Gasigwa Léopold agiye kuzenguruka igihugu yereka abanyeshuri filime kuri Jenoside yakorewe Abatutsi

Yanditswe na Uwiduhaye Theos
Kuya 14 Mutarama 2021 saa 02:48
Yasuwe :
0 0

Umwanditsi, umushakashatsi akaba n’utunganya filime ziganjemo izivuga kuri Jenoside yakorewe Abatutsi mu 1994, Gasigwa Léopold, aritegura kuzenguruka mu mashuri na za kaminuza zitandukanye mu Rwanda yerekana filime ze zibumbatiye ayo mateka.

Gasigwa amaze kumenyekana kubera filime akora zijyanye n’amateka ya Jenoside yakorewe Abatutsi, yahitanye ubuzima bw’inzirakarengane zirenga miliyoni mu mezi atatu gusa.

Mu gukomeza kugeza ubutumwa kuri benshi no gufasha abakiri bato gusobanukirwa n’ayo mateka yagejeje u Rwanda mu icuraburindi, uyu muhanzi arateganya kuzenguruka ibice bitandukanye by’igihugu yerekana filime zimwe mu zo yakoze.

Mu kiganiro yagiranye na IGIHE yagize ati “Ndi guteganya igikorwa muri Mata, nzerekana filime zimwe mu zo nakoze, mu ntara enye n’Umujyi wa Kigali. Ni filime eshatu, ebyiri ni izo nakoze mbere iyitwa ‘Izingiro ry’amahoro’ n’iyitwa ‘Urantokoza’. Nzazerekana mu mashuri yisumbuye na za kaminuza.”

Iki gikorwa kizasozwa no kwerekana ku mugaragaro filime yitwa ‘Urantokoza’ kizabera mu Mujyi wa Kigali.

‘Urantokoza’ ni filime ivuga ku iyicwa ry’abana bari bafite imyaka 14 gusubiza hasi n’iteshagaciro ryakorewe ababyeyi babo mu gihe cya Jenoside yakorewe Abatutsi.

Gasigwa avuga ko iyi filime yagombaga kuyishyira hanze muri Werurwe 2020 ariko COVID-19 ikabyivangamo ndetse arateganya kuzayerekana agendeye ku mabwiriza azaba agezweho yo kwirinda iki cyorezo.

Yakomeje ati “Si ubwa mbere ngiye kwerekana filime zitandukanye mu bigo kuko no mu 2013 nabikoze. Impamvu ngiye kongera kubikora ni uko abanyeshuri neretse filime ubu barangije, nkaba nshaka ko n’abashya bari kwiga ubu babona iyo filime.”

Yavuze ko filime enye amaze kwandika abantu benshi bazakiriye neza ndetse Kaminuza y’Abaprotestanti ‘Protestant Institute of Arts and Social Sciences’ [PIASS] y’i Butare ikaba yaramwandikiye imushimira kubera zo.

Uyu mugabo uri mu barokotse Jenoside yakorewe Abatutsi mu 1994 yemeza ko nk’umwe mu bagizweho ingaruka na Jenoside yagiye ahura n’ibibazo bitandukanye.

Ati “Kurokoka Jenoside ni byiza ariko ni n’ikibazo ku rundi ruhande kuko politiki nyinshi zidukinirwaho kandi zigenda hejuru y’agahinda kacu, tunabibona. Turavuga tuti icyiza ni uko dufite igihugu, dufite leta itwumva kandi idukunda tugashima icyo kuko icyangombwa cyari ukurokoka. Ariko, ntabwo Isi iba yitaye ku mubabaro wacu. Birangira byabaye politiki.”

Avuga ko iyo yashimishijwe n’itabwa muri yombi rya Rusesabagina washakaga kuririra kuri Jenoside akageza n’aho agerageza kudurumbanya ituze ry’Abanyarwanda.

Ku wa 31 Kanama 2020 ni bwo Urwego rw’Igihugu rw’Ubugenzacyaha, RIB, rwatangaje ko rwataye muri yombi Paul Rusesabagina, ukurikiranyweho ibyaha bitandukanye birimo n’iby’iterabwoba.

Umwanditsi wa filime, Léopold Gasigwa, avuga ko uyu munsi uri mu yamunejeje cyane.

Yagize ati “Niba hari umunsi wanejeje ni ubwo RIB yerekanaga Rusesabagina. Ni umwe mu minsi yiyongereye ku yanejeje. Rusesabagina ni umwe mu bapfobya Jenoside yakorewe Abatutsi ku gipimo cyo hejuru kandi hari abantu bamufata ko ibyo yavuze ari ukuri. Yagendaga ahantu hatandukanye hakomeye bamutumiye nk’impuguke ndetse nk’umuntu warokoye Abatutsi kandi atari byo.”

Arakomeza ati “Hakiyongeraho ko umutwe yari ayoboye wacitse intege. Ibintu yagiye akora birahagaze, ndetse n’ibitero byo muri Nyaruguru aho mvuka bikaba byaragabanutse.”

Gasigwa yakoze filime zitandukanye zirimo ‘L’abces de la vérité’ igaragaza uruhare rwa Kiliziya Gatolika mu itegurwa n’ishyirwa mu bikorwa rya Jenoside yakorewe Abatutsi, ‘Miracle and The Family’ yavugaga ku buryo abagore bishwe bakanafatwa ku ngufu muri Jenoside, ‘Izingiro ry’Amahoro’ n’izindi.

Izo filime zagiye zitabira amaserukiramuco atandukanye ku Isi kuko “Izingiro ry’Amahoro” na “Miracle and Family” zahembwe muri Rwanda Movie Awards.

Umwanditsi wa Filime, Gasigwa Léopold, agiye kuzenguruka igihugu yerekana izivuga kuri Jenoside yakorewe Abatutsi mu 1994 mu gukomeza gufasha ababyiruka gusobanukirwa ayo mateka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .