

Yakomeje avuga ko iyo abakirisitu bageze mu itorero riba ryungutse abantu ariko ubuyobozi bwa Mutangana bushimishwa no kubaca.

Inama yabereyemo ibi biganiro yabaye mu mibyizi mu gihe abakirisitu basabye ko Inama Nyobozi yajya iba ku Cyumweru ku buryo n’abakozi ba leta bayitabira.

Ati ‘‘Inama wayishyize mu mibyizi ngo ibitekerezo byawe ubivuge nta muntu wakuvuguruza.’’

Ubusanzwe mu Itorero rya ADEPR, umukirisitu waguye mu cyaha, ahanirwa mu ruhame imbere y’iteraniro ndetse abayoboke bakamenyeshwa ibyo yakoze nk’impamvu yo guhagarikwa kwe.

Mu buhamya bwa bamwe bagaragaza ko hari abafatirwa mu byaha n’ubusambanyi ntibahanwe, ahubwo ababivuze akaba aribo bakanirwa urubakwiye.

Umwe mu baciwe muri ADEPR ku Mudugudu wa Mayange avuga ko ‘‘Abantu mwaciye ntimugaragaze icyo bakoze, abakirisitu baragenda bavuga ngo iki? Agahinda dufite Imana izakatumara. Hari igihe kizagera ukagenda, hakaza abandi mutavuga kimwe, mudakora kimwe. Ntuzatura aha nk’umusozi.’’

Yavuze ko icyifuzo abakirisitu bafite ari ukugira amahoro mu nzu y’Imana kuko baje bifuza kuhakirira.

Mutangana yakunze kwiyegereza abantu bamubwira amagambo yamuvuzweho ku buryo uwo badahuje ngo ashakirwa impamvu zo kumuhagarika mu itorero.

Umwe mu batifuje ko amazina ye atangazwa yagaragaje ko yashatse kumuteranya n’umugore we ariko agasanga urugo rwe rudadiye.

Ati ‘‘Uburyo yakoresheje ngo agere kuri ibyo ni iterabwoba. Yatangiye atubwira ko yatumwe aho rukomeye. Avuga ko i Mayange ari iwe nta wavuguruza icyo avuze n’icyo akoze. Yigambaga ko yaje guhangana n’abakirisitu b’i Mayange bigize abanyabwenge.’’

Mutangana kandi hari abamushinja gufata bimwe mu byemezo akabyitirira Inama nyobozi. Abayobozi bose bayoboye Paruwasi ya Mayange, Itorero ry’Akarere ka Bugesera kugeza ku Rurembo rw’Iburasirazuba nta wakemuye icyo kibazo.

-  Ubuyobozi bw’itorero buvuga iki kuri iki kibazo?

IGIHE yagerageje kuvugana na Mwarimu Mutangana Emmanuel ariko avuga ko hari inzego zishinzwe gutanga amakuru.

Yagize ati “Ntacyo nabivugaho. Hari abashinzwe kuvugana n’itangazamakuru bagira icyo batangaza.’’

Umushumba w’Itorero ry’Akarere ka Bugesera, Masumbuko Josué, umaze ukwezi ahawe inshingano zo kuhayobora yavuze ko icyo kibazo nakimenya azagikurikirana.

Yagize ati “Ndi mushya mu Bugesera ku buryo hari paruwasi ntarageramo ndetse hari abashumba tutarahura. I Mayange narahateraniye ariko nabonye nta kibazo kidasanzwe gihari. Iyo dusanze hari ibibazo nk’ibyo hari uburyo tubikemura. Nabwiwe ko hari ibaruwa abadiyakoni banditse ariko ntabwo ndayibona. Ninyibona tuzakurikiza uburyo busanzwe bw’itorero bwo gukemura ikibazo.’’

Umudugudu wa Paruwasi ya ADEPR Mayange ubarizwaho abakirisitu basaga 700. Abemeramana bahateranira bavuga ko ibibazo bihari byagize ingaruka ku bwitabire bw’abinjira mu rusengero kuko bamwe bagiye bigendera ahandi.

Inama y'abakirisitu yabaye ku wa 14 Nzeri 2019 ni yo yanzuye ko abadiyakoni banditse bagaragaza ibibazo biri ku Mudugudu wa Mayange bahagarikwa. Aba bari hanze y'urusengero ngo babaze Pasiteri impamvu bahagaritswe
Inama yabaye mu mibyizi mu gihe abakirisitu basabye ko yajya ikorwa ku cyumweru nyuma y'amateraniro kugira ngo n'abakozi bashobore kuyitabira
Mwarimu w'Umudugudu wa ADEPR Mayange, Mutangana Emmanuel yashyizwe mu majwi kuba ku isonga ry'ibibazo abakirisitu bafite
Ibibazo biri muri ADEPR Mayange ari naho habarizwa icyicaro cya Paruwasi bimaze imyaka isaga ibiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza