00:00:00 IGIHE NETWORK KN KINYARWANDA EN ENGLISH FR FRANCAIS

Urwibutso ku byaranze igitaramo cya mbere Nel Ngabo yakoreye muri Canada (Amafoto)

Yanditswe na Mahoro Vainqueur
Kuya 5 September 2022 saa 10:19
Yasuwe :

Umuhanzi Byangabo Cyusa Nelson umaze kubaka izina nka Nel Ngabo mu muziki ku nshuro ye ya mbere yataramiye hanze y’u Rwanda aririmbira abakunzi b’umuziki we bahuriye Montreal muri Canada.

Mu ijoro ryo ku wa 3 Nzeri 2022, Nel Ngabo wari wishimiwe cyane yaserutse ku rubyiniro yambaye imyenda y’umweru n’igitambaro ku ntugu kirimo amabendera y’u Rwanda n’u Burundi.

Ni igitaramo cyitabiriwe n’Abanyarwanda n’inshuti zabo bari benshi, aho baserutse bashaka kumva umuziki w’uyu musore uri mu batanga icyizere ku hazaza ha muzika.

Nel Ngabo yagaragaje ubuhanga bwe mu kuririmba ndetse yishimirwa cyane n’abitabiriye igitaramo binyuze mu ndirimbo ze nka “Solo”, “Agacupa”, “Low key”, “Sawa”, “Mutuale”, “Zoli”, “Fresh”, “Muzadukumbura” yakoranye na Fireman n’izindi.

Ubwo yari ku rubyiniro, yafatanyaga n’abakunzi b’ibihangano bye kuririmbana ijambo ku rindi.

Ubwo yari ageze ku ndirimbo “Byakoroha”, “Low Key”, abari muri iki gitaramo biganjemo ab’igitsina gore baririmbanye na we bataha baririmba “Zoli” imihanda yose kuva aho igitaramo cyabereye.

Uyu musore wanyuzagamo akaganira n’abafana ubwo yari ageze ku ndirimbo “Nywe’’, yikuye agakote, atangira gusimbukana n’abakunzi be bari bazi indirimbo ze hafi ya zose.

  Nel Ngabo yahaye icyubahiro Yvan Buravan witabye Imana

Ubwo Nel Ngabo yari ageze hagati mu gitaramo yasabye abitabiriye igitaramo kuzimya amatara yose bagacana urumuri rwa telefoni gusa mu guha icyubahiro umuhanzi Yvan Buravan witabye Imana, mu rukerera rwo ku wa 17 Kanama 2022.

Uyu muhanzi yafatanyije n’abafana be baririmbana indirimbo zirimo “Malaika” na “Oya” za Yvan Buravan.

Nel Ngabo yafashwaga na Ishimwe Clement wamucurangiraga mu buryo bwa live ndetse na Dj Feery Dee wanyuzagamo agacurangazimwe mu ndirimbo z’uyu muhanzi bimwe bimenyerewe nka Playback mu bitaramo.

Biteganyijwe ko Nel Ngabo azamara ukwezi kose muri Canada mu bikorwa bitandukanye bya muzika agiye gukorera muri iki gihugu.

Igitaramo Nel Ngabo yakoreye muri Canada cyateguwe na Boris Evrard, Dj Feery Dee na Nadine Nindabira basanzwe baba muri iki gihugu.

Mu gihe azamara muri Canada, Nel Ngabo azahakorera ibindi bitaramo ndetse amatariki yabyo azamenyekana mu minsi iri imbere.

Nyuma y’igitaramo biteganyijwe ko Nel Ngabo azakorerayo indirimbo, anafatireyo amashusho ya zimwe mu ndirimbo zizasohoka kuri album ye ya gatatu nyuma ya RNB 360 na Ingabo.

Ku wa 31 Kanama 2022, uyu muhanzi aherekejwe na Ishimwe Clement uyobora Kina Music ni bwo berekeje muri Canada aho bagiye kumara ukwezi mu bikorwa bya muzika bitandukanye.

Nel Ngabo yataramiye abakunzi be bari Canada biganjemo Abanyarwanda n'Abarundi
Nel Ngabo yasanze muri Canada ahafite abakunzi benshi, bazi n'indirimbo ze
Nel Ngabo yanyuze benshi mu bakunzi b'umuziki bitabiriye iki gitaramo
Indirimbo za Nel Ngabo zatumye abifuza kubyinana n'inshuti biborohera kwisanga mu gitaramo
Iki gitaramo cyari cyiganjemo urubyiruko cyane
Byari ibyishimo kubona Nel Ngabo ku rubyiniro hanze y'u Rwanda. Yishimiwe ubwo yari ku rubyiniro
Bwari ubwa mbere Nel Ngabo ataramiye hanze y'u Rwanda
Ni ku nshuro ya mbere Nel Ngabo yataramiye hanze y'u Rwanda
Nel Ngabo yishimiwe cyane
Yatahanye ifoto y'urwibutso mu gitaramo Nel Ngabo yakoreye ku butaka bwa Canada
Nel Ngabo yakoreye igitaramo cy'amateka muri Canada

Amafoto: Nyabyenda Jean Baptiste


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .