00:00:00 IGIHE NETWORK KN KINYARWANDA EN ENGLISH FR FRANCAIS

Filime “Petit Pays” ya Gaël Faye yegukanye ibihembo mu iserukiramuco ribera muri Espagne

Yanditswe na Uwiduhaye Theos
Kuya 26 Mata 2021 saa 04:46
Yasuwe :
0 0

Umuhanzi ukomoka mu Rwanda Gaël Faye ari mu byishimo bikomeye nyuma y’uko filime yise ‘Petit Pays’ yegukanye ibihembo bibiri mu Iserukiramuco rikomeye ku Isi rya Barcelona International Short and Animation Film Festival.

Ni ibihembo byatangwaga ku nshuro ya 23 muri iri serukiramuco ribera mu Mujyi wa Barcelona muri Espagne. Rihatanamo filime ngufi zirenga ibihumbi bitanu buri mwaka.

Iri serukiramuco rigamije guteza imbere abanditsi ba filime batanga icyizere, guhemba filime zifite inkuru zihariye kuri sosiyete no guteza imbere abakiri bato muri uyu mwuga utunze benshi.

Tariki 23 Mata 2021, ni bwo iri serukiramuco ryasojwe ku mugaragaro. Abantu batandukanye barimo abatunganyije “Petit Pays”, bandika bagaragaza ko batewe ishema no kuba iyi filime yegukanye ibihembo bibiri.

Gaël Faye yanditse kuri konti ye ya Twitter, kuri uyu wa Mbere tariki 26 Mata 2021, avuga ko ‘‘Petit Pays’’ yegukanye ibihembo bibiri birimo icya filime nziza ndetse ko na Isabelle Kabano wakinnye muri iyi filime yegukanye igihembo cy’umukinnyi w’umugore mwiza muri iri serukiramuco.

Iri serukiramuco rya Barcelona International Short and Animation Film Festival rizongera kuba tariki 21 kugeza ku wa 29 Mata 2022.

Filime ‘Petit Pays’ yahesheje igihembo Isabelle yakozwemo igitabo cyiswe ‘Gahugu Gato’ gifite amapaji 191. Kivuga ku buzima bwa Faye.

Mu minsi ishize Umufaransa Eric Barbier wayoboye ifatwa ry’amashusho rya filime ‘Petit Pays’ yubakiye ahanini ku nkuru y’ubuzima bw’umwanditsi w’Umunyarwanda Gaël Faye; yari ari guhatanira igihembo mu cyiciro cya ‘Adapted Screenplay’ mu bihembo bya ‘César Awards’ bitangirwa mu Bufaransa.

Muri Kanama 2020, Isabelle Kabano wakinnye muri iyi filime ‘Petit Pays’, yahawe igihembo mu iserukiramuco rya ‘Film Francophone d’Angoulême’ rikomeye mu Bufaransa.

Iri serukiramuco rya “Film Francophone d’Angoulême” ryatangiye tariki 28 Kanama 2020 risozwa ku wa 2 Nzeri 2020. Ryanerekaniwemo filime ya Gaël Faye.

Iyi filime ya Gaël Faye ivuga ku mateka y’ubuzima bwe ndetse yubakiye ku gatabo gato yabanje kwandika, ivuga ku mwana wavukiye i Burundi; abyarwa n’Umunyarwandakazi w’impunzi n’umuzungu w’Umufaransa.

Abenshi mu bakinnye muri filime ya Gaël Faye biganjemo Abanyarwanda, kuko bitatu bya kane by’abari bashinzwe tekiniki mu ifatwa ry’amashusho yayo na 95% by’abayikinnye bakomoka mu rwa Gasabo.

Guhera tariki 14 Mutarama 2019 filime ishingiye ku gitabo cya Gaël Faye yise ‘Petit Pays’ yatangiye gukinirwa mu Karere ka Rubavu, aho yakozwe n’Umufaransa Eric Barbier biciye muri studio yitwa Jerico.

Isabelle Kabano ukina muri iyi filime yitwa Yvonne na Faye ubwo iyi filime yerekanwaga mu Rwanda
Umuhango wo kwerekana iyi filime ya Gaël Faye i Kigali witabiriwe na Madamu Jeannette Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .