Kuri Noheli, abavugabutumwa batanze ihumure ku Banyarwanda bashegeshwe na Covid-19

Yanditswe na Uwimana Abraham
Kuya 26 Ukuboza 2020 saa 01:31
Yasuwe :
0 0

Noheli y’uyu mwaka yizihijwe mu bihe bidasanzwe ndetse inizihizwa mu buryo budasanzwe kubera icyorezo cya Coronavirus, aho abenshi bayizihirije mu ngo bake bakaba ari bo bajya mu materaniro cyangwa mu misa aho basanzwe bateranira.

N’ubwo abenshi batabashije kujya mu nsengero ndetse n’izari zifunguye zikaba zari zemerewe kwakira gusa 50% y’ubushobozi bwazo, ababashije kuzigeramo mu kwizihiza Noheli, bahawe ubutumwa butandukanye bwabibukije ko Yesu Krsito hibukwa ivuka rye, ari umwami w’amahoro.

Abateraniye muri Kiliziya Gatulika, by’umwihariko kuri Paruwasi ya St Michel aho Arkiyepiskopi wa Kigali Antoine Cardinal Kambanda yasomeye misa, yababwiye ko umunsi wa Noheli ari uwo kwibuka uburyo Imana yicishije bugufi kugira ngo izamure umuntu imuheshe agaciro.

Yavuze ko Imana yakoze ibigaragara ko bidashoboka kuri Noheli kuko Yezu Kristu ari we Jambo waremye ijuru n’isi n’ibirimo byose.

Yongeyeho ko kuba Jambo waremye ijuru n’isi yarigize umuntu akabyarwa na Bikiramariya, ngo ari amayobera y’urukundo rw’Imana rurenze imyumvire y’abantu.

Yagize ati "Ikigoye ni uburyo Imana yemeye kwicisha bugufi kugira ngo yegere umuntu imukize. Mu kwitubya kwayo no kwicisha bugufi ikigira umuntu byaduhaye agaciro, umuntu yarazamuwe ndetse asumba abamalayika".

Mu itorero rya Evangelical Restoration Church i Masoro, mu karere ka Gasabo, Pasiteri Lydia U. Masasu, niwe wigishije aho yatanze ubutumwa bwo guhumuriza imitima y’abantu yaruhijwe n’ibi bihe by’icyorezo cya COVID-19.

Yavuze ko Yesu ari umwami w’amahoro, ati “Iki gitondo ndasaba ko Imana ihumuriza imitima yanyu ikomora ibikomere byanyu byose.”

Yifashishije urugero rw’abanyabwenge bavugwa muri Bibiliya, bakurikiye inyenyeri bagiye kureba umwami wavutse.

Pasiteri Masasu yavuze ko abanyabwenge bageze aho Umwami Yesu yavukiye, bamutuye amaturo gusa avuga ko icyo Yesu akeneye muri iyi minsi ari imitima imukorera.

Ati “Bahaye impano umwami w’impano zose. Uyu munsi Yesu ntabwo adushakaho impano zindi nyinshi, ahubwo ashaka ko twitanga nk’ibitambo bizima byera bishimwa ari ko kumukorera kwacu gukwiriye.”

Yongeyeho ati “Mwikomeze kuri Yesu ni we mpano iboneye, Imana yafashe imigisha yose twakenera iyibumbira muri Yesu iramuduha, uwakiriye Yesu aba yakiriye amahoro muri we.”

Muri Zion Temple Gatenga mu karere ka Kicukiro, bigishijwe n’umushumba w’iryo torero Apôtre Paul Gitwaza. Yagarutse ku mateka ya Yesu Kristo ndetse anasobanura cyane ku by’abantu baje kumuramya bwa mbere Bibiliya yita abanyabwenge, avuga ko batari abayuda ahubwo bari abanyamahanga.

Yagize ati “Biragaragaza ko Yesu yaziye abantu bose atari Abayuda gusa, kandi ni Umwami w’abami, amahitamo y’aba banyabwenge b’Iburasirazuba batari Abayuda, bisobanuye ko agakiza ari ak’abantu bose. Amahanga yose akwiye kumuramya, abakomeye cyangwa aboroheje, baba abasanzwe cyangwa abakomeye, buri wese akeneye Yesu.”

Gitwaza yibukije abayoboke be kandi ko aba banyabwenge bataje imbokoboko ahubwo bajyanye impano z’igitangaza.

Yasoje asaba abantu kwiyegurira Yesu kuko ari bwo butunzi butagira akagero, ati “Ndabasengera mwese kugira ngo mwiyegurire Yesu, kugira ngo na we abe uwanyu.”

Pasiteri Antoine Rutayisire wo mu Itorero Angilikani ry’u Rwanda, yabwiye abantu ko Yesu ari Emmanuel, bisobanuye ko Imana iri kumwe natwe, avuga ko abamufite imitima yabo itazatinya.

Ati “Imana yamye iri kumwe natwe, reka mbabwire, Imana ntiyigeze ivuga ko tutazaba mu bihe bikomeye, gusa yavuze ko itazigera idusiga twenyine. Muri iki gihe cy’icyorezo Imana iri kumwe natwe.”

Hagati aho mu zindi nsengero hirya no hino mu gihugu, bahawe ubutumwa butandukanye bwose bwagarukaga kuri Yesu Kristo.

Abakiristo bibukijwe kwishingikiriza kuri Yesu, bakamwizera kuko ari we ubasha guhindura ibihe, babwirwa ko ari we ubusha no guhindura abantu ibi bihe bya COVID-19 akabigira ibihe by’umunezero.

Umushumba wa Arkidiyosezi ya Kigali, Musenyeri Antoine Cardinal Kambanda yasabye abakristu kwishingikiriza kuri Yezu muri ibi bihe
Amateraniro yo kuri Noheli ntiyatabiriwe cyane bitewe n'ibihe byo guhashya Coronavirus
Abakirisitu basangijwe ubutumwa bw'ihumure muri ibi bihe
Abakirisitu basangijwe ubutumwa bw'ihumure muri ibi bihe bitoroshye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .