Igisibo cy’Ukwezi kwa Ramadhan kizasozwa ku Cyumweru

Yanditswe na Twarabanye Venuste
Kuya 22 Gicurasi 2020 saa 11:00
Yasuwe :
0 0

Ubuyobozi bukuru bw’Umuryango w’Abayisilamu mu Rwanda (RMC) bwatangaje ko Umunsi Mukuru usoza igisibo gitagatifu cy’ukwezi kwa Ramadhan uzaba ku Cyumweru tariki 24 Gicurasi 2020.

Itangazo ryashyizweho umukono na Mufti w’u Rwanda, Sheikh Salim Hitimana, rimenyesha Abayisilamu ko isengesho ry’uwo Munsi Mukuru wa Iddil-El Fitri bazarikurikirana kuri Televiziyo y’u Rwanda guhera saa Moya kugeza saa Mbili za mu gitondo.

Ibyo bikaba bisobanuye ko isengesho rizabera mu ngo kubera kwirinda ikwirakwira rya COVID-19 iterwa na Coronavirus nk’uko RMC yabishimangiye.

Itangazo rigira riti “Ubuyobozi buboneyeho umwanya wo kumenyesha Abayisilamu ko mu rwego rwo kwirinda icyorezo cya COVID -19 amasengesho bazayakorera mu ngo zabo n’imiryango yabo.”

Ubusanzwe mu bihugu byinshi Umunsi wa Eid al-Fitr wizihizwaga byihariye n’Abayisilamu aho babyukira mu masengesho mu misigiti, agakurikirwa n’ibirori bihuza Abayisilamu n’abandi baba batumiye bishimira ko barangije igisibo gitagatifu amahoro.

Ibyo byose uyu mwaka ntibizakorwa uko byari bisanzwe kubera ingamba zashyizweho hirya no hino ku Isi zo guhangana na Coronavirus.

Muri rusange Igisibo nacyo cyakozwe mu buryo budasanzwe kubera ibihe bidasanzwe. Ibyakorerwaga mu misigiti, byakorewe mu ngo, uretse gutora Adhana byakomeje nk’ibisanzwe mu kwibutsa Abayisilamu isaha yo gusenga.

Ku Cyumweru azaba ari tariki 24 Gicurasi 2020 ku Ndangaminsi isanzwe, naho ku ya Islam izaba ari tariki ya 1 Ukwakira [bita Shawwar] umwaka wa 1441.

Ntabwo Abayisilamu bazosoreza igisibo muri Stade ya Kigali i Nyamirambo nkuko byari bisanzwe bigenda
Igisibo cy’Ukwezi kwa Ramadhan kizasozwa ku Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .