’Bwana y’Umutima’, filime igiye gusohokana ibitamenyerewe mu zikorerwa mu Rwanda

Yanditswe na Dusabimana Aimable
Kuya 28 Ukuboza 2017 saa 06:18
Yasuwe :
1 0

Nyuma y’igihe kigera ku myaka ibiri hategurwa filime "Ace of Hearts" irimo ubuhanga bwo kugaragaza amashusho y’inkundura z’imirwano bitamenyerewe ku zikorerwa Rwanda, igiye kwerekanwa ku nshuro ya mbere i Kigali.

"Bwana y’Umutima" cyangwa "Ace of Hearts" mu Cyongereza igaruka ku nkuru y’umusore wishoye mu rusimbi ashaka gukiza mushiki we uba urwaye indwara y’umutima. Yakiniwe mu bice bitandukanye by’igihugu birimo iby’icyaro ndetse n’umujyi.

Ikozwe mu buryo bwa gihanga kuko irimo imirwano, imodoka ziba zifite umuvuduko zirimo abantu bari kurasana n’ibindi byinshi bitamenyerewe ku zikorerwa mu gihugu zikozwe n’Abanyarwanda. Byitezwe ko izerekanwa bwa mbere kuri uyu wa Gatanu, tariki 29 Ukuboza 2017, muri Century Cinema ikorera muri Kigali City Tower.

Mu kiganiro IGIHE yagiranye na Manirakiza Aimable, umwe mu bagize itsinda ryitwa WeNext ryayiteguye yavuze ko "Bwana y’Umutima" ari filime igiye gusohokana umwihariko wo kuba iya mbere iteguranywe ubuhanga buhanitse ku basanzwe bakurikirana izikoze mu buryo bwa ’Action’.

Yagize ati ‘‘Umwihariko ifite ni uko ikoze mu buryo bwa ’Action’ kandi bw’ubuhanga, ku babonye ’Trailer’ bahita babyumva birushijeho. Iratandukanye n’izo mu Rwanda twari tumenyereye, ifite ’genre’ (imiterere) nshyashya hano mu gihugu kandi iryoheye ijisho kuyireba.’’

Yavuze ko mbere yo gutegura umushinga wagutse w’iyi filime abagize uruhare mu kuyikina no kuyitegura babanje gufata igihe kirekire cyo kwiga no kwihugura aho iterambere rigeze mu bijyanye na Cinema ku Isi ku buryo bizeye ko izishimirwa cyane n’Abanyarwanda bitewe n’udushya ifite.

Kwinjira ahazerekanirwa "Bwana y’Umutima" ni ibihumbi bitanu [5,000 Frw] ndetse hazabaho no guha umwanya abayikurikiye babashe kumenya abakinnye no kwifotoza.

Iyi filime yari imaze imyaka ibiri itunganywa kuva mu 2015 yakinwemo n’abakinnyi babarirwa hagati ya 70 na 100 biganjemo abakiri urubyiruko, abafite imyanya y’imena ni Ganza Prince, Gasirabo Roseline, Muhirwa Yves, Sangwa Deus,Nzarama Michael na Murwanashyaka Shariff.

Iyi filime yagizwemo uruhare n’abarimo Kirezi Patrick [Producer], Nzeyimana Cyusa Pacifique [Director] na Sangwa Deus [Assistant Director].

Abakinnyi b'imena bazagaragara muri filime "Ace of Hearts"
'Bwana y'Umutima' igaruka ku nkuru y'umusore wishoye mu rusimbi ashaka gukiza mushiki we
Iyi filime iri mu zitezweho guhindura ishusho y'uruganda rwa sinema mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza