Imbuto Foundation yatangije filime n’ibiganiro bihugura urubyiruko muri ibi bihe bya Covid-9

Yanditswe na Uwiduhaye Theos
Kuya 25 Gashyantare 2021 saa 05:36
Yasuwe :
0 0

Umuryango Imbuto Foundation ugiye gutangiza filime y’uruhererekane ‘Ejo si kera’ izajya itambuka kuri Televiziyo Rwanda na Tv1.

Iyi filime kuri uyu wa Kane tariki 25 Gashyantare 2021, iratangira kwerekanwa kuri Televiziyo Rwanda guhera saa Kumi n’ebyiri n’igice z’umugoroba ndetse ikazongera gutambutswa ku wa Gatandatu saa yine z’amanywa.

Izajya ica kandi kuri Tv1 buri wa Gatandatu saa Moya n’igice z’umugoroba na buri wa Kabiri saa Kumi n’ebyiri n’iminota itanu z’umugoroba.

‘Ejo si kera’ ni umushinga wa Imbuto Foundation ku bufatanye na Zacu Entertainment. Irimo abakinnyi bakunzwe mu Rwanda barimo Mukakamanzi Béatha uzwi nka Mama Nick na Umwamwezi Nadege [Nana] bakinana muri filime City Maid, Niyitegeka Gratien uzwi nka Papa Sava n’abandi.

Igitekerezo cyo gutangiza ibi biganiro biherekejwe na filime ndetse n’ikinamico cyaje muri iki gihe Isi yugarijwe n’icyorezo cya Covid-19, aho Imbuto Foundation itabasha kugera ku bagenerwabikorwa bayo nk’uko bisanzwe kandi bakaba bakeneye kubona amakuru yizewe ku ngingo zitandukanye.

‘Ejo si Kera’ ni uruhererekane rw’ibiganiro, ikinamico na filime bigamije guhugura umuryango ku bijyanye n’imibereho myiza, byateguwe na Imbuto Foundation, Minisiteri y’Ubuzima, Ikigo gishinzwe Ubuzima mu Rwanda (RBC), Minisiteri y’Urubyiruko n’Umuco, ’Ikigo cy’igihugu gishinzwe guteza imbere ibikorwa by’iterambere mu nzego z’ibanze (LODA), Ikigo cy’Igihugu gishinzwe imikurire no kurengera umwana (NCDA). Bizajya binyuzwa kuri Radio na Televiziyo zitandukanye.

Ibiganiro, ikinamico na filime bigize ‘Ejo si Kera’ bizibanda ku mibanire myiza y’umuryango, kuboneza urubyaro, ubuzima bw’imyororokere, akamaro ko kugirana ibiganiro hagati y’abana n’ababarera, imbonezamikurire y’abana bato n’ibindi bifasha umuryango kugira imibereho myiza.

Ikiganiro ‘Ejo si kera’ kuri Radio kizajya gikorwa na Ismaël Mwanafunzi w’Ikigo cy’Igihugu cy’Itangazamakuru (RBA). Uretse filime hari n’ibiganiro ‘Ejo si kera’ bitambuka kuri Radio Rwanda kuwa mbere saa kumi n’ebyiri na 45 ; kuri RC Musanze ku wa kabiri saa mbili , RC Huye ku wa gatatu , saa kumi n’ebyiri na 40 , RC Nyagatare ku wa Gatatu saa mbili , RC Rubavu kuwa Kane saa kumi n’ebyiri na 45, Energy Radio ku wa Kane saa moya na 50, Radio 1 kuwa Gatanu saa mbili na RC Rusizi kuwa Gatandatu saa kumi n’ebyiri na 50.

Reba agace gato k’iyi filime

Iyi filime izajya ica kuri televiziyo y'u Rwanda buri wa Kane no kuwa Gatandatu, ice no kuri Tv1 buri wa Gatandatu saa Moya n'igice z'umugoroba na buri wa Kabiri saa Kumi n'ebyiri n'iminota itanu z'umugoroba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .