Filime y’uruhererekane Sonia Rolland azagaragaramo ari umupolisi igiye kujya hanze

Yanditswe na Uwiduhaye Theos
Kuya 30 Ukwakira 2019 saa 10:35
Yasuwe :
0 0

Filime y’uruhererekane yitwa “Tropiques Criminels” izagaragaramo umunyarwandakazi Uwitonze Sonia Rolland wabaye Nyampinga w’u Bufaransa mu 2000, igiye gutangira kunyuzwa kuri televiziyo ya France 2.

Iyi filime Sonia Rolland azayigaragaramo we na Béatrice de la Boulaye, amashusho yayo yatangiye gufatwa ku wa 10 Mata 2019. Ifite ibice umunani, aba bombi baba ari abapolisi.

Amashusho ya Tropiques Criminels yafatiwe mu birwa bya Martinique. Sonia Rolland agaragara muri iyi filime y’uruhererekane yitwa Melissa Sainte-Rose naho Béatrice de la Boulaye yitwa Gaëlle Crivelli.

Agace kayo kagufi [Trailor] kagiye hanze ndetse Sonia Rolland yanditse kuri Instagram yerekana ko iyi filime igiye gutangira kunyuzwa kuri France 2 guhera ku wa 22 Ugushyingo 2019.

Muri ‘Tropiques Criminels’, Melissa Sainte-Rose aba ari umucukumbuzi mu gukurikira ibyaha ukomoka mu Birwa bya Martinique, aba ari umugore udafite umugabo ariko ufite abana babiri bakibyiruka. Melissa yisanze ayobora umutwe w’intagondwa mu murwa atari yarigeze anakandagizamo ikirenge.

Gaëlle Crivelli we yavukiye kuri uwo murwa, awuzi wose mu mutwe. Ni umugore utagira ubwoba ukarishye kandi utagira icyo atinya, wihagararaho kandi uvuga icyo atekereza.

‘Tropiques Criminels’ itandukanye na filime tumenyereye zigaragaramo abagabo, ibicishije mu mibereho y’aba bagore. Ishyira imbere uburanga bwihariye bw’umwimerere w’ibirwa bya Martinique n’umutungo wabyo nka kimwe mu bigize iyi filime.

Umwe mu bakinnyi b’iyi filime witwa Jean-Michel aherutse kwitaba Imana mu Cyumweru gishize.

Sonia Rolland yagaragaye no mu zindi filime zubatse izina zirimo Une vie ordinaire (2016), Midnight in Paris (2011), Léa Parker (2004 – 2006), Madame (2017), Toussaint Louverture (2012) n’izindi.

Reba agace gato ka Filime ‘Tropiques Criminels’

Jean Michel ugaragara muri iyi filime uherutse kwitaba Imana ari kumwe na Sonia Rolland mu ifatwa ry'amashusho yayo mu mezi make ashize
Sonia Rolland agaragara muri filime ari umupolisikazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza