Amakuru y’urupfu rwa Bruce Glover yabanje kuvugwa ubwo umuhungu we, Crispin Glover yashyiraga ku mbuga ze amafoto menshi ya se, aho benshi batekereje ko yaba yitabye Imana.

Crispin Glover waciye amarenga ko se yapfuye, asanzwe ari mu bakinnyi ba filime bakomeye i Hollywood, aho yamamaye muri filime nyinshi zirimo ‘American God’s’.

Aya makuru y’urupfu rwa Bruce Glover yemejwe n’umuhagarariye watangarije TMZ ko nubwo amakuru y’urupfu rwe amenyekanye ubu, hashize iminsi bibaye kuko yitabye Imana ku itariki 12 Werurwe 2025.

Ntihigeze hatangazwa icyahitanye Bruce Glover uretse ko bivugwa ko yaba yarazize urupfu rutunguranye.

Bruce Glover wari umaze igihe yaragiye mu kiruhuko cy’izabukuru atagikina filime, ni umwe mu bakunzwe muri sinema mu myaka yashize.

Yamamaye muri filime zirimo nka ‘Diamonds Are Forever’, ‘Stunts’, ‘Walking Tall’, ‘Die Hard:Dracula’, ‘Simon Says’ n’izindi nyinshi.

Yitabye Imana afite imyaka 92 y’amavuko. Asize abana babiri barimo Crispin Glover umenyerewe mu gukina filime hamwe na Michael Leigh Glover.

Umukinnyi wa filime Bruce Glover yitabye Imana