Abanyarwanda babiri bari mu bazitabira igikorwa giha amahirwe abakora filime i Burayi

Yanditswe na Uwiduhaye Theos
Kuya 17 Mutarama 2020 saa 05:31
Yasuwe :
0 0

Philbert Aimé Sharangabo Mbabazi ufite filime yitwa ‘I Got My Things And Left’ na Ishimwe Karemangingo Samuel wakoze iyitwa "Imfura" batoranyijwe mu bazitabira igikorwa cya Berlinale Talents kibera mu Budage.

Berlinale Talents ni porogaramu itoranywamo abantu bafite impano mu ruganda rwa sinema bari kuzamuka neza ku Isi yose, bagahurira muri Berlin International Film Festival hakabaho kugenda bahuzwa n’abakora filime, abazikina n’abazitunganya bakomeye ku Isi.

Iki gikorwa giteganyijwe kuba guhera hagati ya 22 na 27 Gashyantare 2020. Kizitabirwa n’abagore 126 n’abagabo 123. Kikazaba kiri kuba ku nshuro ya 18.

Uretse ibyo kandi aba bantu baba bitabiriye iyi porogaramu bajya kureba filime zitandukanye zakozwe na bamwe mu bitabiriye.

Iyi gahunda iri mu zikomeye zitabirwa cyane dore ko nibura abantu 3400 banditse basaba kwitabira. Uyu mwaka hatoranyijwe 255 bo mu bihugu 86 ku Isi barimo na Ishimwe Karemangingo Samuel na Aimé Sharangabo Mbabazi.

Aba Banyarwanda uko ari babiri bari bamaze imyaka icyenda basaba kwitabira ariko ntibibakundire.

Mbabazi witabiriye iyi porogaramu yakoze filime yitwa ‘I Got My Things And Left’ yitabiriye amaserukiramuco akomeye atandukanye arimo nka International Film Festival Rotterdam 2019, Internationale Kurzfilmtage Winterthur 2018, International Short Film Festival Oberhausen 2019, IndieLisboa International Film Festival 2019.

Hari kandi Hamburg International Short Film Festival 2019, Go Short - International Film Festival na Nijmegen 2019.

Uyu mwaka aritegura andi maserukiramuco arimo Festival du cinema Africain de Lausanne na Dokufest Prizren muri Kossovo.

‘I Got My Things And Left’ ya Mbabazi yagiye hanze mu 2018. Yayobowe na Mbabazi ndetse aba n’umwe mu bayitunganyije afatanyije na Simone Soleil Späni na Rhea Plangg. Amashusho yayo yafashwe na Samuel Ishimwe Karemangingo.

Mbabazi yinjiye mu bijyanye na sinema mu 2010 nyuma y’amasomo yafatiye mu ishuri rya Ecole d’Art et de Design i Genève mu Busuwisi. Yakoze film zitandukanye zirimo iyitwa "Ruhago", "City Dropout", "The Liberators", "Versus", "Keza Lynn" n’izindi.

Karemangingo na we ari mu ba mbere bakibyiruka bafite ubuhanga bukomeye muri sinema mu Rwanda.

Yakoze iyitwa "Crossing Lines" (2014), yerekanwe muri Durban International Film Festival, muri Africa Film festival i Louvain inamuheshayo igihembo cyitwa Guido Huysmans Young African Film Maker Award. Mu zindi filime yakoze harimo iyitwa "Uruzi" (2014).

Muri Gicurasi 2019 Filime ya Mbabazi yegukanye igihembo cy'ihiga izindi mu bwoko bw'ingufi mu iserukiramuco rya International Short Film Festival Oberhausen ribera mu Budage
Karemangingo ari mu Banyarwanda babiri bagiye kujya i Berlin mu Budage mu gikorwa kigamije guteza imbere abo mu mwuga wa sinema

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .