Gutera amabuye shitani, kuzana ubutunzi: Ibidasanzwe ku mutambagiro Mutagatifu ubera i Mecca

Yanditswe na Akayezu Jean de Dieu
Kuya 31 Nyakanga 2019 saa 06:28
Yasuwe :
0 0

Inkingi ya Gatanu mu zubakiyeho idini ya Islam, ivuga ko umuyoboke w’iri dini nibura ategetswe gukora ‘Umutambagiro mutagatifu i Mecca’ ahari ubutaka butagatifu muri Arabia Saudite.

Mu rukererera rwo ku Cyumweru, mu ijoro rishyira ku wa Mbere tariki 29 Nyakanga 2019, Abanyarwanda 84 bo mu idini ya Islam bahagurutse ku kibuga cy’indege Mpuzamahanga cya Kigali I Kanombe berekeza i Mecca, aho bitabiriye Umutambagiro Mutagatifu [Le pélerinage à la Mecque].

Mu mpera z’ikinyejana cya karindwi nibwo abayisilamu baturutse hirya no hino batangiye kujya bakora umutambagiro mutagatifu i Mecca.

Gukora umutambagiro mutagatifu ni itegeko ry’Imana kandi ryatangiranye na Sekuru w’Intumwa Ibrahim [Aburahamu], cyane ko ubwo butaka bwubatseho ingoro ntagatifu aribwo bwatuweho n’Intumwa y’Imana Ismael akaba n’umuhungu wa Ibrahim.

Imana yategetse Ibrahim ko yagombaga kuhimurira umugore we n’umwana we Ismael, ari naho hatangiriye amateka y’ubu butaka butagatifu bwahoze ari ubutayu budatuwemo umuntu n’umwe.

Bisaba iki kujya i Mecca?

Kuba Umuyisilamu ntabwo bihagije kugira ngo umuntu yemererwe kwitabira uyu mutambagiro ahubwo ukwemera Imana imwe ndetse n’Intumwa yayo Muhamad (Imana imuhe amahoro n’imigisha), ubushake n’ubushobozi nibyo nyamukuru ku muyisilamu wemererwa kujya i Mecca.

Nk’urugero rwa hano mu Rwanda , Umuryango w’Abayisilamu, RMC [Rwanda Muslim Community], ureba niba koko usaba kujya i Mecca yujuje ibisabwa nyuma hakemezwa abagomba kujyayo hanagendewe ku mubare w’abo igihugu cya Arabia Saudite kubera umubare w’Abayisilamu bari mu gihugu.

Mu kiganiro Isi ya None cyo kuri Radio Rwanda cyari cyatumiyemo bamwe mu bafite ubumenyi bwisumbuye ku idini ya Islam, hagarutswe ku bibazo byibazwa na benshi ku mutambagiro mutagatifu w’Abayisilamu ukorwa buri mwaka.

Hadji Kabarisa Assumani yavuze ko ujya i Mecca, aba agomba kwishyura amafaranga y’icumbi i Mecca, akagira irindi cumbi i Madina, akishyura ay’urugendo n’ibindi bitandukanye.

Umunyarwanda wagiye i Mecca muri uyu mwaka wa 2019, yishyuye amadorali 3700, ni ukuvuga agera kuri miliyoni 3.4Frw.

Aya mafaranga yiyongeraho ay’impamba, ayo azakoresha agezeyo, ndetse n’utundi tuntu ashobora kugerayo agakenera kugura.

Ubuyobozi bwa Islam buvuga kandi ko ujyayo aba afite ubushobozi ku buryo atagomba gusiga iwe mu rugo bari mu bukene, bivuze ko hari amafaranga asabwa gusigira umuryango we kugira ngo yemererwe kugenda.

Amafaranga n’umubare w’abitabira uyu mutambagiro mutagatifu bitandukana bitewe n’igihugu ndetse n’umubare w’abayisilamu uri muri icyo gihugu.

Kuri iyi nshuro nibura abasaga miliyoni ebyiri baturutse hirya no hino ku Isi nibo bitabiriye uyu mutambagiro.

Abayisilamu babarirwa muri miliyoni buri mwaka bajya i Mecca mu mutambagiro mutagatifu

Ibikorerwa i Mecca biratangaje

Sheikh Hamdun asobanura impamvu y’uyu mutambagiro nk’ushingiye ku mateka Intumwa y’Imana yanyuzemo.

Yagize ati “Intumwa y’Imana [Mohamed], yakoze umutambagiro mutagatifu iri kumwe n’abasangirangendo bagera ku 100, irangije irababwira mu ijambo rimwe ngo nimumfatireho urugero ku bijyanye n’ibikorwa byanyu by’umutambagiro mutagatifu.”

Ibikorwa byose muri uyu mutambagiro bihura n’ibyakozwe n’Intumwa y’Imana kuko bishingiye kuri ayo mateka yanyuzemo.

Ugiye i Mecca aba agiye kugaragira Imana, kuyiyegereza no gusaba imbabazi za bimwe mu byaha aba yarakoze kandi ni koko Abayisilamu bizera ko usabye imbabazi yizeye azihabwa ndetse agahanagurwaho ibyaha byose.

Ugiyeyo aba agiye ari umushyitsi w’Uwiteka, gusaba Imana imbabazi na bagenzi be ashobora kuba yarakosereje.

Hadji Assumani wagiyeyo avuga ko “Ubwo nagendaga umwaka ushize twageze ku kibuga cy’indege ni ukuvuga twakoze ibirometero 25 kugira ngo tugere mu Mujyi wa Mecca, tuhageze dusanga abantu ni benshi.”

Yakomeje agira ati “Twarahageze tubanza kuzenguruka inshuro zirindwi twagiye aho umugore wa Abraham yazengurukaga ari gushaka uwamufasha cyangwa icyamutabara ku nyota umwana we yari afite n’inzara azenguruka ku musozi wa Safa n’uwa Marwa, yabikoze inshuro zirindwi niyo mpamvu natwe tubikora gutyo.”

Hadji Assumani akomeza avuga ko abayisilamu bari i Mecca, batarara muri hotel ahubwo haba hari amashitingi akoze neza ku buryo ariho bagenda barara.

Gutera amabuye Shitani

Imana yasabye Aburahamu gutamba umwana we Ismail, imfura ye yabyaranye na Hadjara, nyuma yaraje abwira umwana we ko Imana yamusabye kumutangaho igitambo, Ismail nawe aramusubiza ati ‘Dawe ubahiriza itegeko ry’Imana.’

Ubwo Aburahamu yajyaga gutamba umwana we, shitani yaraje iramubwira iti ni gute umuntu nkawe yafata umwana we akamubaga kubera ibyo yabonye mu nzozi.

Aburahamu yumvise shitani iri kumubuza kubaha Imana no gushyira mu bikorwa ibyo yamutegetse niko gufata amabuye atera shitani, yigira imbere agezeyo naho shitani irahamusanga arongera ayitera amabuye, ajya aha gatatu shitani imusangayo naho arongera ayitera amabuye.

Shitani yamaze kubona ko bitagishobotse gushuka Intumwa y’Imana nibwo yavuye ku izima gusa Aburahamu nawe amaze gufata icyuma atangiye kubaga umwana we Imana ihita imubwira kurekeraho kuko yari imaze kubona ko yayumviye.

Kuri ubu ahantu hatatu shitani yari ihagaze icyo gihe hashyizwe inkingi ndetse ugiye mu mutambagiro i Mecca asabwa kuzitera amabuye arindwi (imwe ) kugira ngo ashyire mu bikorwa ibyakozwe n’intumwa y’Imana.

Abanyarwanda ntibasiba umutambagiro mutagatifu i Mecca

Kuzana ubutunzi

Bimwe mu bikunze kuvugwa n’abadafite ubumenyi buhagije cyangwa abatari abayoboke b’idini ya Islam bakunze kuvuga ko uvuye i Mecca ahita aba umukire akenshi usanga bamwe bahita batangiza amaduka akomeye y’ubucuruzi cyangwa bagatangira kujya bajya mu mahanga kuranguza amakamyo.

Sheikh Sibomana Hamdun yasobanuye ko ugiye i Mecca, abona umwanya wo gusaba Imana kandi abenshi bayisaba ubutunzi.

Ati “Ikintu ugiyeyo ahavana ni uriya mugisha nanone imvugo nyinshi zigaragaza ko uwagiyeyo Imana ishyira imigisha myinshi mu byo akora, Imana imurinda ubukene, ntabwo ari ukuvuga ko hari ikintu cyangwa ubutunzi ahavana.”

Imyemerere y’idini ya Islam yemera ko buri muyisilamu wese wagiye gukora umutambagiro i Mecca, ahava yahindutse umu-hadji ku mugabo n’umu-hadjati ku mugore.

Uyu mutambagiro mutagatifu (Hijjah) uba buri mwaka, ugatangira ku tariki ya 8 y’ukwezi kwa 12 kw’Abarabu.

Benshi mu bawitabira bavuga ko nta kintu na kimwe mu buzima bwabo kibashimisha nko kujya i Mecca, bakibonera imva y’aho intumwa y’Imana Muhamad yashyinguwe, bityo bagasaba Imana kuzajyanwa mu ijuru.

Biteganyijwe ko uyu mutambagiro mutagatifu w’uyu mwaka uzatangira tariki 9 Kanama ugasozwa ku wa 14 Kanama 2019.

Ubwo abayisilamu 84 bari bagiye kwerekeza i Mecca ku Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza