Ikinamico ya Atome yashyizwe mu mizingo y’izizajya zifashishwa mu mashuri atandukanye y’ibihugu biri muri OIF

Yanditswe na Uwiduhaye Theos
Kuya 5 Ukuboza 2020 saa 05:15
Yasuwe :
0 0

Mu rwego rwo gusigasira umurage w’ikinamico nyafurika, ikigo cyitwa Lansman gisanzwe gisohora ibitabo byiganjemo ibyakinwemo amakinamico, cyashyize hanze imbumbe ebyiri z’ikinamico zirimo n’iy’Umunyarwanda Ntarindwa Diogène wamamaye nka Atome.

Izi mbumbe ziri mu mujyo w’icyiswe “Anthologie du Théatre Africain” aho bahurije hamwe ikinamico zitandukanye z’Abanyafurika zifite umwihariko zirimo n’iyitwa ‘Carte d’Identité’ ya Atome.

Izi mbumbe zirimo umwe wiswe “De Targuiya à Tobie” ugizwe n’ikinamico esheshatu z’Abanyafurika bo mu bihugu bitandukanye aha harimo ikinamico zirimo iya Atome yitwa ‘Carte d’Identité’; iya Moussa Diana, Hermas GBguidi, Koulsy Lamko, Gustave Akakpo ndetse na Rodrigue Norman.

Undi muzingo urimo ikinamico eshanu wiswe ‘De Dieu à Elléonore’; urimo iya Kossi Efqui, Maxime N’Debeka Léandre, Alain Baker, Liazéré Florent Couao ndetse na Zotti.

Izi kinamico zashyizwe mu bitabo bitandukanye zizajya zigishwa mu mashuri atandukanye muri Afurika ndetse n’ibindi bihugu bikoresha ururimi rw’Igifaransa ku Isi, ibi bigiye gukorwa biturutse ku busabe bw’ Umuryango Mpuzamahanga w’ibihugu bikoresha Igifaransa (OIF) uyoborwa n’umunyarwandakazi Louise Mushikiwabo.

Atome yabwiye IGIHE ko ari iby’agaciro kuri we, ko icyo ashyize imbere ari uko u Rwanda rugiye kumenyekana birushijeho n’amateka yarwo akajya yigwa mu bindi bihugu mu buryo bworoshye.

Ati “Kuri njye ni ishema ariko njye sinkunda gutinda ku ishema ku giti cyanjye. Ni ishema kuko ibyo nibandaho bihawe intera y’icyo nakwita nk’icyubahiro bikaba biyishyize mu kintu cyaba nk’umurage nyafurika w’ikintu gihoraho. Bizatuma aba kure cyane ntari narigeze ngeraho byoroha ko babona ubutumwa buri mu ikinamico yanjye.”

Ubundi ‘Anthologie’ mu bwanditsi ni igihe bafata inyandiko zanditswe kera bakazikorera umuzingo. Ni ibintu biba bigiye kuba nk’umurage, biba bihawe ishema ryo gushyirwa mu murage. Iyi Anthologie yakozwe na Lansman irimo izi kinamico zirimo n’iya Atome igamije kwerekana umwihariko w’Abanyafurika. Iki kigo cyari gisanzwe gifite ikinamico ya Atome iri mu nyandiko.

‘Carte d’Identité’ yashyizwe muri “Anthologie du Théatre Africain” yatangiye kujya hanze mu 2007, Atome amaze kuyikina mu bihugu hafi 20 ikaba imaze no gusemurwa mu Kidage ndetse ica kuri radiyo zaho.

Iyi kinamico iri no mu Cyongereza ndetse vuba ateganya kuyikina mu Kinyarwanda. Ivuga ku buzima bwite bwa Atome ndetse n’u Rwanda. Ikubiyemo ubutumwa mu buryo bumwe bushekeje ahandi bukagaragara nk’ubusharira.

Ntarindwa Diogène uzwi nka Atome cyangwa se Gasumuni amaze igihe kinini akina ikinamico yibanda ku zo gusetsa
Atome ni umwe mu banyarwenya babasha gusanisha gutanga ubutumwa no kwigisha abantu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .