Gianadda watumiwe na Christus y’i Remera yageze mu Rwanda afite amashyushyu yo gusura i Kibeho(Amafoto)

Yanditswe na Uwiduhaye Theos
Kuya 4 Ukwakira 2019 saa 08:09
Yasuwe :
0 0

Umuhanzi w’umufaransa w’ikirangirire mu njyana y’umuziki w’umwimerere (Classique) , Jean Claude Gianadda, yageze i Kigali mu gitaramo yatumiwemo na Kolari Christus Regnat yo mu Rwanda agaragaza ko afite inyota yo gusura i Kibeho.

Uyu muhanzi yageze i Kigali ku mugoroba wo kuri uyu wa Kane, mu masaha ya saa mbili ashyira saa tatu. Yavuze ko urugendo rwe kuva mu Bufaransa rwari rwiza. Yakiriwe n’itangazamakuru ndetse n’abagize iyi korali yamutumiye.

Aganira n’itangazamakuru yavuze ko asabwa kuza gutamira mu Rwanda yabyishimiye cyane, kuko yari amaze iminsi ataramira no mu bindi bihugu bya Afurika nka Sénégal, Madagascar , Togo na Bénin.

Ati “Narabyemeye kuko nari mfite amatsiko yo kumenya byinshi byihariye ku banyarwanda.”

Yavuze ko yiteguye kuba yakorana indirimbo n’iyi korali yamutumiye mu Rwanda kuko ifite umuziki mwiza, kuko yagiye yumva indirimbo zayo mbere yo kuza.

Ati “Mfite inzozi zo kugera i Kibeho ntabwo mpazi ariko ni ahantu h’umubyeyi Bikira Mariya. Nifuza ko umunsi umwe nazajya i Kibeho. Numvise abakobwa batatu bahaboneye ibonekerwa, nanjye ndifuza kugerayo.”

Jean Claude Gianadda yavutse mu 1944 mu Bufaransa[ubu afite imyaka 75]. Yabaye umwarimu wa Siyansi n’umuyobozi w’ ishuri rya Koreji Saint Bruno i Marseille mu Bufaransa kuva 1970 kugeza 1994.

Uyu muhanzi w’umunyabigwi yashyize hanze album ya mbere mu 1974 aho yafatanyaga kuririmba no kwigisha muri iyi koreji.

Ku myaka 50 y’amavuko yaje gusezera ku mwuga w’ubwarimu afata inzira yo kuririmba nk’ubutumwa bwe bw’ibanze muri Kiriziya Gatolika. Jean Claude Gianadda nk’umuririmbyi, yakoze indirimbo nyinshi cyane zikubiye muri za Album zirenga 100. Ni abahanzi bacye ku Isi afite aka gahigo.

Yaririmbye indirimbo zirimo ‘Tiens Ma Lampe Allumée’, Jésus me voici devant toi’, ‘Trouver dans ma vie Ta présence’ n’izindi. Yashyize hanze album nka ‘Qu’il est formidable d’aimer’, ‘Près de Toi Marie’ n’izindi.

Yashinze umuryango witwa ‘Association Jeunesse et Culture Saint-Bruno’. Intego nyamukuru y’uwo muryango zigabanyije mu bice bibiri birimo icyo kwibanda ku guteza imbere indirimbo zisingiza Imana.

Mu buzima busanzwe afasha abababaye haba mu gihugu cye kavukire ndetse n’ahandi ku isi yose.

Iki gitaramo uyu musaza yatumiwemo kizabera muri Kigali Conference and Exhibition Village [Camp Kigali], tariki 5 Ukwakira 2019, kuva saa kumi n’ebyiri z’umugoroba.

Kwinjira bizaba ari 10 000 Frw mu myanya y’imbere ndetse na 5 000 Frw ahasigaye. Hari n’ikindi kizaba ku wa 06 Ukwakira 2019 mu gitambo cya Misa, kizabera kuri Paruwasi Regina Pacis i Remera kuva saa yine za mu gitondo.

Korali Christus Regnat yashinzwe mu 2006, ivukira kuri Centre Christus i Remera mu Mujyi wa Kigali. Kuva mu 2008, ibarizwa kuri Paruwasi Regina Pacis i Remera. Ubu ifite imizingo itandatu y’indirimbo zabo mu buryo bw’amajwi, imaze gukora ibitaramo bikomeye bitatu.

Abamutumiye bamwakiranye ubwuzu
Jean Claude Gianadda waje mu Rwanda ni umunyabigwi mu muziki w'umwimerere
Mu byo afitiye amashyushyu harimo no kugera i Kibeho
Ni ku nshuro ya mbere Jean Claude Gianadda yari ageze i Kigali
Ubwo umuhanzi w’umufaransa w’ikirangirire Jean Claude Gianadda, yageraga i Kigali
Uyu mugabo afite imyaka 75 ariko aracyakomeye mu muziki

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza