Abakunzi ba John Depp bakamejeje basaba ko Amber Heard akurwa muri filime Aquaman

Yanditswe na Uwiduhaye Theos
Kuya 29 Ugushyingo 2020 saa 04:35
Yasuwe :
0 0

Icyamamare muri sinema Amber Heard ashobora gukurwa muri filime Aquaman, nyuma y’aho umubare munini w’abantu ukomeje kukameza ubisaba.

Ni nyuma y’ubusabe bwatanzwe n’abantu batandukanye basabaga ko ava muri iyi filime yamamaye ku Isi. Uyu mugore yagombaga kugaragara muri Aquaman II, igomba kujya hanze mu myaka mike iri imbere.

Abantu basaga miliyoni 1.5 bamaze gutanga ubusabe bashaka ko avanwamo.

Uyu mugore ubusanzwe yari kuzagaragara mu gice gishya cy’iyi filime akinamo yitwa Mera. Ubusabe bw’uko avanwa muri iyi filime bwatangiye nyuma y’aho mu kwezi gushize Johnny Depp [wahoze ari umugabo we] yatsinzwe mu rubanza yaregagamo The Sun kumuharabika.

Umubare munini w’abasaba ko uyu mugore akurwa muri iyi filime ni abakunzi b’akadasohoka b’uwahoze ari umugabo we, bamuhora ibibazo bya gatanya n’imanza bavuga ko yamushoyemo.

Ubu busabe bwatangijwe mu gihe gishize bwiswe “Remove Amber Heard from Aquaman 2” cyangwa “mukure Amber Heard muri Aquaman 2”. Abantu barenga miliyoni 1.5 bamaze kwemeza ko bashaka ko avamo, mu gihe hari intego y’uko miliyoni eshatu zigomba kuzuza ubu busabe.

Amber yatangiye kuvugisha benshi ku mbuga zitandukanye nyuma y’uko Johnny Depp w’imyaka 57, areze ikinyamakuru The Sun agishinja kumuharabika ku bw’inkuru cyanditse kigaragaza ko yakubitaga uyu mugore bakibana. ku wa 2 Ugushyingo yatsinzwe mu rubanza.

Icyo gihe CNN yatangaje ko nyuma y’ibimenyetso birimo amafoto, amajwi ndetse n’ubutumwa bwa Depp, abanyamategeko ba The Sun beretse Urukiko Rukuru rwo mu Bwongereza, bavuze ko ‘gukubita umugore we Amber Heard, byatumye agira ibikomere ndetse agatinya n’ubuzima bwe.’

Umucamanza Andrew Nicol yavuze ko ibimenyetso iki kinyamakuru cyerekanye ari byo. Hagaragajwe ibimenyetso 14 abari bahanganye na Depp bari bafite nk’ibihamya.

Mu rukiko Depp yemeye ko yakoreshaga ibiyobyabwenge, ariko avuga ko ibyo guhohotera uwari umugore we byo atari ukuri.

Mu iburanisha ryabaye muri Nyakanga, Heard yatanze ubuhamya mu rukiko avuga ko Depp yari agiye kumwica inshuro nyinshi.

The Sun nyuma y’umwanzuro w’urukiko yavuze ko mu myaka 20 yahagurukiye ibibazo by’ihohoterwa ryo mu ngo ndetse rikaba ritagomba kugirwa ubwiru. Ishimira umucamanza ku bw’umwanzuro urimo ubushishozi yafashe ndetse na Amber Heard wemeye gutanga ibimenyetso mu rukiko.

Johnny Depp na Amber Heard bahuye mu 2011 mu ikorwa rya filime ‘The Rum Diary’. Baje kurushinga mu 2015, hashize umwaka uyu mugore yaka gatanya. Johnny Depp yaje kubuzwa n’urukiko kongera kugira imishyikirano na Amber Heard, nyuma yo kumushinja kumukubita.

Mu 2017, Heard yaje kureka gukomeza gukurikirana uyu mugabo ndetse bombi baza kumvikana miliyoni $7 kugira ngo barangize ibijyanye na gatanya yari yatswe.

Amber Heard w’imyaka 34 mu minsi ishize yavuze ko yishimiye kugaruka muri iyi filime ari gusabirwa gukurwamo.

Yabwiye Entertainment Weekly ati “Ndishimye mu buryo bukomeye ku bw’urukundo rwinshi ngaragarizwa n’abakunzi ba Aquaman. Bivuze ko ngiye kugaruka."

Aquaman biteganyijwe ko izatangira gufatirwa amashusho umwaka utaha. Ntabwo itariki yo gufafa amashusho yayo iramenyekana ariko biteganyijwe ko izajya hanze mu 2022.

Abakunzi ba John Depp bakomeje gusabira Amber Heard kuva muri Aquaman kubera ibibazo bagiranye
Amber Heard ari gusabirwa gukurwa muri Aquaman

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .