Umubare w’abakirisitu gatolika wariyongereye ku Isi, mu Rwanda bimeze bite?

Yanditswe na Cyprien Niyomwungeri
Kuya 21 Ugushyingo 2019 saa 07:22
Yasuwe :
0 0

Imibare mishya yashyizwe ahagaragara na Fides Agency, ibarizwa i Vatican kwa Papa, ikaba izwiho kwandika amakuru agezweho ya Kiliziya, irerekana ko umubare w’abayoboke ba Kiliziya Gatolika ukomeje kwiyongera ku Isi, aho muri uyu mwaka wazamutseho 0.06%.

Iri zamuka ryatumye abakirisitu Gatolika bagera kuri 1, 313,278,000, ni ukuvuga 17.73% by’abatuye Isi yose bangana na 7,408,374,000.

Muri aba bose harimo abapadiri 414,582, Abasenyeri 5,389, Abadiyakoni bahoraho muri Kiliziya Gatolika 46,894, Abalayiki b’Abamisiyoneri 355,800, Abakateshisite 3,120,321, Abaseminalisiti bakuru 115,328, Abaseminalisiti bato 100,781.

Mu Rwanda bihagaze bite?

Imibare y’Ikigo cy’Igihugu cy’Ibarurishamibare yo mu 2002, yerekana ko abanyarwanda icyo gihe bari 8,128,553, abayoboke ba Kiliziya Gatolika bakaba bari 3,945,336. Icyo gihe abaporotesitanti bari 2,164,026, abadiventisti ari 971,547, abatagiraga amadini babarizwamo ari 289,906.

Ibarura rusange rya kane ry’abaturage mu 2012 ryerekana ko mu banyarwanda bose bari 10,515,973, abayoboke ba Kiliziya Gatolika bari 4,599,371, abagera ku 611,129 baba mu mijyi naho 3,988,242 baba mu byaro.

Icyo gihe abanyarwanda 0.2% nta dini cyangwa itorero babarizwagamo, abakirisitu bari bihariye hejuru ya 93% by’abanyarwanda, aho Kiliziya Gatolika yari ifitemo 44%,abaporotesitanti ari 38% naho abadiventisiti ari 12%. Abayisilamu bari 2% naho abafite ukwemera gakondo bari munsi ya 1%.

Mu kiganiro IGIHE yagiranye na Musenyeri Philippe Rukamba, Umushumba wa Diyosezi ya Butare akaba na Perezida w’Inama y’Abepiskopi Gatolika mu Rwanda, yavuze ko bakurikije imibare yabo yo mu 2018, abayoboke ba Kiliziya Gatolika ari 48% by’abanyarwanda bose.

Ati “Dukurikije imibare yacu abakirisitu Gatolika ni 48% by’abanyarwanda. Ubu impuzandengo y’abapadiri basanzwe ba diyosezi biyongeraho hagati ya 50 na 60 ku mwaka”.

Ubushakashatsi bwa Gatanu ku mibereho y’ingo mu Rwanda (EICV5), bwagaragaje ko umubare w’abanyarwanda mu 2016/2017 wari miliyoni 11.8, bivuze ko 48% byabo ari miliyoni zisaga 5.6.

Musenyeri Rukamba avuga ko nubwo imibare ingana gutya abakirisitu gatolika bagabanutse cyane cyane mu cyiciro cy’urubyiruko, aho abenshi bajya mu madini mashya.

Avuga ko kuba urubyiruko ahanini ruva muri Kiliziya Gatolika biterwa n’uburyo bwo gukora kwayo kutarukururira kuyigumamo.

Ati “Hari ubundi buryo ubu urubyiruko rukunda gusengamo budahura iteka n’uburyo bwacu bwo gukora bwa kiliziya Gatolika ugasanga bakururwa n’ibyo bintu nk’indirimbo nyinshi n’ibindi”.

Yongeraho ko “Buhoro buhoro urubyiruko rugenda rugira imyumvire yarwo, hari abatagira icyo bemera, hari ababaho uko babonye. Hari n’ibyo abantu bavuga cyangwa ibivugwa kuri Kiliziya bishobora kubaca intege”.

Mu gukosora iki kibazo Musenyeri Rukamba avuga ko icyo bakora ari ukumanuka bakegera urubyiruko bakaganira binyuze mu matsinda ahari menshi y’urubyiruko, mu mahuriro y’urubyiruko aba buri mwaka n’ahandi.

Kiliziya Gatolika imaze imyaka 102 mu Rwanda niyo ifite abayoboke benshi mu Rwanda

Umubare w’abapadiri wariyongereye

Musenyeri Rukamba avuga ko no mu Rwanda umubare w’abapadiri wiyongera nk’uko n’ahandi muri Afurika no mu bihugu bimwe bya Aziya bimeze.

Nyuma ya Jenoside nko muri Diyosezi ya Nyundo hari umupadiri umwe muri Paruwasi eshatu, Diyosezi ya Byumba yari isigaranye abapadiri umunani abandi barapfuye.

Musenyeri Rukamba ati “Mbona njyewe ahubwo biyongera cyane ku buryo usanga hari aho nka Byumba umwaka ushize yagize abapadiri 12, Butare twari dufite barindwi, ku Nyundo ubanza bari 10”.

Kuba buri mwaka abari hagati ya 50 na 60 bahabwa ubupadiri bagabanuka bakaba hagati ya 30 na 40, ngo nibyo bituma kuri ubu havuka amaparuwasi mashya menshi.

Musenyeri Rukamba asanga ubwiyongere bw’abapadiri mu Rwanda bufitanye isano n’ibihe bya Jenoside u Rwanda rwanyuzemo, aho abantu babonye ko iyo bubatse ibintu bitarimo Imana bishwanyuka.

Ati “Hari urubyiruko rwinshi nkeka ko ibi bihe twanyuzemo bya Jenoside na nyuma ya Jenoside kuko benshi ni bato batazi n’iyo Jenoside, ahubwo babibonye noneho ku buryo bugaragara mu mubiri wabo, mu ngo zabo, mu babyeyi babo. Icyo kintu cyo kumva y’uko ibintu by’abantu iyo nta Mana igiyemo bigera ahantu bigasenya, bigera ahantu bikajyana ku rupfu, bityo umuntu akumva ko agomba gufasha abantu kubirenga”.

Kiliziya Gatolika mu Rwanda ifite diyosezi icyenda, arizo Arkidiyosezi ya Kigali, Diyosezi ya Kabgayi, iya Butare, Gikongoro, Cyangugu, Nyundo, Ruhengeri, iya Byumba n’iya Kibungo.

Abapadiri bariyongereye kuko ku mwaka hiyongeraho abagera kuri 50 na 60
Umubare w'abagatolika ni 48% by'abanyarwanda bose
Musenyeri Rukamba yavuze ko urubyiruko rurimo kuva muri Kiliziya rujya mu yandi madini

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza