Cardinal Kambanda yahawe inshingano nshya na Papa Francis

Yanditswe na IGIHE
Kuya 18 Ukuboza 2020 saa 09:31
Yasuwe :
0 0

Cardinal Kambanda Antoine yahawe inshingano nshya na Papa Francis, ashyirwa mu cyo umuntu yagereranya na Minisiteri ishinzwe Iyogezabutumwa ku Isi.

Umuntu wese ubaye Cardinal agira aho ashyirwa muri Guverinoma ya Papa ni yo mpamvu ku wa 16 Ukuboza Papa Francis yashyize mu myanya aba-Cardinal bashya aherutse kwimika. Cardinal Kambanda yashyizwe muri Congregation ishinzwe Iyogezabutumwa ku Isi.

“congrégation” y’iyogezabutumwa muri Kiliziya Gatolika, yashyizweho na Papa Gregory XV muri Kamena 1622, ifatwa nk’ihuriro rishinzwe kwamamaza amahame n’ukwemera kwa Kiliziya, ibizwi nka “Propaganda Fide”.

Padiri Mukuru wa Paruwasi ya Régina Pacis, Ntagungira Jean Bosco, yabwiye IGIHE ko ubusanzwe umuntu wese ugizwe Cardinal ahabwa n’izindi nshingano.

Ati “Iyo bataba muri Roma baba muri diyosezi zabo, burya baba bagomba kugira na Dicastère babarizwamo bakaba basa n’abari mu Nama y’Ubutegetsi yayo kugira ngo bajye bamenya ibikorerwamo, batange ibitekerezo, buri wese kugira ngo atange umusanzu kuri serivisi z’imirimo ya Papa.”

Dicastère muri Kiliziya Gatolika wayigereranya na Minisiteri isanzwe. Uyirimo si ngombwa ko ajya kuba i Roma, bivuze ko Cardinal Kambanda azajya ajya gukora imirimo ye aturutse i Kigali aho asanzwe aba.

Inshingano Dicastère Cardinal Kambanda yashyizwemo ni ukwamamaza ukwemera ku Isi hose, ndetse ni yo iba ifite inshingano zo guha umurongo kiliziya mu bikorwa bijyanye n’iyogezabutumwa birimo nko gushyiraho inzego z’abapadiri, guharanira ko havuka inzego nshya zishinzwe iyogezabutumwa ndetse n’inyandiko zaba zikenewe muri Kiliziya zijyanye nabyo.

Iyi congrégation ni yo yashyizeho itegeko ryo mu 1659 rizwi nka Magna Charta ribuza imigenzo imwe n’imwe y’igihugu ko yasanishwa n’ukwemera gatolika.

Ku wa 28 Ugushyingo 2020 nibwo Papa Francis yimitse Cardinal Kambanda
Cardinal Kambanda yashyizwe mu bashinzwe iyogezabutumwa muri Kiliziya Gatolika ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .