Padiri Nyombayire yasubiyemo indirimbo ye yamamaye cyane kubera amabonekerwa y’i Kibeho

Yanditswe na Uwiduhaye Theos
Kuya 11 Ukwakira 2020 saa 01:15
Yasuwe :
0 0

Padiri Nyombayire Faustin azwiho kuba umuhanga muri Filozofiya, mu by’umuco nyarwanda no mu burezi, akaba n’umuhanzi w’indirimbo cyane cyane izihimbaza Imana muri Kiliziya Gatolika, yasubiyemo ‘Mwamikazi w’Isi w’Ijuru”, yamenyekanye cyane amabonekerwa y’i Kibeho agitangira gusakara.

Padiri Nyombayire yabwiye IGIHE ko indirimbo “Mwamikazi w’isi n’ijuru”, yayihimbye ataraba Padiri yiga muri Seminari nto ya Rwesero, ubwo yari ageze mu mwaka ubanziriza uwa nyuma.

Icyo gihe yari amaze kumenya ibyo gusobanura amanota ya muzika no kuyandika bizwi nka solfège ndetse akaba yari no mu baseminari bigisha abandi indirimbo bakanabaririmbisha mu Kiliziya.

Ngo ku mugoroba wa Tariki 15 Mata 1978, muri Seminari ya Rwesero habaye igitaramo cy’amasengesho yo gusaba Imana ngo itore benshi mu bayiyegurira, ari mu busaserdoti cyangwa mu zindi nzira zo kwiyegurira Imana.

Kirimbanyije, Padiri Nyombayire yumva arakirigitwa n’isengesho yabwira Bikiramariya mu ndirimbo, ariko atigeze abitegura ngo yandike iyo ndirimbo mu manota no mu magambo nk’uko ubundi abigenza iyo ahimba.

Yafashe gitari yari imuri hafi, atangira gucuranga anaririmba, akumva amagambo asa n’ayizana ariko afite aho aturuka, ubwo ndirimbo y’ibitero bitanu n’inyikirizo yabyo ayiririmba umujyo umwe arayirangiza, nk’usanzwe yarayiteguye.

Mu kuririmba iyo ndirimbo atari yarabanje gutegura, abihuza n’uko ubwo ari bwo yari amaze gusobanukirwa ko Imana imuhamagarira kuyibera umusaseridoti, dore ko ngo ubundi acyinjira mu iseminari atari byo yari agamije cyane.

Umwe mu bapadiri bari abarezi ku Rwesero, ngo hari ababikira yaje kwigisha iyo ndirimbo bari mu mwiherero, bityo iza no kugera mu ishuri ry’i Kibeho; maze mu gihe Bikiramariya yari atangiye kuhabonekera guhera mu mpera za 1981, ngo ayumvanye abana babonekerwaga abategeka kujya bayimuririmbira buri wa gatandatu saa cyenda, kandi ahavugitse ngo “Tumufashe gukiza Isi” bakazajya bahasubiramo. Ni uko “Mwamikazi w’Isi n’Ijuru” yamenyekanye biturutse i Kibeho.

Padiri Nyombayire wari warakomeje kujya mbere muri muzika agahimba n’izindi ndirimbo nyinshi zigizwe ahanini n’izisabanya abantu n’Imana, ntiyigeze yibagirwa cyangwa ngo ahe agaciro gake iriya ndirimbo umuntu yavuga ko ari iyo mu buto bwe, kuko ari iyibukiro rikomeye mu nzira ye y’ubusaserdoti.

Igitangaza benshi (ndetse na we ari mo), ni uko amagambo yayo wumva atsitse mu nyigisho no mu butumwa, ndetse n’ikinyarwanda kivugitse.

Ubwo yahimbaga urwunge rw’indirimbo za Misa ya Bikiramariya zitangirwa n’iyitwa ‘Turakuramutsa Mubyeyi Mutagatifu’ yarwise Misa ‘Mwamikazi w’Isi n’Ijuru’.

Mu 2018 hasohotse igitabo ‘Bantu Mwese Nimuhimbarwe’gikubiyemo indirimbo zisaga 60 zose Padiri Nyombayire Faustin yahimbye kugeza icyo gihe.

Ni igitabo kiboneka henshi mu Rwanda, kandi cyahawe n’uburenganzira bwa Kiliziya ku bihangano no ku nyandiko zijyanye koko n’ukwemera kwa Kiliziya, ariko guhimba ntiyabihagarikiye aho.

Mu gihe cya Guma mu Rugo, Padiri Nyombayire avuga ko yabonye akanya kisumbuye ko kunoza izo yari yarahimbye ntizandikwe no guhimba izindi ndetse yari yifuje ko inyinshi zaririmbwa n’amakorali abishoboye nka Chorale de Kigali n’andi basanzwe bakorana zikagera ku bantu ziherekeranyije n’icyo gitabo; gusa kubera ibihe bya Covid-19, amakorali ntabwo abona uko yegerana ngo yitoze uko bisanzwe.

Padiri Nyombayire Faustin yagize igitekerezo cyo guhugukira indirimbo asanganywe zitagombera amakorali, cyane izifite n’injyana kandi zihimbitse ku buryo ziba zihagije n’iyo ziririmbwe mu ijwi rimwe.

Zimwe muri zo rero yatangiye kuzitunganya mu buryo bw’ubu, afatanyijwe n’abasore bagize itsinda The Bright Five Singers bamaze kwamamara, banakoranye “Mwamikazi w’Isi n’Ijuru”.

Aho bibaye ngombwa agafata gitari ye agacuranga, n’ijwi rye akarishyiramo, maze zikazatangazwa vuba aha mu majwi, zimwe ndetse no mu mashusho. Aritegura gusohora indirimbo nka “Turi abawe Mubyeyi”, ‘Izina rye Yezu’, ‘Mana Nzima’ n’izisanzwe nka ‘Ngwino Roho Utwemeza’, ‘Nta kinanira Imana’,

Yahimbye izirimo nka ‘Ni wowe bugingo budashira’, ‘Bantu Mwese’, ‘Ndakuramutsa Mariya’, ‘Ndakwemera Nyagasani Nidukanguke Tube Maso’, ‘Duhindure Imitima Yacu’, ‘Alleluya Kristu Mwami Wacu (bamwe bita ‘Mu gitondo izuba rikirasa’).

Hari n’iza vuba nka ‘Tubeshejweho n’impuhwe zawe’, ‘Umutuzo’, ‘Wowe uhorana impuhwe’ n’izindi za Misa nka ‘Tubeshejweho n’impuhwe zawe’, ‘Umutuzo’, ‘Wowe Uhorana impuhwe’.

Padiri Nyombayire Faustin ni umwe mu bihayimana gatulika ufite impano ikomeye mu buhanzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .