Prophet Sultan yasabye korali ye kuririmba injyana zigezweho, ashimagiza Kinyatrap ya Bushali

Yanditswe na Ishimwe Israel
Kuya 7 Mutarama 2020 saa 06:53
Yasuwe :
0 0

Umuyobozi wa River of Joy and Hope Ministries, Prophet Sultan Eric, yahishuye ko akunda umuraperi Hagenimana Jean Paul [Bushali The Trigger], anasaba korali yo mu itorero rye kuririmba mu njyana zikunzwe kuko Imana ikwiye ibigezweho.

Ni ubutumwa yatanze mu materaniro yo ku wa 5 Mutarama 2019 yabereye Cosmos i Nyamirambo aho itorero riri; yibanze ku ntego y’uko abakirisitu bakwiriye gusenga mu kuri no mu mwuka.

Ubwo yari ageze mu mwanya wo kwakira amashimwe ku buhanuzi bwasohoye, Munyemana Eric [Prophet Sultan] yavuze ko akunda umuraperi Bushali ndetse ko azamuha impano.

Yatangiye aririmba ati “Ese ni muebue, ni tuebue?’’ Abari mu iteraniro bahise basekera rimwe. Yateye Hallelujah, akomeza n’indirimbo ya Bushali yitwa ‘‘Kinyatrap’’.

Yakomeje ati ‘‘Umwana w’umwirabura, ….Kinyatrap ku mugongo [akabisubiramo].’’

Ibi yabikoraga anabyina nk’ugerageza kwigana Bushali, akabaza ati ‘‘Hallelujah! Siko babyina?’’ abakirisitu bakamwikiriza banamwenyura.

Prophet Sultan ati ‘‘Abaziranye na we bazamubwire ko hari umuhanuzi umukunda. Amahoro abe kuri Bushali, akomeze kuzamuka, abahanzi bacu bakomeze kuzamuka mu izina rya Yesu. Nta kibazo mfitanye na bo, bataramana neza.’’

Prophet Sultan yasabye Korali Voice of Life yo mu itorero rye kugendana n’ibigezweho no kuririmba injyana zikunzwe.

Ati “Korali musirimuke, murusheho kuba abasirimu, muse neza. Korali yacu yarazamutse. Imana yacu ishaka ibintu bishya. Ishaka ko tuyisenga twambaye amakote agezweho kuko ari Imana ijyana n’ibigezweho. Ni Imana y’abazima n’ibizima.’’

Prophet Sultan Eric yahishuye ko akunda umuraperi Bushali

Abajije injyana ikunzwe cyane, yasubijwe ko ari Trap. Ati “Niyo ba Cardi B baririmba?’’

Belcalis Marlenis Almánzar azwi mu muziki nka Cardi B. Uyu muraperikazi w’imyaka 27 ari mu bagezweho muri Amerika; akora injyana ya Trap ifatwa nka hip hop igezweho ariko yavukiye mu Majyepfo ya Leta Zunze Ubumwe za Amerika ahagana mu 1990.

Mu bahanzi bakora iyi njyana harimo T.I., Gucci Mane, Waka Flocka Flame, 2 Chainz, Lil Uzi Vert na 21 Savage.

Bushali washimagijwe na Prophet Sultan aheruka kwishimirwa bidasanzwe mu gitaramo ngarukamwaka cya East African Party cyabereye i Kigali ku wa 1 Mutarama 2019.

Umwaka wa 2019, Bushali ni wo wamuzamuriye igikundiro, yitabiriye ibitaramo bikomeye birimo Iwacu Muzika Festival, MTN Izihirwe n’ibindi.

Bushali yatangiye umuziki mu mpera za 2013. Izina rye ryazamuwe n’indirimbo ‘Nituebue’ yahuriyemo na B-Threy n’uwitwa Slum Drip.

Afite album zirimo ‘Nyiramubande’ n’iyo yise ‘Ku gasima’ iriho indirimbo zikunzwe; iyi iriho indirimbo 12 zirimo iyitwa ‘Kinyatrap’, ‘Sindi Mubi’, ‘Zunguzayi’, ‘Ipafu’, ‘Kinyarock’, ‘Mamayiwe’, ‘Kugasima’, ‘Inganjyi’, ‘Ayura’, ‘Bitinze’, ‘Impanda’ na ‘Niyibizi’.

Prophet ni umuhanuzi uvuga ko yasigiwe guhanurira amahanga. Mu ntangiriro za 2018, yahaye abakirisitu be ‘papier mouchoir’ zo kwifashisha mu gukemura ibibazo.

Imyemerere y’abayoboke be ishingiye ku kuba Yesu yaratanze imbabazi z’iteka ryose ku byaha bakoze, ibyo bakora ubu n’ibyo bazakora mu bihe bizaza.

Hari abakirisitu yatuyeho gukira indwara zirimo ibibyimba byo mu nda na kanseri ndetse hari n’abatanze ubuhamya ko bakize, banitwaza inyandiko zo kwa muganga zibishimangira.

Umuraperi Bushali The Trigger yashimangiye ko ari mu bakunzwe mu muziki ugezweho bitewe nuko yitwaye mu gitaramo cya East African Party 2020
Bushali yatangiye umwaka wa 2020 ari mu bicu nyuma yo gutaramira ibihumbi by'abakunzi b'umuziki
Bushali ari mu bahanzi b'imbere beretswe urukundo rw'ikirenga mu gitaramo
Uyu muraperi afite ibihangano bigezweho cyane mu rubyiruko
Bushali yemeje ibihumbi by'abafana bari bateraniye muri Kigali Arena mu ntangiriro z'umwaka
Prophet Sultan Eric yatanze ubuhanuzi bw'umwaka mushya wa 2020. Ifoto yafatiwe mu gitaramo cyiswe “Cross Over’’ cyabaye mu ijoro ryo ku wa 31 Ukuboza 2019 rishyira ku wa 1 Mutarama 2020, cyabereye muri Kigali Cultural and Exhibition Village [Camp Kigali]
Korali Voice of Life yo mu Itorero River of Joy and Hope Ministries yasabwe kuririmba bigezweho kuko bakorera Imana ikunda ibigezweho

Amafoto: Muhizi Serge na Munyarugerero Gift


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza