Nyuma ya Kaminuza, Abangilikani barashaka kubaka ibitaro na Stade mu Rwanda

Yanditswe na Ferdinand Maniraguha
Kuya 22 Ukuboza 2019 saa 07:58
Yasuwe :
0 0

Itorero Angilikani ry’u Rwanda ryatangaje ko nyuma yo kuzuza ibikorwa remezo birimo Kaminuza izatangira gukora muri Mutarama 2020, bagiye no kubaka ibindi birimo Stade n’ibitaro.

Byangajwe kuri iki Cyumweru mu gikorwa cyateguwe n’itorero Angilikani ry’u Rwanda ryamurikiraga abakiristo ku mugaragaro ibikorwa ryakoze mu mezi 18 ribonye umwepisikopi Mukuru mushya Dr Laurent Mbanda, igikorwa cyabereye kuri Katederali ya Diyosezi ya Gasabo.

Umwepisikopi Mukuru w’Itorero Angilikani ry’u Rwanda Dr.Laurent Mbanda yavuze ko ubwo yarahiriraga inshingano nshya tariki ya 10 Kamena 2018 yemeye ibikorwa azakora mu gihe cy’imyaka itanu bikubiye mu nkingi eshanu zirimo ivugabutumwa,kwigisha abakozi b’itorero banatangiza Kaminuza y’abangilikani , gushyira imbaraga mu burezi bahereye mu marerero n’ibindi.

Dr Laurent Mbanda yavuze ko mu gihe cy’amezi 18 itorero rimaze gukora byinshi birimo kubaka Kaminuza y’Abangilikani i Kabuga izatangira muri Mutarama 2020, kubaka icumbi ry’Umwepisikopi Mukuru i Kibagabaga no kubaka amashuri y’amarerero mu gihugu hose asaga 400.

Mu bindi bikorwa Angilikani imaze gukora harimo kuba ryujuje Katederali y’igihugu i Kibagaba ,ubu bakaba bari no kubaka inzu z’ubucuruzi zizaba zuzuye mu ntangiriro ya 2020 .

Musenyeri Dr.Laurent Mbanda yatangarije abakristo ko usibye ibyo bimaze gukorwa ubu bagiye gutangiza imishinga mishya irimo kubaka ibitaro muri Gasabo i Bumbogo n’ibindi bibiri hanze ya Kigali ,gutangiza ikigo cy’imari ( Anglican Church Sacco),kubaka ikigo cy’ubukerarugendo cyizajya kigisha amateka y’ububyutse i Gahini, gutangiza ikigo cy’ubushakashatsi ku bibazo abaturage bahura nabyo i Kabuga no kubaka Stade Mpuzamahanga i Kabuga izajya yakira imikino yose ,ibi byose bikazatangira gushyirwa mu bikorwa umwaka utaha

Minisitiri w’ubutegetsi bw’igihugu, Prof. Shyaka Anastase yashimiye itorero ry’Abangilikani ku bikorwa bari gukora bijyanye n’icyerekezo cy’igihugu mu iterambere, avuga ko nka Leta bashimishijwe n’umushinga wo kubaka kaminuza izajya itegura abapasiteri.

Yanashimye by’umwihariko imbaraga itorero ryagaragaje mu kubaka amashuri y’inshuke arera abana mu gihugu hose, avuga ko bari gusubiza umuhigo igihugu cyihaye wo kubaka uburezi bahereye hasi.

Yagize ati “Ibi biragaragaza ko mufite abayobozi beza kuko ibyo yadusezeranyije dutangiye kubibona mu gihe gito.”

Minisitiri Shyaka yashimye umuco mwiza wo kumurikira abakiristu ibikorerwa mu itorero nk’ikimenyetso cyo gukora neza no gukorera mu mucyo ,abizeza ubufatanye.

Itorero Angilikani ubu rifite diyosezi 11, mu gihe cyavuba bakaba bagiye gutangiza izindi ebyiri arizo Kibuye na Nyaruguru.

Musenyeri Dr Mbanda niwe wayoboye amateraniro yo kuri iki Cyumweru
Minisitiri Shyaka yashimiye ibimaze kugerwa mu gihe Musenyeri Mbanda amaze ayobora Angilikani
Minisitiri Shyaka yavuze ko umusanzu Itorero Angilikani ry'u Rwanda rimaze gutanga mu iterambere ry'igihugu
Umuhango wo kumurika ibimaze kugerwaho witabiriwe n'abantu batandukanye
Francois Kanimba (iburyo) ni umwe mu bitabiriye
Hakaswe umutsima hishimirwa ibimaze kugerwaho mu gihe Dr Mbanda amaze ayobora EAR
Musenyeri Dr Laurent Mbanda yavuze ko mu bikorwa bateganya vuba aha harimo kubaka ibitaro na Stade mpuzamahanga
Minisitiri Shyaka afata ifoto y'urwibutso n'abayobozi ba EAR
Itorero Angilikani ry'u Rwanda ryujuje Kaminuza i Kabuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .