Pasiteri Dr Byiringiro uyobora Abadivantisiti yavuze uko bafata inyigisho za Ezra Mpyisi wigisha ibihabanye n’amahame y’iri dini (Video)

Yanditswe na Akayezu Jean de Dieu
Kuya 21 Mutarama 2021 saa 08:06
Yasuwe :
0 0

Umuvugabutumwa wamamaye mu Itorero ry’Abadivantisiti b’Umunsi wa Karindwi mu Rwanda, Pasiteri Ezra Mpyisi, ni umwe mu bakunze kugarukwaho cyane ahanini biturutse ku nyigisho ze zitavugwaho rumwe.

Izina rya Pasiteri Ezra Mpyisi ryamenyekanye mu buryo budasanzwe, iyo avuga biragorana guhisha imbavu ndetse amagambo ye akunze guhererekanywa cyane n’abakoresha imbuga nkoranyambaga.

Inshuro nyinshi yumvikanye abwiriza ahantu hatandukanye ariko abenshi bakitsa ku magambo akoresha abwiriza n’uko abantu bayakira.

Yigishije mu bitaramo bigari, mu mavuna ntiyatanzwe ndetse yanageze no mu itangazamakuru ayobora abantu inzira y’agakiza.

Mu magambo ye avuga ko mu myaka 60 yabwirizaga insengero zikuzura amafaranga bakayazana, agahabwa intebe ariko kubera ko asigaye avuga ukuri ubu hari aho ahezwa.

Ati “Baranyirukanye mu rusengero, ubu sinabwiriza. Igihe navugaga ibinyoma nari ku ntebe, ubu sinyihabwa. Hashize imyaka itari munsi y’icumi, nashyingiraga abantu nkuko na bo babikora simvuge ukuri. Sinabashyingiraga nkuko Bibiliya ivuga.’’

Uyu musaza ari mu bakuze mu Rwanda by’umwihariko muri iri torero, kuko mu myaka igera muri 98 afite irenga 70 ayimaze ari umupasiteri.

Yize amashuri abanza muri Rwamwata Adventists School, ayisumbuye ayigira mu Ishuri ry’Abamisiyoneri ry’i Gitwe, ahafatwa nk’aho Itorero ry’Abadivantisiti ryatangiriye. Icyo gihe yize gusoma, kwandika no kuvuga Igifaransa mu myaka 12.

Mpyisi wize Kaminuza muri Zimbabwe, yabaye Pasiteri mu 1951 , naho mu mwaka wa 1953 aba n’Umumisiyoneri i Kasai muri Repubulika Iharanira Demokarasi ya Congo.

Mu myemerere n’amategeko agenga Abadivantisiti, harimo kuba batemera gusezeranya umugeni utwite, ni ukuvuga uwatewe inda mbere yo gushyingirwa.

Kuri Mpyisi, ntabwo ahamanya n’iyo myemerere kuko avuga ko muri Bibiliya hari abantu nka Dawidi wishe umuntu ngo akunde arongore umugore we ariko nyuma yakwihana Imana ikamubabarira.

Muri icyo gitabo havugwamo kandi inkuru y’umwami Salomo washatse abagore barenga 1000 ariko aza kubona ko byose ari ubusa arihana arababarirwa. Ibi ngo ni ikimenyetso ko n’ubu uwakora icyaha akihana yababarirwa.

Pasiteri Ezra Mpyisi ni we byari byatangajwe ko azasezeranya Knowless na Producer Clement bashyingiwe muri Kanama 2016, ariko aza kubivamo.

Mu binyamakuru no ku mbuga nkoranyambaga hacicikanye amakuru yemeza ko itorero ryanze kubasezeranya kuko umugeni atwite. Icyo gihe Pasiteri Mpyisi yavuze ko yitandukanyije n’ubukwe bwabo.

Mu mwaka ushize yavuze ko nta cyamubuza gusezeranya umukobwa niba yaba atwite.

Ati “Ninde udasambana ahubwo, uyu aratwite, undi na we ejo azatwita. Ninde mukobwa udasambana muri iki gihe, ninde gahungu kadasambana muri iki gihe? Ngaho mumbwire. Umukobwa atwite cyangwa adatwite namusezeranya, byose ni zero. Baravuga bati Eva yasambanye n’inzoka, inzoka yaryamana n’umuntu sha ariko mwabaye mute?’’

Mu kiganiro aherutse kugirana na IGIHE, Umuyobozi w’Itorero ry’Abadivantisiti mu Rwanda, Pasiteri Dr Byiringiro Hesron yavuze ko batemera ko umukobwa utwite yasezeranywa n’iri torero.

Yagize ati “Iyo utanze uburere ku ishuri kandi bizagirira akamaro abo banyeshuri, ntabwo bibanezeza. Hari uburere mu muryango, hari uburere mu itorero no ku gihugu. Nkibwira ko ikibazo nk’icyo kitagarukwaho.”

Yakomeje agira ati “Abagomba gushyingiranwa, bagomba gushyingiranwa mu mategeko y’itorero, uretse no mu muryango hari amabwiriza umuryango washyiragaho yo gushyingira umukobwa.”

Abajijwe uko kuri bo bafata uyu muvugabutumwa, Dr Byiringiro yavuze ko Mpyisi ari umubyeyi w’itorero ariko bimwe mu byo yigisha akenshi biterwa n’uko ageze mu zabukuru.

Yagize ati “Pasiteri Mpyisi ni umubyeyi wanjye. Ni umubyeyi w’itorero, waribayemo igihe kirekire, yakoranye n’ababyeyi bacu, yakoze hirya no hino ariko umaze kumenya imyaka ye n’ibyo yaba avuga wabibonera igisubizo.”

Pasiteri Dr Byiringiro yavuze kandi ko kuba Mpyisi hari ibyo avuga ko bitafatwa nk’aho ariwe uba abivuze ahubwo abivuga kubera gusaza.

Mpyisi yigeze kubwira IGIHE ko ajya kwinjira mu Itorero ry’Abadiventisiti, yahuye n’umuntu amusaba kuyoboka Imana ariko ajyayo ku gahato.

Ati “Badusangaga aho turagiye inka i Rwamwata muri Nyanza, bakadufata ku gahato, bamara kukwandika wasiba kujyayo bagakubita so ibiboko.”

“Nemeye abadiventisiti ndetse barambwiye bati uko tukubwiye ubikore utyo ntukabaze.’’

Pasiteri Mpyisi yabaye umuvugabutumwa mu Itorero ry’Abadivantisiti igihe kinini, nyuma aza no kujya akora umurimo w’Imana kuri Radiyo zitandukanye.

Yabwirije kuri Radiyo Rwanda, Radiyo Ijwi ry’Ibyiringiro, n’Ubuntu Butangaje (Amazing Grace) ndetse na City Radio.

Mu 2017, uyu muvugabutumwa yavugaga ko afite amatsinda 10 atandukanye y’abantu yigisha Bibiliya kuko ashaka ko abantu bamenya igitabo cy’Imana.

Pasiteri Dr Byiringiro uyobora Itorero ry'Abadivantisiti b'Umunsi wa Karindwi yavuze ko afata Mpyisi nk'umubyeyi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .