Apôtre Gitwaza yimitse abashumba barimo Pasiteri Ndizeye wayoboye GBU-KHI

Yanditswe na Uwase Joie Clarisse
Kuya 4 Mutarama 2020 saa 11:30
Yasuwe :
0 0

Umushumba w’Itorero Zion Temple Celebration Center ku Isi, Apôtre Dr. Paul Gitwaza, yimikishije amavuta aninjiza mu murimo w’ivugabutumwa abapasiteri bashya batandatu.

Uyu muhango wabereye muri Zion Temple Gatenga ku wa Gatandatu, tariki ya 4 Mutarama 2020.

Abasizwe amavuta y’ubushumba bari baherekejwe n’abafasha babo baturutse muri paruwase zitandukanye yo mu Rwanda. Barimo Gisore Richard w’i Rusizi, Sentozi August uhagarariye Rwamagana, Ngendahayo Jacques wotorewe guhagararira itorero rya Nyamagabe akaba yungirijwe na Habyarimana Alphonse, Ndizeye Olivier uhagarariye Itorero rya Ntarama na Wironja David w’i Bukavu.

Apôtre Gitwaza yasabye abasizwe amavuta kugira ubunyangamugayo no kubaha neza inshingano bahawe.

Yakomeje avuga ko ‘‘Ubu iyi ndahiro ibari ku mutwe kubera ko mwabivugiye imbere y’abamalayika n’itorero. Ikibazo muzagira muzaze munyegere tuzagikemura kandi mukomeze mukorere Imana.’’

Mu byo bahamagariwe harimo kwamamaza ubutumwa bwiza, umuzuko wa Kirisitu no kurinda itorero.

Gitwaza yabasabye kuba abungeri beza, ba bandi batabona isega igeze mu bana b’intama bagahunga.

Yakomeje ati “Ni umugambi w’Imana kuduha abungeri, ni umugambi w’Imana kwita ku ntama kandi buri ntama ikeneye umwungeri ariko siko buri mwungeri wese ari mwiza. Hari abungeri bakorera ibihembo n’abakoreshwa n’umuhamagaro.”

“Bibiliya iravuga ngo nzabaha abungeri bahwanye n’umutima wanjye. Umutima wa Yesu, umutima w’Imana ni umutima w’ubwungeri kuko Yesu ni Umwungeri usumba abandi. Bibiliya iravuga ngo Umwungeri mukuru naza azatanga ingororano.”

Pasiteri Ndizeye Olivier uhagarariye Itorero rya Ntarama rimaze umwaka rifunguye azwiho kugira ishyaka ryo guhindura benshi kuza kuri Kirisitu yatangarije IGIHE yishimiye inshingano nshya yahawe.

Ati “Ncishijwe bugufi imbere y’Imana n’abantu guhabwa inshingano zo kuba umushumba w’Imana n’abantu. Ni umurimo ukomeye ariko ibyo Imana inshakaho nari mfite isezerano guhera mu 2005 ryo kuzayobora ubwoko bw’Imana. Imyaka 15 irashize none uyu munsi birasohoye ; gusigwa bizana izindi mbaraga; nciye bugufi izo mbaraga zizankoreremo kugira ngo nkore ibyo Imana ishaka muri iki gihe.’’

Pasiteri Ndizeye yabaye Umuyobozi w’Umuryango w’Ivugabutumwa mu Ishuri rikuru ry’Ubuvuzi rya Kigali (KHI) rizwi nka GBU-KHI Nyamishaba.

Yashimiye cyane umufasha we Benimana Nadège umuba hafi cyane mu murimo Imana yamuhamagariye no kumusunikira neza mu muhamagaro we.

Pasiteri Ndizeye yakiriye agakiza ku wa 4 Ugushyingo 2001 ubwo yigaga mu mwaka wa kane w’amashuri yisumbuye kuri Groupe Scolaire de Rilima, ari naho yatangiriye umurimo w’ivugabutumwa, akomereza muri Groupe Scolaire de Kabare aho yagiye ayobora ivugabutumwa no gutoza abigishwa.

Yayoboye Umuryango w’Ivugabutumwa muri Kaminuza (Groupe Biblique Universitaire) muri KHI akaba ari n’umwe mu bakomeje gushyigikira uyu murimo muri za Kaminuza mu itsinda rigizwe n’abarangije kaminuza banyuze muri GBU bari mu kazi. Yakuriye anakorera umurimo w’Imana mu Itorero rya Miracle Center Rubirizi ari naho yasengewe bwa mbere nk’umukuru w’itorero.

Abashumba bimitswe batanze isezerano ryo kubaha umuhamagaro, kuba abizerwa no kwamamaza ubutumwa bwa Yesu Kirisitu nta kujenjeka.

Dr Paul Gitwaza uhagarariye Zion Temple ku Isi yasabye abapasiteri bashya bimitswe kwita ku ntama baragijwe
Abahawe inshingano basukwaho amavuta nkuko byakorwaga mu isezerano rya kera iyo umuntu yerezwaga gukora umurimo w'Imana
Abashumba bimitswe barambitsweho ibiganza basabirwa imigisha
Asaph Rwamagana ni yo yayoboye umwanya wo kuramya no guhimbaza Imana
Ruhagararabahunga Eric uhagarariye Intara y'Amajyepfo na we yitabiriye iki gikorwa
Apôtre Gitwaza yimitse abashumba barimo Pasiteri Ndizeye wayoboye GBU-KHI
Wari umunsi w'akanyamuneza...
Abashumba bimitswe bari baherekejwe n'abagore babo
Abapasiteri bimitswe banahawe ibyemezo bigaragaza inshingano nshya bahawe
Habyarimana Alphonse wo mu Itorero rya Nyamagabe ari kumwe na Apôtre Gitwaza wari umaze kumwimika
Nyuma yo kwimikwa kw'abashumba hafashwe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza