00:00:00 IGIHE NETWORK KN KINYARWANDA EN ENGLISH FR FRANCAIS

Ibyihariye kuri Mashariki Film Festival iri kuba ku nshuro ya munani

Yanditswe na Mukahirwa Diane
Kuya 1 Ukuboza 2022 saa 07:59
Yasuwe :

Iserukiramuco rya Sinema, Mashariki African Film Festival[MAFF], rimaze kuba ubukombe mu Rwanda no hanze yarwo, riri kubera mu Rwanda ku nshuro yaryo ya munani.

Iri serukiramuco ryatangiye kubera mu Rwanda mu 2015. Ibirori byo kuritangiza muri uyu mwaka byabereye mu Mujyi wa Kigali muri Century Cinema, byitabiriwe na benshi mu bakinnyi ba filime bazwi mu Rwanda ndetse by’umwihariko na Minisitiri w’Ikoranabuhanga na Inovasiyo, Ingabire Paula ndetse na Ambasaderi wa Israel mu Rwanda, Dr Ron Adams.

Biteganijwe ko hazerekanwamo filime zirenga 75 ziri mu irushanwa. Ni mu gihe ubundi bakiriye filime 778 ziri mu byiciro bitandukanye birimo icyiciro cya filime ndende, ingufi na filime mbarankuru.

Abakiri bato mu mwuga batekerejweho

Muri izi filime zigomba kwerekanwa, harimo izo mu Rwanda, inyinshi muri zo zikaba ari izakozwe n’abanyeshuri bari mu mushinga wiswe ‘Tumenye Sinema Project’.

Uyu ni umushinga wa Mashariki African Film Festival (MAAF) uterwa inkunga n’Umuryango w’Ubumwe bw’u Burayi.

Kugeza ubu Mashariki African Film Festival ifite abanyeshuri mu turere tune ; Rubavu mu Ntara y’Iburengerazuba, Muhanga mu Majyepfo, Huye mu Ntara y’Amajyepfo na Musanze mu Ntara y’amajyaruguru.

Umuyobozi wa Mashariki African Film Festival, Senga Tresor avuga ko abakiri bato batekerejweho mu rwego rwo kubatinyura no kubafasha gukomeza kumenyekanisha ibyo bakora mu maserukiramuco atandukanye cyane ko bamwe muri bo bagiye bitabira n’andi nka Zanzibar International Film Festival (ZIFF) na Luxor Film Festival mu Misiri.

Hari kandi African Films Festival ibera Texas muri Amerika , Silicon Valley Film Festival ibera California ndetse na Festival Avis d’Afrique ibera muri Canada

Ati “Twifuza ko sinema nyarwanda iva ku rwego rumwe ikagera ku rundi; byaratangiye turi kwishimira intambwe tumaze gutera kandi dushimira abadufasha kugira ngo tubigereho.”

‘Tumenye Sinema’ ni umushinga w’imyaka ine watangijwe muri Mutarama 2021 ukazageza mu 2024. Mu gutangiza uyu mushinga ku mugaragaro abanyeshuri 107 basoje amahugurwa. Abakora filime 200 ba Musanze na Huye nabo bahawe amahugurwa mu bihe bishize.

Abahugurwa bahabwa ubumenyi mu gutunganya filime, ubumenyi bw’ibanze mu kuyobora filime, ifatwa ry’amashusho ya filime n’ibijyanye n’amajwi no kunononsora filime.

Filime z’aba banyeshuri nazo zizajya mu marushanwa, ndetse mu isozwa ry’iri serukiramuco ku wa Gatanu tariki 2 Ukuboza 2022 nibwo izizaba zatsinze zizahabwa ibihembo.

Muri rusange Filime izaba iya mbere izahembwa amayero igihumbi 1.000 €, ni ukuvuga arenga miliyoni imwe y’amafaranga y’u Rwanda.

Filime ‘La Gravite’ yakozwe n’umunyafurika Cedrick Ido, niyo yerekanywe mu rwego rwo gutangiza iri serukiramuco. Yabaye filime Nyafurika ya mbere ndetse ikaba ari iya kabiri Cedrick Ido akoze, nyuma y’indi yitwa ‘La Vie’.

Ifite icyo yigisha Abanyafurika muri rusange n’abanyarwanda by’umwihariko bakora sinema kuko ivuga uko Afurika izaba imeze mu minsi iri imbere, hagamijwe cyane kuva ‘ku rwego rumwe tujya ku rundi’.

Iyi filime kandi ivuga ku bintu bibiri by’ingenzi ; ku buzima bwo mu mujyi aho usanga buri umwe wese aba afite amakenga no guca ibico. Inavuga kandi ku buzima bubi abantu babayeho ku buryo batanafite uko bakwigobotora ngo bave mu gace batuyemo, kabaswe n’ubugambanyi n’urugomo rukabije (imirwano ya kinyamaswa).

Bamwe mu bitabiriye umuhango wo gutangiza Mashariki Film Festival ku nshuro ya munani
Umuyobozi wa Mashariki African Film Festival, Senga Tresor avuga ko abakiri bato batekerejweho mu rwego rwo kubatinyura no kubafasha gukomeza kumenyekanisha ibyo bakora mu maserukiramuco
Minisitiri w'Ikoranabuhanga na Inovasiyo, Ingabire Paula na Senga Tresor, umuyobozi w'iri serukiramuco

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .