AMAA 2018: Filimi y’Abanyafurika y’Epfo yubakiye amateka i Kigali, Bruce Melody aratungurana (Amafoto)

Yanditswe na Uwiduhaye Theos
Kuya 21 Ukwakira 2018 saa 10:57
Yasuwe :
0 0

Ibihembo bya Africa Movie Academy Awards, byatangiwe mu Rwanda ku nshuro ya mbere, filimi yitwa ‘Five Fingers For Marseilles’ y’Abanyafurika y’Epfo yegukana ibihembo bitanu.

Ibi bihembo byatanzwe mu ijoro ryo kuri uyu wa Gatandatu tariki 20 Ukwakira 2018, mu birori byabereye mu Intare Conference Arena i Rusororo.

Byitabiriwe na benshi mu bakomeye bakora umwuga wa sinema biganjemo abo muri Nigeria, Kenya, Tanzania, Ghana, Afurika y’epfo n’Abanyarwanda.

Umukinnyi wa filimi ukomeye Nse Ikpe-Etim ukomoka muri Nigeria na Nkusi Arthur [Rutura] usanzwe ari mu banyarwenya bakunzwe mu Rwanda, nibo bayoboye ibi birori.

Bruce Melody yatunguranye

Bruce Melody uri mu bahanzi bakunzwe mu Rwanda ntabwo yari ku rutonde rw’abazatamira abitabiriye iki gikorwa, ndetse no ku byapa byamamaza ntiyari ariho.

Gusa birori bya AMAA bigezemo hagati uyu muhanzi yahamagawe ku rubyiniro, saa yine ngo aze gususurutsa ababyitabiriye.

Yinjiranye indirimbo ye yise ‘Complete me’ yaririmbaga abanyarwanda bari bari mu cyumba cyatangiwemo ibihembo bamufasha ariko abandi badakomoka mu Rwanda ubona ari mu gicuku.
Yakurikijeho ‘Nta kibazo’ ikunzwe muri iki gihe mu tubyiniro dutandukanye i Kigali irangiye ahita ataha.

Uyu muhanzi ari ku rubyiniro benshi mu banyarwanda bateraga akaruru basubiramo ibihangano bye ariko nta munyamahanga wagaragazaga ko amuzi.

Filimi y’Umurundikazi witwa Eddy Munyaneza yise ‘Uncertain Future (Lendemains Incertain)’ niyo filimi yonyine yo mu karere ka Afurika y’Iburasirazuba yabashije kwegukana igihembo.

Iyi ikoze mu buryo bwa filimi mbarankuru, ivuga ku buzima bushaririye bw’Abarundi bagize ubwo bigabizaga imihanda badashaka ko Perezida Nkurunziza yiyamamariza kuyobora u Burundi ku nshuro ya Gatatu, hanyuma abigaragambije bagakorerwa ihohoterwa na polisi y’icyo gihugu.

Yiganjemo amarangamutima y’abagore baba bavuga uburyo bahohotewe bagakubitwa bikomeye ndetse bagatandukanywa n’abana babo.

Ikoze mu rurimi rw’Igifaransa, yatangiye gukwirakwizwa ku mbuga zitandukanye muri Kanama uyu mwaka.

Five Fingers For Marseilles yatwaye ibihembo byinshi

Five Fingers For Marseilles yakozwe n’abanyafurika y’Epfo mu 2017 yegukanye ibihembo bigera kuri bitanu.

Ibi bihembo birimo icya Filimi nziza yo muri Afurika mu rurimi gakondo rwa ba nyirayo, hamwe n’icya filime nziza y’umwaka muri Afurika.

Vuyo Dabula wagaragaye muri filime ari umukinnyi w’imena yavuze ko ari ishema rikomeye kuri we ndetse no kuri buri wese wagize uruhare ngo filime ijye hanze.

Ati “Birandenze, ni ishema kuri njye no kuba twakoranye bose ngo iyi filime ijye hanze.”

Five fingers for Marseilles ivuga ku basore batanu b’ingimbi bishyira hamwe bashaka kurwanya polisi yo mu gace k’icyaro cy’Umujyi wa Marseilles, bitewe nuko iba ibikorwa byo guhohotera abaturage.
Baza gutsindwa bagahunga,nyuma uwitwa Vuyo Dabula [Tau] uba ayoboye itsinda ryabo basore akagarukana ubukana ashaka kubohoza icyo cyaro.

Yakozwe mu 2017 iri mu rurimi rwa ’Sesotho’. Yagiye hanze ku wa 06 Mata 2018. Imara iminota 120.

Yanditswe na Sean Drummond, umuziki wumvikanamo utunganywa na James Mattes iyoborwa na Michael Mattews. Yerekanwe bwa mbere mu iserukiramuco mpuzamahanga rya filimi ry’i Toronto.

Rudeboy yashimishije benshi

Uyu muhanzi yari ategerejwe na benshi, yaje ku rubyiniro bwa mbere saa tanu na 57 aririmba indirimbo zirimo Nkenji keke, No one like you yahuriyemo na mugenzi we bahoze baririmbana muri P-Square ndetse na Forever.

Saa sita na 30, yagarukanye imbaraga n’umuriri ukomeye ku rubyiniro ubwo yazaga bwa kabiri, yabanje kuganiriza abafana ababaza niba koko bari mu mwuka wo kubyina.

Arangije ahita yanzika n’indirimbo nka Bank Alert yatumye benshi biterera hejuru, akurikizaho Shekini, No easy, Fire Fire, Shop my money na Personally.

Ahagana saa saba asoza igitaramo benshi bakinyotewe bamwe bataha bakubita agatoki ku kandi bavuga ko bari bagifite amashyushyu yo gukomeza gutaramana nawe.

Ibihembo byatanzwe

Filimi ikoze mu buryo bwa animation

Belly Flop (South Africa)

Filimi ngufi

Tikitat Soulima (Morocco)

Filimi mbarankuru

Uncertain Future (Burundi)

Filimi nziza ikoze mu rurimi rwa kinyafurika

Five Fingers For Marseilles (South Africa)

Filimi nziza yakozwe n’Umunyafurika uba ku wundi mugabane

Alexandra (Nigeria/USA)

Filime nziza ngufi y’umunyafurika uba hanze yayo

Torments of Love (Guadeloupe)

Filimi nziza mbarankuru y’Umunyafurika uba hanze

Barrows: Freedom Fighter (Barbados)

Filimi y’Umunyafurika uba hanze ishingiye ku nkuru itari impamo yahize izindi

Angelica (Puerto Rico)

Filimi yanogerejwe kurusha izindi

Five Fingers For Marseilles

Uwatunganyije imyenda y’abakina filimi wahize abandi

Isoken

Ukora make-up wahize abandi

Icheke Oku

Uwakoze umudiho uherekeza filimi wahize abandi

Hotel Called Memory

Uwanononsoye filimi kurusha abandi

Lucky Specials/ Hotel Called Memory

Uwakoze ibya cinematography wahize abandi

Five Fingers For Marseilles

Iyerekanwe ahantu henshi

Hakkunde

Filimi y’inya-Nigeria yahize izindi

Isoken

Umukinnyi wa filimi muto utanga icyizere

Amine Lansari – The Blessed Vost (Les Bienheureux)

Filimi ikoze mu buryo bwo gusetsa yahize izindi

Banana Island Ghost (Nigeria)

Umugabo wunganiye abandi mu gukina filimi wahize

Gideon Okeke (Crossroads)

Umugore wunganiye abandi mu gukina filimi wahize

Joke Silva (Potato Potahto)

Umugabo inkuru yari ishingiyeho wahize abandi

Richard Mofe Damijo (Crossroads)

Umugore inkuru yari ishingiyeho wahize abandi

Dakore Egbuson Akande (Isoken)

Uwari uyoboye filimi bwa mbere wahize abandi

Michael Matthews – Five Fingers For Marseille

Uwayoboye filimi wahize abandi

Frank Rajah Arase – In My Country

Filimi nziza

Five Fingers For Marseilles

Aba bakobwa b'impanga bakomoka muri Ghana bari baje kwihera ijisho ibi birori
Abagize uruhare mu ikinnwa rya Five Fingers for Marseilles
Abakinnyi ba filime nyarwanda bari babukereye
Akanyamuneza kari kose ku batsinze
Bruce Melodie ku rubyiniro
Denise Benzinge wari uhagarariye Rwanda Convention Bureau atanga ibihembo
Kirenga Saphine uzwi cyane muri filime nyarwanda yari yitabiriye ibi birori
Marie Clémentine Dusabejambo uri iburyo yafatiye igihembo Umurundikazi wakinnye 'Lendemains Incertains' yahawe igihembo cya filime mbarankuru yahize izindi
Mbere yo kwinjira abasitari batandukanye banyuze ku itapi itukura
Melodie yatunguranye
Nkusi Arthur [Rutura] wari ufatanyije na Nse Ikpe-Etim kuyobora ibirori
Nse Ikpe-Etim ukomoka muri Nigeria na Nkusi Arthur [Rutura] nibo bari bayoboye ibi birori
Peace Anyiam-Osigwe watangije AMAA yavuze ko u Rwanda rwagiye mu bihugu byahindutse ubuturo bwe bw'ibanze nyuma y'aho akomoka
Rudeboy ku rubyiruko
Rudeboy yishimiwe n'ubwo yaririmbiye kuri CD
Umuhanzi Jack B wambaye umupira w'umuhondo yari yaje muri iki gikorwa
Nse Ikpe-Etim ukomoka muri Nigeria na Nkusi Arthur [Rutura] nibo bari bayoboye ibi birori

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza