00:00:00 IGIHE NETWORK KN KINYARWANDA EN ENGLISH FR FRANCAIS

Netflix igiye kuzamura ibiciro by’ifatabuguzi

Yanditswe na Uwiduhaye Theos
Kuya 21 Mutarama 2021 saa 12:41
Yasuwe :
0 0

Nyuma yaho ibiciro bya Netflix muri Leta Zunze Ubumwe za Amerika na Canada bizamutse, mu Burayi ndetse n’ahandi hose ku Isi naho bishoboka kuzamurwa vuba.

Netflix iheruka gutangaza ko imaze kugira abafashe ubuguzi bagera kuri miliyoni 200 ndetse mu 2021 irateganya kongera ibyo isanzwe isangiza abayifasheho ifatabuguzi ugereranyije na 2020.

Greg Peters ukuriye ikipe ishinzwe ibicuruzwa bya Netflix, yavuze ko basanzwe baha abafatabuguzi babo ibintu bifite agaciro gasumbye cyane amafaranga bishyura.

Ati “Turacyari mu igerageza, tureba ingano y’ibyo duha abantu bishya bigakundwa. Ibijyanye n’indimi zikoreshwa mu gihugu runaka turi gutangamo serivisi n’ibipimo fatizo […] Kandi turavuga ko, twizera ko rwose duha abanyamuryango bacu ibintu by’agaciro kisumbuyeho; kandi niba aribyo, turatekereza ko aricyo gihe gikwiye cyo gusubira inyuma tubasaba kwishyura make yisumbuye ku yo basanzwe batanga kugira ngo dushobore gukomeza guteza imbere ibyo dukora.”

Mu bintu bishya Netflix izatangira gutangaza muri uyu mwaka harimo filime y’uruhererekane yo muri Espagne yitwa ‘Sky Rojo’ izajya hanze muri Werurwe. Iyi filime iri mu zitezwe cyane yakozwe n’abahanze ‘Money Heist’ yanditse amateka.

Netflix yashinzwe mu 1997 i California muri Leta Zunze Ubumwe za Amerika ari naho ifite icyicaro. Yatangijwe na Reed Hastings na Marc Randolph.

Netflix bivugwa ko umubare w’abayireba ku Isi, ari kimwe cya gatatu cy’abantu bajya kuri Internet bose. Nibura mu bakiliya ba Netflix, buri umwe arebaho amashusho iminota 90 ku munsi.
Iyi sosiyete igura filime n’ibindi biganiro bikunzwe bigaca ku rubuga rwayo, uretse ko hari n’amafaranga ishora mu gukora ibyayo.

Netflix irebwa mu bihugu birenga 190 hirya no hino ku Isi, aho ifite abakiliya basaga miliyoni 200. Yabonye abayikoresha bashya bagera kuri miliyoni 16 mu ibi bihe bya Coronavirus ndetse iza no mu bigo bicurizwaho filime byabonye agatubutse mu bihe abantu hafi ya bose ku Isi bari bari muri Guma mu Rugo.

Nko ku munyarwanda ushaka kuzajya areba Netflix bimusaba kwishyura nibura hagati y’amadolari 7,9 na 11,9 ku kwezi.

Netflix irateganya kuzamura ifatabuguzi ryayo ry'ukwezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .