Kwisubiraho nicyo gisubizo cy’ubuzima, igihe kiri kudushirana

Yanditswe na Padiri Victor Amerika
Kuya 24 Mutarama 2021 saa 09:40
Yasuwe :
0 0

Bavandimwe, nimuhorane Imana! Rimwe na rimwe hari ibyo tubona tukibaza byinshi, tukitotombera Imana cyangwa tukumva ko Imana itwivangiye muri gahunda zacu.

Yonasi yari yifitiye gahunda agiyemo ariko Imana imusanga mu bye imutuma kuburira umujyi wa Ninivi, Mariya yari yifitiye gahunda ze yitegura ubukwe na Yozefu ariko Imana iraza izanamo imigambi yayo, Pawulo yari yifitiye gahunda ye ajya i Damasi ariko Nyagasani aramubonekera, amaze kumumenya neza ahita yumva neza icyo akwiye gukora maze ahita ahindura icyerecyezo agana i Yeruzalemu, abigishwa ba Yezu (Bene Zebedeyi) nabo bari bibereye mu mirimo yabo ya buri munsi ndetse bari barobye n’amafi menshi ariko Yezu arabasanga aganira nabo, baremera, bituma bahindura izingiro ry’inyungu zabo, maze basiga byose aho baramukurikira.

Natwe, twemere ko Imana yinjira mu migambi yacu, maze muri byose haganze ugushaka kwayo.

Kwamamaza Ijambo ry’Imana birihutirwa

Ijwi ribwirwa Yonasi riti “Haguruka bwangu ujye i Ninivi, umujyi mugari, maze ubamenyeshe icyo nzakubwira” (Reba Yonasi 3, 1-2).

Na n’uyu munsi Imana iracyakoresha abantu yishakiye kugira ngo ibatume ku muryango wayo. Abantu bakeneye guhindukirira Imana bakareka imigenzereze yabo ishaje. Ngo Imana ibonye ukwisubiraho kwabo nayo ihindura imigambi yayo yo kubateza ibyago (Reba Yonasi 3, 10).

Birumvikana ko ibyago bidakomoka ku Mana ahubwo ko bikomoka ku gutera Imana umugongo, dukora ibyo twishakiye n’uko tubishaka. Aha Ijambo ry’Imana riratwereka ko ibyago bikomeye bituruka ku ngaruka zo kutumva ijwi ryayo. Kwamamaza Ijambo ry’Imana rero birihutirwa kugira ngo abantu nibaryumva babashe guhinduka maze babone ibyishimo nyabyo.

Igihe kiradushirana

Abantu benshi bakunze gukoresha iri jambo ngo: “igihe kiradushiranye” (Reba 1 Kor 7, 29). Iri jambo ntiryumvikana kimwe kuri bose kuko kuva na kera ryakomeje gukoreshwa mu gukebura abantu. Igihe kizahoraho kandi kizakomeza no gushira: Kizahoraho ku Mugenga w’ibihe kandi kizakomeza gushira ku byaremwe byose kuko burya “Icyagize intangiriro cyose kizagira n’iherezo”.

Uhereye igihe umwana avukiye, igihe gitangira kumushirana kuko iminsi yacu yo kubaho irabaze “Imyaka yo kubaho ni mirongo irindwi, ikaba mirongo inani ku bakomeye, isigaye iba yuzuyemo amarira n’imiruho kandi nayo igashira vuba tukaba turigendeye” (Reba Zaburi ya 90, 10).

Hari umusaza wari urwaye cyane muri ibi bihe byo guhangana n’icyorezo cya Covid 19 twirinda kujya ahari abantu benshi. Umusaza antumaho ngo muhe amasakramentu ya nyuma. Mpageze ndamubaza nti “Ese Muze, bambwiye ngo uranshaka, Ese birihutirwa ko ureba turi mu bihe bikomeye ntawe ugiterana ngo abantu basengere hamwe”.

Yaransubije ati “Mwana wa, ibyanjye birihutirwa, ndumva ndi mu bagenda! Ntureba iyi miti, ndayinywa ikanyica kurushaho! Ibiryo nabyo sinkibibasha! Numva ndi kugorana gusa. Nageze aho ndibaza nti ese ko ndi kwita ku mubiri wagenewe kubora, kuki ntita kuri roho yanjye kandi ari nayo izakomeza kubaho! Padi, nagutumyeho ngo uze usukure roho yanjye kuko numva amagara yo arimo kuncika”. Asoje ayo magambo nahise numva icyo yashakaga.

Icy’ingenzi rero si ukwirirwa twiganyira cyangwa dutera abandi ubwoba ngo igihe kirabashirana ahubwo ibyo bivugwe hagamijwe guhinduka no gukora icyo Imana ishaka. Icy’ingenzi si igihe tuzamara muri iki gihe, ahubwo icy’ingenzi ni icyo twagikozemo. Nta gihe cyo kugira nabi gikwiye kubaho, ab’Imana bahora baharanira kuyitunganira Igihe cyose.

Duhamagariwe kuroba abantu

Yezu yabwiye Bene Zebedeyi ati “Nimunkurikire, Nzabagira abarobyi b’Abantu” (Mk 1, 17). Ubusanzwe aba bigishwa bari bafite umurimo wo kuroba amafi none bahamagariwe kuroba abantu. Iyo umuntu arobye ifi, aba ayambuye ubuzima naho iyo arobye (urohoye) umuntu aba amuhaye kongera kubaho.

Muri ibi bihe bikomeye isi yose iri kurwana n’urugamba rwo gutsinda icyorezo cya Covid 19, ubuzima busa nk’ubwarohamye! Abantu benshi barihebye, ntibabona neza iherezo ryabyo! Bafite ubwoba, nta cyizere cy’ubuzima bafite, bamwe ndetse bafata icyemezo cyo kwiyahura! Bakeneye abantu bitanga bashobora kubasubiza ubuzima n’icyanga cyo kubaho bishimye.

Hari abantu benshi barimo kwitanga ndetse bashobora no kuhasiga ubuzima bwabo ariko biyemeje kurokora ubuzima bw’abarwaye iki cyorezo. Nibubahwe! Natwe tubasabiye umugisha.

Dusenge: Nyagasani Mana yacu, tumenyeshe inzira zawe. Dutoze kunyura mu tuyira twawe. Ni wowe Nzira, Ukuri n’Ubugingo. Niyo watunyuza mu byo tudashaka wowe utugeza ku byo twasengeye. Ni wowe Mugenga w’ibihe byose, igaragaze muri ibi bihe bikomeye isi irimo maze tubone umugisha uturutse iwawe.

Duhe kumva ijwi ryawe no gukora ibigushimisha kabone n’iyo byaba bihabanye n’ibyifuzo byacu.

Ha umugisha inzego zose, uyobore imyanzuro y’abayobozi b’ibihugu kugira ngo bakore icyarohora ubuzima bw’abantu, komeza imbaraga z’abaganga n’abandi bita ku buzima, ha Ijambo rikwiye abigisha bose mu izina ryawe kugira ngo bahumurize umuryango wawe maze ubwami bwawe buganze wowe Data wa twese uri mu ijuru. Amen

Padiri Victor Amerika

Padiri Victor AMERIKA


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .