Ubutinganyi, kwigira…Ikiganiro na Musenyeri Mbanda wa Angilikani

Yanditswe na Ferdinand Maniraguha
Kuya 29 Kanama 2018 saa 04:47
Yasuwe :
0 0

Angilikani ni rimwe mu matorero make amaze igihe kinini ashinzwe mu Rwanda kuko imaze imyaka isaga 90, ikagira abayoboke barenga miliyoni.

Ibibazo byaryo ntibitandukanye cyane n’iby’andi madini ari mu Rwanda kuko akenshi bishingiye ku mikoro make.

Musenyeri Laurent Mbanda amaze amezi abiri n’igice atorewe kuyobora iryo torero aho yasimbuye Onesphore Rwaje wagiye mu kiruhuko cy’izabukuru.

Ubwo yimikwaga, Mbanda w’imyaka 64 yasezeranyije Abangilikani byinshi birimo kuvana urubyiruko mu bukene, kubaka Kaminuza no gusiga iryo torero ritagitega amaboko.

Yaganiriye na IGIHE avuga byinshi kuri iyo mishinga, aho Angilikani ku Isi ihagaze nyuma yo gucikamo ibice kubera ubutinganyi ndetse n’ibindi.

IGIHE: Ni iyihe mishinga mushyize imbere muri manda yanyu nk’umuyobozi w’iri torero?

Mbanda: Turi gutekereza ibintu twakora ku buryo byatwinjiriza amafaranga bigatuma tutajya gusabiriza.

Kimwe tugomba gutangira mu gihe cya vuba ni ukubaka inzu y’ubucuruzi ishobora kubamo n’ibiro byo gukoreramo. Tumaze kubona uruhushya rwo kubaka turateganya ko mu minsi ya vuba turabitangira.

Ikindi turi guteganya imishinga twakora dufatanyije nk’amadiyosezi, tugahuriza ku mushinga umwe, tukawigaho tukawutekereza.

IGIHE: Ubusanzwe inkunga Angilikani ikoresha zavaga he?

Mbanda: Inkunga nini iva mu madiyosezi yacu agerageza uko ashoboye kugira ngo agire icyo atanga gifasha biro ya Angilikani. Ntabwo ari inkunga nyinshi ziva hanze nubwo rimwe na rimwe tubivuga umuntu akagira ngo hari iziva hanze nyinshi.

IGIHE: Hari abantu bahoze babatera inkunga ubu bemera ubutinganyi kandi mwe ntimubwemera, ubu baracyabafasha?

Mbanda: Nibyo twakoranaga na The Episcopal Church of America yari ifite uburyo iduha imfashanyo. Aho dufatiye icyemezo cy’uko tudashobora kwakira amafaranga atuma tugurisha umutima wacu, twasanze ayo mafaranga tudashobora kuyakira. Na bo ntibashobora kuyaduha batazi ko twemeranywa na bo.

Ntabwo dushobora kwigurisha. Ntabwo dushobora kuvuga ngo twakire amafaranga kugira ngo dukunde tubeho ariko imyemerere yacu, imyizerere yacu, indangagaciro zacu tubigurishe.

IGIHE: Bizatwara igihe kingana iki ngo Angilikani y’u Rwanda yihaze idategereje inkunga z’amahanga?

Mbanda: Imyaka itanu mfatanyije na bagenzi banjye b’abepisikopi niyo twihaye ngo duhuze imbaraga, duhuze umutima dusenge, turebe duti ‘ese nta hantu twaba twigejeje’? Simvuga ko tuzaba tugeze ijana ku ijana mu kwitunga ariko byibuze tugire aho tugera.

IGIHE: Mwahize ko umwaka utaha muzatangiza Kaminuza ya mbere y’abangilikani, ntabwo ari igipindi?

Mbanda: Oya, twari dusanzwe dufite ishuri ryitwa Kigali Anglican Theological College ryigishaga abapasitori, niryo tugiye kwinjiramo tukarihinduramo Kaminuza yitwa East African Christian university.

Hari inyubako yari imaze imyaka umunani yaratangiye ntaho iragera, ubu rero turi kuyubaka ku buryo uyu munsi igeze kure, nko mu kwezi kwa cumi gushira turaba tuyirangije neza.

Mu kwezi kwa mbere izatangira. Turi gushaka abazayobora ishuri, turashaka abarimu. Tuzahera ku masomo y’Iyobokamana, ibijyanye n’ubuzima, Ubuyobozi n’uburezi.

IGIHE: Hari insengero za Angilikani zigera kuri 204 zafunzwe, mugeze he muzifunguza?

Mbanda: Hafunzwe nyinshi ariko izimaze gufungurwa nizo nyinshi kurusha. Hari nyinshi zitari zikwije ibyasabwaga ariko hari na nyinshi twahise twihutira gukora ibyasabwaga zirafungurwa, izitarafungurwa nazo turi gukora ibishoboka ngo zifungurwe.

Gusa nibaza ko hari ibintu dukabya cyane. Turavuga ngo zarafunzwe ariko ntitureba ese zafungiwe iki? Hari nk’ahantu ujya ugiye gusengerayo, washaka aho wihagaraika ukahabura, washaka aho wikinga ashwi da! None se koko tuvugishije ukuri nta marangamutima, umuturage wo mu cyaro we ntiyaza ati ariko hari ikintu kibuze?

IGIHE: Angilikani ku Isi ihagaze ite muri iki gihe?

Mbanda: Itorero Angilikani uyu munsi rihagaze neza cyane, abantu bariho baraza ku gakiza. Yego hari abagira gutya bati ‘ twiyomoye kuri aba’ ariko abo ni bake cyane byongeye ibyo ni ibintu tuzi mu mateka y’itorero.

Hari igihe mwibaza ngo mu Itorero harimo abamalayika gusa, nta bamalayika babamo ahubwo harimo abantu barwaye.
Ni abanyabyaha bakijijwe n’ubuntu bw’Imana, abandi ntibaranakizwa.

IGIHE: Uyu munsi igice cyemera ubutinganyi kiracyafatwa nk’ikigize Angilikani cyangwa cyavuyemo?

Mbanda: Biterwa n’uko ushaka kubivuga kuko mu bangilikani harimo abemera ubutinganyi ariko abenshi ntibabwemera.

Nko mu Itorero rya Angilikani muri Amerika abatemera ubutinganyi bavuyemo bashyiraho icyo bise Anglican Church in North America. Iyo rero itemera ubutinganyi niyo ifatanyije natwe kuko ntitubwemera.Abangilikani b’ukuri ni abahagaze ku ijambo ry’Imana kandi bemera ko Kristo ari umwana w’Imana.

IGIHE: Ni uruhe ruhare Angilikani y’u Rwanda yagize mu gufasha abatemera ubutinganyi muri Amerika?

Mbanda: Itorero ryo mu Rwanda risa n’aho ryahaye ubuhungiro ba bandi bari bavuye muri Episcopal Church of America, birukanywemo kubera ko bizera ijambo ry’Imana kandi batemera ubutinganyi.

Abo rero bashatse abo bafatanya, Angilikani y’u Rwanda iremera iti ‘tuzafatanya namwe kandi tuzabashyigikira mwe muhakana ubutinganyi kandi mutemera ko Itorero riyoborwa n’abatinganyi’.

Bazaga nk’impunzi zirukanywe ndetse bamwe bambuwe n’insengero zabo.

Aya matorero menshi yabarizwaga muri Angilikani y’u Rwanda n’abasenyeri babo babarizwaga hano.Igihe cyaje kugera turabacutsa noneho tubereka inzira y’aho bajya, barifatanya bahinduka Anglican Church in North America.

Igice kitemera ubutinganyi muri Angilikani kigize 60 % by’amatorero ya Angilikani ku Isi, yiganjemo ayo mu bihugu byo muri Afurika.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza