Ni iki Bibiliya ivuga ku mibonano mpuzabitsina ikozwe mbere yo gushaka ?

Yanditswe na Iradukunda Serge
Kuya 22 Ugushyingo 2019 saa 08:32
Yasuwe :
0 0

Kimwe n’izindi ngingo zose zigize ubuzima bwa buri munsi Bibiliya igenda igarukaho mu bitabo byayo bitandukanye,ubusambanyi nabwo yagiye ibugarukaho kenshi.

Mu gitabo ‘Westcott-Hort’ cya Brooke Foss Westcott, afatanyije Fenton John Anthony Hort gisobanura ibijyanye n’isezerano rishya kivuga ko ubusambanyi muri Bibiliya busobanuye, guca inyuma uwo mwashakanye, gukora imibonano mpuzabitsina ku batarashaka ndetse n’ishyingiranwa ritemewe n’amategeko.

Ese Bibiliya igaragaza ubusambanyi nk’icyaha?

Bitandukanye na siyansi ndetse n’amategeko ya bimwe mu bihugu atabibona nk’icyaha igihe abantu b’ingaragu bakoze imibanano mpuzabitsina bujuje imyaka y’ubukure igenwa n’itegeko, Bibiliya yo ivuga ko uko waba ukuze kose imibonano mpuzabitsina ikozwe mbere yo gushaka ari icyaha.

Uretse intumwa Pawulo wagiye ugaruka cyane ku cyaha cy’ubusambanyi na Yezu ubwe agaragaza ko icyaha cyo gusambana gikomeye cyane ndetse ko aho kugira ngo ukigwemo wabura urugingo rushobora gutuma ucyishoramo

“Mwumvise ko byavuzwe ngo ‘Ntugasambane.’ Jyeweho ndababwira y’uko umuntu wese ureba umugore akamwifuza, aba amaze gusambana na we mu mutima we, Ijisho ryawe ry’iburyo nirigushuka rikakugusha, urinogore urite kure. Ibyiza ni uko wapfa ijisho rimwe, biruta ko umubiri wawe wose wajugunywa muri Gehinomu.( Matayo 5: 27-29)

Mu rwandiko rwa mbere intumwa Pawulo yandikiye Abakolinto hari aho agaragaza ko imibonano mpuzabitsina hagati y’abantu batashyingiranwe itaboneye ndetse ko umuntu akwiriye kugira umugabo cyangwa umugore we kugira ngo abyirinde.

Ati “Ariko ku bwo kwirinda gusambana, umugabo wese agire uwe mugore, n’umugore wese agire uwe mugabo”.( 1 Abakolinto 7:2)

Pawulo kandi mu rwandiko yandikiye Abatesalonike agaragaza neza ko kwirinda ubusambanyi mu bantu aricyo Imana ishaka ndetse agaragaza ko gutwarwa n’irari n’ubusambanyi ari iby’abatubaha Imana.

Ati: “Icyo Imana ishaka ni iki: ni ukwezwa kwanyu no kwirinda gusambana, ngo umuntu wese muri mwe amenye gutegeka umubiri we wezwe ufite icyubahiro, mudatwarwa n’irari ryo kurigira nk’abapagani batazi Imana”.( 1 Abatesalonike 4:3-5)

Bibiliya igaragaza neza ko igihe waba udashoboye kwifata byaba byiza ushatse umugore cyangwa umugabo

Ati: “Abatararongorana kandi n’abapfakazi, ndababwira y’uko icyiza kuri bo ari uko bagumya kumera nkanjye, ariko niba badashobora kwirinda barongorane, kuko ibyiza ari ukurongorana kuruta gushyuha”. (1 Abakolinto 7:8-9).

Ibyahumetswe byera bigaragaza ko icyaha cy’ubusambanyi gitandukanye n’ibindi byaha ndetse bikibutsa ko umubiri ukwiye kubahwa ugakoreshwa ibikwiye.

Ati: “Muzibukire gusambana. Ibindi byaha byose umuntu akora bikorerwa inyuma y’umubiri, ariko usambana aba akoze icyaha cyo mu mubiri we. Mbese ntimuzi y’uko imibiri yanyu ari insengero z’Umwuka Wera uri muri mwe, uwo mufite wavuye ku Mana? Kandi ntimuri abanyu ngo mwigenge, kuko mwaguzwe igiciro. Nuko rero mutume imibiri yanyu ihimbaza Imana”. ( 1 Abakorinto 6:18-20).

Uretse iyi mirongo Bibiliya ifite indi myinshi igaruka ku busambanyi ndetse n’itegeko rya 7 mu mategeko y’Imana ribuza gusambana

Bibiliya igaragaza neza ko igihe waba udashoboye kwifata byaba byiza ushatse umugore cyangwa umugabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza