‘Ikamba’, indirimbo yavuguruwe na Patient Bizimana ayivomye ku bakobwa b’impanga

Yanditswe na Uwiduhaye Theos
Kuya 31 Nyakanga 2019 saa 09:30
Yasuwe :
0 0

Umuririmbyi umaze gushinga imizi mu ndirimbo zo kuramya no guhimbaza Imana, Bizimana Patient, umaze imyaka irenga icumi mu muziki yashyize hanze indirimbo nshya iri kuri album nshya y’ibihangano bivuga ku musaraba.

Iyi ndirimbo yagiye ahagaragara mu buryo bw’amajwi yakozwe na MadeBeats muri Made Beats Studio.

Patient Bizimana yashyize hanze indirimbo nshya nyuma y’izindi zirimo ‘Ikimenyetso’ n’iyitwa ‘Ijambo rya nyuma’ zagiye hanze mu minsi ishize zigize album y’indirimbo zirindwi ari gukora ijyanye n’umusaraba. Izajya hanze umwaka utaha.

Amagambo ayigize avuga cyane ku gaciro k’umusaraba, Yesu Kirisitu yabambweho ngo abamwizeye babone ubugingo buhoraho.

Hari aho aririmba ati “Ikamba wambitswe n’icumu watewe ni ho havuye agakiza nirata....Kubaho ni wowe, erega ni wowe nkomezi zanjye. Iminsi nimbaza ngo ko ntacogora, nzayihamiriza ko Yesu yankomereje umutima kandi icyizere cyose cy’ubuzima bw’ejo hazaza nkivoma mu maraso Yesu yampfiriye.’’

Patient Bizimana yabwiye IGIHE ko igitekerezo cyaturutse ku mpanga baririmbanye kera n’ubu bakaba bagikorana umurimo.

Ati “Ndashimira cyane abagore babiri twaririmbanaga umwe yitwa Cadeau undi yitwa Cadette, ni bo bagize uruhare kuri iyi ndirimbo. Twakoranye umurimo w’Imana kera, iyi ni indirimbo yabo navuguruye. Twabanye i Rubavu ubu tunabana hano i Kigali umwe muri bo ni umushumba muri Restoration Church.”

Bizimana yakoreye ibitaramo mu bihugu hafi ya byose bya Afurika y’Iburasirazuba, yaririmbiye mu Burayi n’ahandi henshi. Ni we muhanzi rukumbi mu bakora umuziki uhimbaza Imana mu Rwanda umaze gukora ibitaramo bikomeye ndetse bikagaragaramo abahanzi bubatse izina.

Azwiho gutegura ibitaramo ngarukamwaka bya ‘East Celebration’ byitabirwa n’ibihumbi by’abakunda umuziki we.

Mu 2016 yatumiye Solly Mahlangu, umunyempano ukomeye muri Afurika y’Epfo n’abandi batandukanye bagiye bamufasha mu myaka yatambutse.

Easter Celebration iheruka ni iya 2019 yatumiwemo umuhanzi Alka Mbumba ukomoka muri Repubulika Iharanira Demokarasi ya Congo, washimije benshi mu mbyino zihariye mu gitaramo cyizihirijwemo Pasika.

Patient Bizimana yashyize hanze indirimbo nshya yise 'Ikamba' ivuga ku ikamba ry'amahwa Yesu yambitswe ari ku musaraba

Patient Bizimana yatangiye umuziki nk’umwuga mu 2007 gusa ibyo kuririmbira Imana no kuramya yabyiyumvisemo mu 2002 nyuma y’igihe gito cyari gishize yinjiye muri Restoration Church.

Yavukiye muri Repubulika Iharanira Demokarasi ya Congo ku wa 1 Gashyantare 1987 akurira mu Rwanda. Amashuri abanza yayize mu Ishuri ribanza rya Umubano iwabo i Rubavu akomereza ayisumbuye muri Saint Fidèle aho yavuye ajya kuminuza mu Icungamutungo muri Kaminuza Yigenga ya Kigali (ULK).

Umuziki yawutangiye akiri muto, agitangira kwiyumvamo impano yatangiye kwihatira kwiga gucuranga piano mu rusengero hanyuma bigeze mu 2007 asohora indirimbo ye bwite yitwa ‘Andyohera’ ari nabwo benshi batangiye kumubwira ko afite ijwi ryiza.

Yakunzwe bidasanzwe mu ndirimbo ze nka ‘Iyo neza’, ‘Amagambo yanjye’, ‘Menye neza’ n’izindi.

Mbere yo kujya mu muziki, Patient Bizimana yakinnye umupira w’amaguru igihe kirekire gusa byageze mu 2000 amaze kuva muri Kiliziya Gatolika yakira agakiza ibya ruhago abivamo atangira kwita cyane ku gukorera Imana no gukora umuziki.

-  Umva indirimbo nshya ya Patient Bizimana yitwa ‘Ikamba’

Patient Bizimana ari gukora kuri album nshya izaba iriho indirimbo zivuga ku musaraba wa Yesu n'urupfu rwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza