00:00:00 IGIHE NETWORK KN KINYARWANDA EN ENGLISH FR FRANCAIS

Impinduka ziravuza ubuhuha mu mikorere ya Netflix

Yanditswe na Uwiduhaye Theos
Kuya 2 June 2022 saa 12:36
Yasuwe :

Netflix ni rumwe mu mbuga zikomeye zerekanirwaho filime n’ibiganiro bitandukanye, gusa muri iyi minsi ruri kugenda rutakaza bamwe mu bafatabuguzi barwo ariko narwo ruri gufata izindi ngamba zizatuma ruguma kwinjiza agatubutse.

Muri Mata byatangajwe ko umubare w’abantu biyandikishije bakurikira Netflix (subscribers) wabaganutse ku nshuro ya mbere mu myaka igera ku 10. Icyo gihe byavugwaga ko uru rubuga rutambutsa filime n’ibindi biganiro by’amashusho rwatakaje abantu bari bafiteho konti ibihumbi 200 mu mezi atatu ya mbere y’uyu mwaka.

Ubundi kuri uru rubuga umuntu umwe iyo afiteho konti, aba ashobora gusangiza abandi bantu bagenzi bane ijambo ry’ibanga, binyuze muri ‘sub-account’ ya buri wese.

Mu rwego rwo gukomeza kubaka ubushobozi bw’iyi sosiyete no kudatuma gutakaza abantu bari barafasheho ifatabuguzi biyihombya, Netflix irateganya izindi ngamba.

Iyi sosiyete irateganya gukuraho gusangira ijambo ry’ibanga ku bantu benshi no kongera ibiciro kuri konti zizajya ziba ziriho umubare w’abantu barenze umwe, ikindi ishaka kuzana kwamamaza hagati muri filime cyangwa mu biganiro bitambukaho.

Netflix irateganya kuzana uburyo bushya aho izajya yamamaza ku konti z’abantu bishyuye ifatabuguzi rya make [lower-priced subscription].

Izindi sosiyete nka Hulu, Paramount+ na Peacock zisanzwe zikoresha iyi serivisi. Ibi byatangiye kwiganza ubwo COVID-19 yateraga ubuzima bwa benshi bugahungabana. Abari barafashe ifatabuguzi 50% kuri ibi bigo basabye ko hashyirwaho uburyo bwo kwamamaza bakajya bishyura make.

Netflix nayo irateganya kuzana ibyo kwamamaza mu biganiro na filime itambutsa mu mezi ya nyuma y’uyu mwaka. Byatangajwe ko mu gihe yaba ibizanye nibura mu mezi ya nyuma ya 2022 yakunguka amadorali ya Amerika 14,82[arengaho gato 15.000 Frw] kuri mufatabuguzi muri Amerika na Canada.

Gukuraho uburyo bwo gusangira ijambo ry’ibanga bizazamura umubare w’abantu benshi bakoreshaga konti za Netflix.

Mu ibaruwa ubuyobozi bwa Netflix bwandikiye abafatanyabikorwa bayo muri Mata 2022 hari aho bagaragaza ko uretse miliyoni 222 za konti z’ifatabuguzi ku isi yose ifite [buri imwe iba irimo izindi eshanu zishobora gukoreshwa n’abantu batanu], iteganya ko hagiye kwiyongeraho izindi konti zirenga miliyoni 100 mu mezi ari imbere kubera serivisi igiye kuzana.

Guhera muri Werurwe 2022 Netflix yatangiye igerageza ryo gukuraho uburyo bwo gusangira umubare w’ibanga muri Chile, Costa Rica na Peru. Aha abantu babiri nibo bemerewe kongerwa muri konti y’umufatabuguzi aho kuba uko byari bisanzwe buri konti ikemererwa kuba yakoreshwa n’abantu batatu aho kuba batanu.

Aba bantu babiri bongerwaho muri ibyo bihugu kugira ngo babashe kureba ibiganiro bya Netflix ndetse na filime basabwa kwishyura amadorali 2, 99[3000 Rwf] cyangwa ari munsi yayo buri kwezi, ubundi buri wese agakoresha ijambo ry’ibanga rye.

Mu gihe Netflix yahindura konti zose zari zisanzwe gutya nibura izabona inyongera ku rwunguko rw’umwaka rwa miliyali 3,58 $ ugereranije n’urwo yabonye mu 2021, muri uwo mwaka iyi sosiyete yari yungutse miliyali 30$.

Ubushakashatsi bwakozwe n’ikigo cya Morning Consult, bwerekanye ko 33% by’abafatabuguzi ba Netflix bashaka kwishyura amafaranga y’inyongera ku yari asanzwe yishyurwa kugira ngo basangire na bagenzi babo ijambo ry’ibanga nta yandi mananiza abayeho yo kwishyurira abandi bantu baza kuri konti ari inyongera.

Mu gihe ⅓ cy’abafabaguzi ba konti zisanzwe miliyoni 100 baba bahisemo gukoresha ubu buryo n’ubundi iyi sosiyete yabona urwunguko rw’inyongera ku mwaka rungana na miliyali 1,18 $.

Netflix iteganya ko kuva muri Werurwe kugeza muri Kamena 2022 ishobora gutakaza miliyoni ebyiri z’abantu bafite konti zisanzwe bafashe ifatabuguzi bazayivaho, ariko ikizera ko uburyo bwo kongera amafaranga ku bantu bari basanzwe bareba filime banyuze muri konti y’uwafashe ubuguzi ntacyo bishyuye no kuzana uburyo bwo kwamamaza mu byo itangaza bizatuma nta gihombo igira.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .