Urukundo rwo mu gitanda! Indirimbo eshanu zigaragaza inganzo iharawe i Kigali

Yanditswe na Muvunyi Arsène
Kuya 9 Mutarama 2019 saa 04:47
Yasuwe :
0 0

Urukundo rumaze guhimbwaho indirimbo nyinshi ndetse bitewe n’uburyo ari rugari, imyaka ibihumbi ishize rwandikwaho indirimbo n’imivugo, ariko nta we uravuga ibyarwo ngo abirangize.

Bitewe n’uko umuhanzi yiyumva, ibirimo kumubaho, ibyamubayeho cyangwa byabaye ku wundi, ashobora kubibyazamo indirimbo. Hari abataka abakunzi, basaba urukundo cyangwa bavuga ibigeragezo byabo, ubu bageze ku mubano wihariye hagati y’umusore n’umukobwa, umugabo n’umugore, kandi mu mvugo isa n’izimije.

Hambere umusore cyangwa umukobwa wasambanye (ubu byabaye waryamanye) n’umukunzi we, iyo inkuru yajyaga hanze byabaga ari agahomamunwa kimwe no kuvuga ibijyanye n’imibonano mpuzabitsina mu ruhame.

Ubu byabaye ibisanzwe, niyo ntero n’inyikirizo, ziracurangwa abafana bakazibyina bugacya. Uhanze mu butumwa butajyanye n’ibyo, arebye nabi aratera akiyikiriza.

Urwego rushinzwe abahanzi muri Tanzania rumaze iminsi rurwana inkundura n’umuhanzi Diamond Platnumz ushinjwa amagambo y’urukozasoni mu ndirimbo yafatanyije na Rayvanny yitwa ‘Mwanza’. Muri iyi ndirimbo ijambo ‘Nyegezi’ aricamo kabiri akivugira ‘Nyege’, ubusanzwe risobanura ubushake bwo gutera akabariro.

Uyu mwera wahereye i mahanga wageze n’i Kigali, abahanzi bamwe bashotse inganzo yerekeye imibonano mpuzabitsina, ariko bigakorwa mu buryo buzimije ku buryo bibaye ngombwa umuhanzi yabisobanura uko abishatse.

Twahembwe

Ni indirimbo umuraperi Jay C yafatanyije n’umuririmbyi Aimé Bluestone, yasohotse mu Ukwakira 2018. Irimo ubutumwa bwo kwishimisha ku mukozi uba wabonye umushahara w’ukwezi, agasengerera inshuti ze inyama n’inzoga.

Jay C yumvikanisha ko ibi byishimo bagomba kubisangira n’abakobwa kandi babakorakora. Mu gitero cya kabiri agira ati “ibyuki (abakobwa) ubikande impande n’impande ejo dutahe ntawe ufite sheki.”

Muri iki gitero kandi abwira abasore bari kumwe ko abagurira icyo bashaka cyose kugeza n’icyumba baryamana mo n’abakobwa.

Mu mvugo z’ubu yagize ati “Iyo nguze ndagura, fata icyuma (umukobwa) ufate n’icupa. Fata umwana (umukobwa) niba wikora. Fata chamber (icyumba) niba wica intama.”

Kwica intama bisobanurwa nko gukora imibonano mpuzabitsina.

Ku Bunani

Muri iyi indirimbo Ama G The Black yafatanyijemo na Safi Madiba, wumvise izina ryayo wabanza gutekereza ko ari iyo kwifuriza abantu umwaka mushya muhire, nk’uko Orchestre Nyampinga yabiririmbye iti ‘Yifatanyije namwe ku Bunani.”

Nyamara byahe byo kajya! Hano ho Ubunani aba ari umuzimizo usobanura imibonano mpuzabitsina.

Inyikirizo iririmbwa na Safi Madiba abwira umukobwa ko amaze iminsi ubushake bwaramusagutse. Ati “Amajoro abaye menshi mpfira muri njye, nyabuneka, sinzi niba iri joro ndi bugoheke…”

Ama G ahita yungamo ati “imyaka ibaye myinshi, nkorera akazi kose, kora nk’uwikorera mpa ku bunani.” Mu bitero ho Ama G The Black arerura, akabwira umukobwa ko ashaka ko bajyana mu buriri, akamumara uburibwe amaranye iminsi.

Ati “ Uri nk’umuganga ngaho fasha indembe, kandi nutinda urasanga ari intere, kandi urabizi ko umubiri uryana, kwihangana bigira aho bigarukira nkorera serivisi ntagonga moteri, ndapesa hoteli (ndishyura) na Belaire…ngaho ngwino nkwereke udushya dukine igihinde burinde bucya.”

Bonne Appétit

Iyi ni indirimbo umuhanzi Bruce Melody yakoranye n’umuraperi wo muri Uganda Fik Fameica, yasohotse Bruce Melody atabizi ndetse avuga ko yayisohoye nta bunyamwuga yagaragaje.

Mu gice kiririmbwa na Bruce Melody yumvikanisha umusore uri kumwe n’umukobwa basohokanye, ariko ibyishimo byabo bikaza gukomereza mu rugo rw’uwo muhungu. Mu mvugo izimije umukobwa aba afite amafunguro ateye ‘appétit’ umusore yiteguye kuyarya ubudasigaza.

Ati “Ndagusiga imituku (amafaranga) after party ni mu kavumo (nyuma y’ibirori ni mu rugo) uri kimaranzara, unkoraho nkenda gusara, ngaho nyongorera nibirimba umbembereze. Buhoro buhoro, ifunguro ryawe sindisigaza. Nyonga (*3) urushe umunyozi, nanjye mponde (*3) itindo nk’umufundi…”

Mu nyikirizo agenda yitsa ati “Igira hino, nyereka ndebe, nkukundira ko utajya utuma mburara. Inyuma heza, nyereka ndebe, nkukundira ko utajya utuma mburara.”

Uyu musore wo muri Uganda we aba arata umugore ko icyo amusaba cyose akimuha, ku buryo ataha yuhanya kubera ibyo bamuha byuje uburyohe.

Niko Ye!

Ni indirimbo y’itsinda ry’abasore babiri, Dream Boys, bayishyize hanze mu mpera za 2018.Yyatunganyijwe na Bob Pro.

Insanganyamatsiko yayo ntisanzwe kuri aba basore. Muri make ni umusore uhura n’umukobwa basohokeye mu kabyiniro ariko batari beherukanye, umuhungu akiyemeza kugura buri kimwe ariko umugambi ari ugutahana akamumara ipfa.

Inyikirizo igira ati “Ijoro ni iryacu twembi, icyo ushaka cyose baguhe (*2) uyu munsi turatahana, niko ye! Urankiza ubushagarira.”

Story Yanjye Nawe

Iyi ni indirimbo ya kabiri umuhanzi P- FLA yashyize hanze nyuma yo gufungurwa mu mpera za 2017.

Uyu muraperi amenyereweho gukoresha amagambo akakaye ariko mu ndirimbo zitari iz’urukundo. Afatanyije n’umuhanzi Yverry, yakoze mu nganzo aririmbira umukobwa.

Amagambo agize iyi ndirimbo biragoye kubona uko uyavuga cyangwa uyasobanura mu Kinyarwanda gisanzwe, ndetse hari aho bagera bimwe bakabiniga ntibyumvikane.

Hari aho agira ati “urabizi mamy naje hindukira kwa jeux, iyo mini skirt wambaye, intoki ziri kundya, ndashaka ku****…"


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza