Ibyo wamenya ku ‘Ibanga ry’Amahoro’, agasozi Padiri Ubald azashyingurwaho

Yanditswe na Akayezu Jean de Dieu
Kuya 18 Mutarama 2021 saa 01:13
Yasuwe :
0 0

Padiri Ubald Rugirangoga witabye Imana ku wa 8 Mutarama 2021, aguye muri Leta Zunze Ubumwe za Amerika, azashyingurwa mu Rwanda.

Abo mu muryango wa Padiri Rugirangoga Ubald babwiye IGIHE ko nyuma ya misa n’amasengesho yo gusezera kuri nyakwigendera bizaba kuwa 27 Mutarama 2021, umubiri we uzacyurwa mu Rwanda.

Uwatanze amakuru yavuze kandi ko mu Rwanda hategurwe misa yo kumusabira no kumushyingura ku Gasozi k’Ibanga ry’Amahoro.

Agasozi k’Ibanga ry’Amahoro gaherereye mu kagari ka Kamatita, umurenge wa Gihundwe, akarere ka Rusizi, intara y’Uburengerazuba. Ni muri Diyosezi Gatolika ya Cyangugu, Paruwasi Nkanka, Santarari Muhari. Ni agasozi gafite ubuso busaga hegitari 25.

Iburasirazuba bw’ako Gasozi hari umugezi wa Nyandarama, mu Majyaruguru hari ishyamba rizwi nka Pharmakina, Iburengerazuba hari Ikiyaga cya Kivu, naho mu Majyepfo hari umudugudu wa Cyinzovu na Kamanyenga byo mu kagari ka Kamatita.

Amavu n’amavuko y’Ibanga ry’Amahoro

Padiri Ubald yabonye izuba muri Gashyantare 1955, avukiye mu yahoze ari Segiteri Rwabidege, Komini ya Karengera, Perefegitura ya Cyangugu. Kuri ubu ni mu Murenge wa Ruharambuga, muri Paruwasi Gatolika ya Mwezi.

Nyuma ya Jenoside yakorewe Abatutsi nibwo Padiri Ubald yatangije ibikorwa by’isanamitima kuri Paruwasi ya Mushaka iherereye mu Karere ka Rusizi. Intego ye yari iyo kunga Abanyarwanda bakongera bakabana batishishanya.

Muri iyi paruwasi ya Mushaka yahuje abishe n’abiciwe bagera muri 446 bibumbiye mu matsinda 10.

Nk’umuntu wagezweho bikomeye na Jenoside yakorewe Abatutsi mu 1994, Padiri Ubald Rugirangoga yiyumvisemo igitekerezo cyo gushaka ahantu abakiristu bazajya bahurira bagasenga basaba amahoro, bakivugururamo urukundo, bagasaba imbabazi bakanazitanga.

Yateganyaga ko aho hantu abakristu bajya bahakirira ibikomere bikomoka kuri Jenoside yakorewe Abatutsi n’ibindi bibazo abantu bahura na byo mu buzima bwa buri munsi birimo n’indwara zinyuranye.

Nibwo Musenyeri Jean-Damascène Bimenyimana wari Umushumba wa Diyosezi Gatorika ya Cyangugu yeretse Padiri Ubald isambu yaje kwitwa Ibanga ry’Amahoro. Padiri Ubald yarahashimye, cyane ko ari no ku nkombe z’ikiyaga cya Kivu, yahagereranije n’aho Yezu yakundaga kwigishiriza rubanda.

Ubald yahise ko atangira imirimo yo kuhatunganya. Yahimitse Bikiramariya Umwamikazi w’Urukundo, Bikiramariya Umwamikazi w’Amahoro, ahakora inzira ntagatifu zirimo inzira ya Rozari, inzira y’ishapure y’ububabare bwa Bikiramariya n’inzira y’umusaraba.

Izo nzira zose zitangirira kwa Bikiramariya w’I Kibeho maze zigasoreza kwa Yezu Nyirimpuhwe, ahari ingazi 21 zishushanya izo Yezu yazamutse agiye gucirwa urubanza na Pilato. Ubu bari kuhubaka Kiliziya nini kandi nziza cyane izahabwa umugisha mu ntangiriro z’umwaka utaha.

Tariki ya 27 Ugushyingo 2008, Musenyeri Bimenyimana yaturiye igitambo cy’Ukaristiya kuri ako gasozi maze atangaza ko kiswe ‘Agasozi k’Ibanga ry’Amahoro’.

Tariki ya 5 Kanama 2016, Musenyeri Bimenyimana yahaye umugisha za nzira ntagatifu n’amashusho. Kuri uwo munsi yanatangaje ku mugaragaro ko Agasozi k’Ibanga ry’Amahoro kabaye ubutaka butagatifu buzajya bukorerwaho ingendo nyobokamana z’abakiristu n’abandi bantu bose babyifuza.

By’umwihariko, buri tariki 13 za buri kwezi, itariki y’amabonekerwa y’i Fatima, Abakiristu benshi cyane barahateranira maze bagasenga. Mu ijoro riba ryabanjirije iyo tariki abakiristu benshi babishoboye baraharara maze bakarara basenga bakanahabwa isakaramentu ry’imbabazi.

Mu kiganiro IGIHE iherutse kugirana n’Umushumba wa Diyosezi ya Cyangugu, Musenyeri Hakizimana Célestin yatangaje ko ubwo Padiri Ubald yajyaga muri Amerika mu ntangiriro za 2020, yari yagiye mu bikorwa birimo no gushaka inkunga yo gukomeza kubaka ibikorwa remezo ku Ibanga ry’Amahoro.

Mu gihe cy'isengesho abantu baba baturutse mu mpande zose z'igihugu, hari n'abava mu mahanga bakaza kuhasengera
Ku Ibanga ry'Amahoro hasengera abantu b'ingeri zose
Ku Ibanga ry'Amahoro huzuye kiliziya nini isengerwamo n'abakirisitu bavuye impande zose
Uhageze ahabwa ikaze
Muri aka gace ni ho Padiri Ubald Rugirangoga azashyingurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .