Isabelle Kabano wakinnye muri filime “Petit Pays” yegukanye igihembo mu iserukiramuco rikomeye mu Bufaransa

Yanditswe na Uwiduhaye Theos
Kuya 3 Nzeri 2020 saa 11:02
Yasuwe :
0 0

Isabelle Kabano wakinnye muri filime ‘Petit Pays’ yubakiye ahanini ku nkuru y’ubuzima bw’umwanditsi Gaël Faye; yahawe igihembo mu iserukiramuco rya ‘Film Francophone d’Angoulême’ rikomeye mu Bufaransa.

Iri serukiramuco rya “Film Francophone d’Angoulême “ryatangiye tariki 28 Kanama 2020 risozwa tariki 2 Nzeri 2020. Ryanerekaniwemo iyi filime ya Gaël Faye.

Gaël Faye yanditse ku rukuta rwe rwa Instagram agaragaza ko atewe ishema n’uko umwe mu bakinnye muri filime ye yabashije kwegukana igihembo mu iserukiramuco rikomeye.

Ati “Ndishimye kandi ntewe ishema ko kubamenyesha ko uyu mwaka wa 2020, Film Francophone d’Angoulême yahaye Isabelle Kabano wakinnye yitwa Yvonne; igihembo cy’umukinnyi w’umugore witwaye neza.”

Yakomeje ashimira uyu mugore uburyo yitwaye muri iyi filime. Iri serukiramuco rikomeye mu gihugu cy’u Bufaransa ryerekana izigezweho zakinwe mu rurimi rw’Igifaransa, rikitabirwa n’ibyamamare mu gukora filime ariko nanone rikanaha umwanya abanyempano bakizamuka muri uyu mwuga.

Isabella Kabano ni umwe mu bakinnyi ba filime bakomeye mu Rwanda azwi cyane mu zirimo ‘Opération Turquoise’ yagiye hanze mu 2007 ivuga ku ngabo z’u Bufaransa zari muri ’Opération Turquoise’ mu Rwanda, ‘Sometimes in April’ yagiye hanze mu 2005 ivuga kuri Jenoside yakorewe Abatutsi mu 1994, iyitwa ‘Shake Hands with the Devil’ n’izindi nyinshi zamuhesheje amahirwe yo gutoranywa mu bakinnyi b’imena bagaragaye muri Petit Pays.

Iyi filime ya Gaël Faye ivuga ku mateka y’ubuzima bwe ndetse yubakiye ku gatabo gato yabanje kwandika, ivuga ku mwana wavukiye i Burundi; abyarwa n’Umunyarwandakazi w’impunzi n’umuzungu w’Umufaransa.

Abenshi mu bakinnye muri filime ya Gaël Faye biganjemo Abanyarwanda, kuko bitatu bya kane by’abari bashinzwe tekiniki mu ifatwa ry’amashusho yayo na 95% by’abayikinnye bakomoka mu rwa Gasabo.

Guhera tariki 14 Mutarama 2019 filime ishingiye ku gitabo cya Gaël Faye yise ‘Petit Pays’ yatangiye gukinirwa mu Karere ka Rubavu, aho yakozwe n’Umufaransa Eric Barbier biciye muri studio yitwa Jerico.

Iyi filime ishingiye ku nkuru y’ubuzima bw’umwana wavukiye i Burundi abyarwa n’umunyarwandakazi w’impunzi n’umuzungu w’Umufaransa. Uwo mwana avuga uko yabonaga ubuzima muri icyo gihe, ibibazo by’amoko y’Abahutu n’Abatutsi.

Uwo mwana uba ufite hagati y’imyaka 10 na 15, aba yibuka uburyo ubuto bwe bwaje kwicwa n’ibibazo bya politiki zo muri aka karere. Anavuga ku kibazo cyo kuvuka ku babyeyi badahuje uruhu.

Nyuma yaje guhungishirizwa i Burayi ari nabwo yaje kubona ko kuba imvange bigoye kuko haba i Burundi no mu Burayi, hose abantu bamufataga nk’umunyamahanga.

Amaze gukura yiyemeje kugaruka muri Afurika kuko ariho nibura yumvaga ari iwabo. Mu byatumye yumva yigaruriye icyizere ni ugukunda gusoma no kwandika. Filime ‘Petit Pays’ ivuga ku mateka yaranze u Burundi n’u Rwanda, mu myaka ya za 90 na nyuma yaho.

Igitabo cyakomotseho iyi filime ‘Petit Pays’ cyahesheje Gaël Faye ibihembo birenze bitanu birimo bine yahawe mu 2016 n’ikindi kimwe yahawe mu 2017.

Mu 2019 cyahatanye mu bihembo bishamikiye ku Ishyirahamwe Riharanira Iterambere ry’Abirabura muri Leta Zunze Ubumwe za Amerika [NAACP], ryatangijwe ubwo abirabura bafatwaga nabi mu nzego zose z’ubuzima bw’icyo gihugu.

Gaël Faye ni umuhanzi umaze kubaka izina mu buryo bukomeye ku Mugabane w’u Burayi by’umwihariko mu Bufaransa, mu kuririmba, kwandika ibitabo no mu ruganda rwa sinema. Yavukiye mu Rwanda arererwa i Bujumbura mu Burundi, yerekeje i Paris afite imyaka 13.

Isabelle Kabano ukina muri iyi filime yitwa Yvonne, na Faye ubwo iyi filime yerekanwaga mu Rwanda
Isabelle kabano yegukanye igihembo cy'umukinnyi witwaye neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .