Abanyamadini bavuze kuri Gitwaza wiyise ‘umuhanuzi uruta abandi’

Yanditswe na IGIHE
Kuya 25 Nzeri 2018 saa 12:58
Yasuwe :
0 0

Guhera mu ntangiriro z’iki Cyumweru ku mbuga nkoranyamabaga mu Rwanda hari gucicikana amashusho agaragaza Umuyobozi w’Itorero Zion Temple, Apôtre Dr Gitwaza Paul, aho avuga ko nta wundi muhanuzi umuruta mu Rwanda no muri Afurika.

Ni amashusho yafashwe ku mugoroba wa tariki 30 Kanama 2018 ku rusengero rwa Zion Temple Gatenga, aho yatangaga icyigisho gifite umutwe ugira uti “ibimenyetso by’ibitangaza’.

Uwo munsi Gitwaza yagize ati “Sinzi niba muri iki gihugu hari umuhanuzi unduta. Ibi mbabwira si ukwirata kandi Imana ibimbababarire niba hari akantu ko kwirata kandimo. Sinzi ko muri iki gihugu, muri Afurika mufite umuhanuzi umeze nkanjye. Birashoboka ko azaza ariko muri iki gihe ndiho ntimuzamubona. Muzamushakishe mumumbwire.”

Gitwaza yagarukaga ku byo yari amaze kuvuga, by’uko yagiye ahura n’ibigeragezo byinshi, akitwa igisambo, umusambanyi, umupfumu n’ibindi ariko agakomeza gukora umurimo w’Imana kandi akabitsinda.

Yavuze ko nubwo batakwemera ko ari we muhanuzi ukomeye ubu, ngo bazabyemera atakiriho.

Ati “Ndababwiza ukuri muzabimenya naragiye. Hari ahandi bazanyemera. Kubakwa kw’iki gihugu mbifitemo uruhare runini cyane. Nahanuye nka Ezekiyeli kugira no amagufwa yongere abeho kandi intambara naciyemo nta wundi mukozi w’Imana uzazicamo cyangwa waziciyemo.”

Nyuma yo gusakara kw’ayo mashusho, ntiyavuzweho rumwe haba mu binyamakuru no ku mbuga nkoranyambaga.

Ubusanzwe amadini yose ntiyemera abahanuzi batari abagaragara muri Bibiliya. Ku babemera, umuhanuzi ni umuntu ushobora kubona ibizaba akoreshejwe n’umwuka w’Imana akabivuga, igihe cyagera bikazagaragara uko yabivuze.

IGIHE yaganiriye n’abandi banyamadini batandukanye mu Rwanda, bagaragaza uko bafashe ayo magambo ya Gitwaza.

Umuvugizi wa Kiliziya Gatolika akaba n’umwepiskopi wa Diyosezi ya Butare, Philippe Rukamba, yabwiye IGIHE ko batemera iby’ubuhanuzi.

Yagize ati “Hari ibintu wenda nk’amabonekerwa ashobora kubaho, nayo tuyemera buhoro cyane. Buriya nka Kibeho kugira ngo yemerwe hari hashize imyaka 25 nibura. [Ibyo dukora] ni ibisanzwe aho ufata Bibiliya ukayisoma, ukagerageza kuyishyira mu buzima bwawe ariko ibyo kuvuga ngo Isi izashira ejo bundi cyangwa hagiye kuba ibi, ntabwo tubyemera.”

Rukamba avuga ko na we ahubwo hari ubuhanuzi asigaye yumva bukamutera ubwoba.

Ati “Hari ubuhanuzi buntera n’ubwoba busigaye buriho. Barakubwira bati ‘turahanura wowe Imana iragukiza ntuzongere no kunywa imiti, ntuzongere kureba muganga, emera gusa usenge.’ Ibyo ntabwo ari byo, twe ntitubyemera, ni amafuti. Niba Imana igukijije yerekana ko wakize. Kuvuga gusa ngo emera nta kintu kibigaragaza, ushobora no kubimbwira utarakize.”

Bishop Marguerite Rwandamura, Umushumba w’Itorero United Christian Church, Ishami rya Gikondo, yavuze ko mu Itorero rye bemera ubuhanuzi gusa ngo nta bwo yamenya ikigenderwaho ngo umuntu avuge ko ari we wa mbere.

Yagize ati “Njye simuhakanya ko ari umuhanuzi ariko kumenya urwego ariho ntabwo ndi Imana cyangwa umwuka wera. Ntabwo nzi abarusha abandi, ntabwo nzi abaza ku mwanya wa mbere […] icyo nemera ni uko abahanuzi bariho kandi ubuhanuzi bw’ukuri n’ubw’ibinyoma bubaho.”

Rwandamura avuga ko abakirisito basabwa guhagarara ku ijambo ry’Imana kugira ngo babashe gutahura abahanura ukuri n’ibinyoma.

Ati “Iyo umuntu ahamye ku ijambo ry’Imana akaryiga akarisobanukirwa, akaryemera, abahanuzi iyo baje ntibashobora kumutesha umurongo.”

Bishop Murekezi Simon Masasu uyobora Restoration Church i Rubavu, yabwiye IGIHE, ko bemera ubuhanuzi ariko uvuga ko ngo sibyo kuvuga ko hari uruta abandi.

Avuga ko mu ivugabutumwa hagomba kubaho abantu batanu bafite imihamagaro itandukanye barimo intumwa, umuhanuzi, umuvugabutumwa, umupasitori n’umwarimu kandi bose buzuzanya.

Yagize ati “Uwo aribeshya kuko Bibiliya ivuga ko mu mihamagaro uko ari itanu biruzuzanya kugira ngo Imana ikore. Uwo rero afite ya kamere gusa imukoresha. Umuntu w’Imana ni umuntu uca bugufi akumva, akagirwa inama kandi akamenya ko iyo Imana imuhaye ubutumwa kugira ngo abusoze neza umwuka w’Imana niwo umukoresha.”

Masasu we yavuze ko bitanashoboka ko umuntu aba umuhanuzi ngo abe n’intumwa icyarimwe.

Ati “Kuki yiyita intumwa kandi akiyita n’umuhanuzi? Urumva ko agiye kuvanga ibintu bibiri icyarimwe. Haba harimo akantu k’ubuyobe. Abahanuzi babayeho na kera, baracyariho kandi si we wenyine.”

Umuyobozi w’Itorero Zeraphath Holy Church, Bishop Harerimana Jean Bosco, yavuze ko nta muhanuzi umenya ko ari we, ngo abo akorera ibitangaza nibo bamumenya.

Ati “Eliya yigeze kubwira Imana ko ari we muhanuzi usigaye, Imana iramubwira iti uribeshye hari ibindi bihumbi by’abahanuzi biri inyuma. Imana yahise imusaba kurangiza umurimo we, imusaba kwimika uzamusimbura Elisa akarangiza urugendo rwe.”

Yavuze ko igihe umuntu atangiye kwivuga ibigwi mu murimo w’Imana ngo aba atangiye kunanirwa.

Ati “Ibyo ukora nibyo bikwamamaza, iyo utangiya kwiyamamaza uba watangiye kunanirwa.”

Apôtre Paul Gitwaza yakunze kumvikana mu buhanuzi bwo mu bihe bitandukanye butavuzweho rumwe.

Mu 2015 yahanuye iby’imperuka y’Isi, bica igikuba muri rubanda ariko birangira itabaye.

Ibi nyuma yarabihakanye. Ati "Sinavuze ko Isi izarangira ku itariki 28 Nzeri. Impamvu ntabivuga ni uko Bibiliya itatubwira umunsi, icya kabiri nanjye nzi umunsi Isi izarangirira nta ngendo najyamo, sinakwigisha abantu gukora no gutekereza no kureba imbere.’’

Si Gitwaza wenyine wakunze guhanura ibintu ntibivugweho rumwe, kuko umwaka ushize Bishop Innocent Rugagi uyobora Redeemed Gospel Church, yahanuriye umwe mu bakobwa bahataniraga ikamba rya Miss Rwanda ko azaritwara, ntibyakunda.

Muri uwo mwaka kandi hari amashusho ataravuzweho rumwe yamugaragaje yaturira imigisha ku bakiristo be bifuza amafaranga, imodoka, inzu n’ibindi bitewe n’icyo umuntu yifuza, ko bagiye kubibona mu gihe gito.

Umva Gitwaza avuga ko nta muhanuzi umuruta muri Afurika

Apôtre Dr Paul Gitwaza yavuze ko nta wundi muhanuza umuruta muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza